പാ രഞ്ജിത്തിൻറെ 'വേട്ടുവം' പൊങ്കൽ റിലീസായെത്തും

OCTOBER 31, 2026, 8:02 PM

പാ. രഞ്ജിത്ത് സംവിധാനം ചെയ്ത്, നീലം പ്രൊഡക്ഷൻസും ലേൺ ആൻഡ് ടീച്ച് പ്രൊഡക്ഷനും ചേർന്ന് നിർമ്മിക്കുന്ന 'വേട്ടുവം' 2027 ലെ പൊങ്കൽ ഉത്സവത്തോടനുബന്ധിച്ച് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.

അടുത്തിടെ പുറത്തിറങ്ങിയ 'വേൾഡ് ഓഫ് വേട്ടുവം' വീഡിയോയ്ക്ക് പ്രേക്ഷകരിൽ നിന്നും സിനിമാ ലോകത്തു നിന്നും വലിയ പിന്തുണയാണ് ലഭിച്ചത്. ഇത് ചിത്രത്തെക്കുറിച്ചുള്ള പ്രതീക്ഷകൾ കൂടുതൽ ഉയർത്തിയിട്ടുണ്ട്. തമിഴ്, ഹിന്ദി, തെലുങ്ക്, മലയാളം, കന്നഡ എന്നീ ഭാഷകളിൽ പുറത്തിറങ്ങിയ വീഡിയോയിൽ ഹിന്ദിയിൽ പങ്കജ് ത്രിപാഠി, തെലുങ്കിൽ റാണ ദഗ്ഗുബാട്ടി, മലയാളത്തിൽ സൗബിൻ ഷാഹിർ, കന്നഡയിൽ കിച്ച സുദീപ്, തമിഴിൽ പാ. രഞ്ജിത്ത് എന്നിവർ അണിനിരന്നു.

'ധർമ്മൻ', 'സേയൻ' എന്നീ ചിത്രങ്ങളും പൊങ്കൽ അവധിക്കാലത്ത് എത്തുമെന്ന് റിപ്പോർട്ടുകളുണ്ടെങ്കിലും ഇരു ചിത്രങ്ങളുടെയും റിലീസ് പദ്ധതികൾ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. ഈ പ്രഖ്യാപനത്തോടെ, 2027 ലെ പൊങ്കൽ റിലീസ് ഔദ്യോഗികമായി സ്ഥിരീകരിക്കുന്ന ആദ്യ ചിത്രമായി 'വേട്ടുവം' മാറിയിരിക്കുകയാണ്.

അടിയമുറൈ, മാൽക്കം തുടങ്ങിയ പരമ്പരാഗത ആയോധനകലകളെ അടിസ്ഥാനമാക്കിയാണ് ഇതിലെ ആക്ഷൻ രംഗങ്ങൾ രൂപകൽപ്പന ചെയ്തിരിക്കുന്നത്. ഈ ആക്ഷൻ രംഗങ്ങൾക്കായി അഭിനേതാക്കൾ പ്രത്യേക പരിശീലനം നേടിയിട്ടുണ്ട്.

ചിത്രത്തിൽ ആര്യ, ദിനേശ്, ഷബീർ, ശോഭിത ധൂളിപാല, കലെയരസൻ എന്നിവർ പ്രധാന വേഷങ്ങളിൽ എത്തുന്നു.