വെടിക്കെട്ട് ബാറ്റിംഗ് കൊണ്ടും വിസ്മയിപ്പിക്കുന്ന ഫീൽഡിംഗ് കൊണ്ടും ക്രിക്കറ്റ് ലോകത്ത് 'ബിഗ് ഷോ' എന്നറിയപ്പെടുന്ന ഓസ്ട്രേലിയൻ സൂപ്പർ ഓൾറൗണ്ടർ ഗ്ലെൻ മാക്‌സ്‌വെൽ രാജ്യാന്തര ക്രിക്കറ്റിലെ എല്ലാ ഫോർമാറ്റുകളിൽ നിന്നും വിരമിച്ചു. പതിനാല് വർഷം നീണ്ട പ്രൊഫഷണൽ കരിയറിനാണ് ഇതോടെ തിരശ്ശീല വീഴുന്നത്.
തന്റെ മുപ്പത്തെട്ടാം വയസ്സിലാണ് താരം വിരമിക്കൽ പ്രഖ്യാപിച്ചത്. കഴിഞ്ഞ ഫെബ്രുവരിയിൽ നടന്ന ഐ.സി.സി ടി20 ലോകകപ്പിൽ ഒമാനെതിരെയുള്ള മത്സരത്തിലാണ് മാക്‌സ്‌വെൽ അവസാനമായി ഓസ്ട്രേലിയൻ ജേഴ്സി അണിഞ്ഞത്. ഓസ്‌ട്രേലിയക്കായി 149 ഏകദിനങ്ങളിലും 130 ടി20 കളിലും 7 ടെസ്റ്റ് മത്സരങ്ങളിലും താരം ബൂട്ടണിഞ്ഞു. 2015, 2023 ഏകദിന ലോകകപ്പുകളും 2021-ലെ ടി20 ലോകകപ്പും നേടിയ ഓസ്ട്രേലിയൻ ടീമിലെ പ്രധാന നെടുംതൂണായിരുന്നു മാക്‌സ്‌വെൽ.
2023-ലെ ലോകകപ്പിൽ പരിക്കിന്റെ അവശതകൾക്കിടയിലും അഫ്ഗാനിസ്ഥാനെതിരെ താരം നേടിയ ചരിത്രപ്രസിദ്ധമായ ഇരട്ട സെഞ്ചുറി ക്രിക്കറ്റ് ചരിത്രത്തിലെ എക്കാലത്തെയും മികച്ച പ്രകടനങ്ങളിലൊന്നാണ്. ഏകദിനത്തിലും ടി20യിലുമായി 10 സെഞ്ചുറികളും 136 വിക്കറ്റുകളും താരം സ്വന്തമാക്കിയിട്ടുണ്ട്. ഒരു ദശാബ്ദത്തിലേറെയായി ഓസ്ട്രേലിയൻ വൈറ്റ് ബോൾ ക്രിക്കറ്റിലെ ഏറ്റവും അപകടകാരിയായ മാച്ച് വിന്നർമാരിൽ ഒരാളെന്ന വിശേഷണത്തോടെയാണ് മാക്‌സ്‌വെൽ പടിയിറങ്ങുന്നത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20201011114605.jpg)
