ദക്ഷിണ കൊറിയയെ തോൽപ്പിച്ച് മെക്‌സിക്കോ റൗണ്ട് ഓഫ് 32ൽ യോഗ്യത നേടുന്ന ആദ്യ ടീം

JUNE 19, 2026, 9:13 AM

ലോകകപ്പ് ഫുട്‌ബോളിൽ കരുത്തരായ ദക്ഷിണ കൊറിയയെ എതിരില്ലാത്ത ഒരു ഗോളിന് കീഴടക്കി ആതിഥേയരായ മെക്‌സിക്കോ റൗണ്ട് ഓഫ് 32വിൽ യോഗ്യത നേടുന്ന ആദ്യ ടീമായി മാറി.
ആവേശകരമായ മത്സരത്തിൽ, രണ്ടാം പകുതിയിൽ ലൂയിസ് റോമോ നേടിയ ഏക ഗോളാണ് മെക്‌സിക്കോയ്ക്ക് ചരിത്രവിജയം സമ്മാനിച്ചത്.

ആദ്യ മത്സരത്തിൽ ദക്ഷിണാഫ്രിക്കയെ പരാജയപ്പെടുത്തിയ മെക്‌സിക്കോയുടെ ടൂർണമെന്റിലെ തുടർച്ചയായ രണ്ടാം വിജയമാണിത്. ഇതോടെ ഗ്രൂപ്പ് എയിൽ രണ്ട് മത്സരങ്ങളിൽ നിന്ന് ആറ് പോയിന്റോടെ മെക്‌സിക്കോ ഒന്നാം സ്ഥാനത്ത് തുടരുന്നു. ചെക് റിപ്പബ്ലിക്കിനെതിരായ ആദ്യ മത്സരം വിജയിച്ചെത്തിയ ദക്ഷിണ കൊറിയ മൂന്ന് പോയിന്റുമായി രണ്ടാമതുണ്ട്. ഗ്രൂപ്പിൽ ചെക് റിപ്പബ്ലിക് മൂന്നാമതും ദക്ഷിണാഫ്രിക്ക നാലാമതുമാണ്.

വിജയിക്കുന്നവർക്ക് അടുത്ത റൗണ്ടിലേക്ക് നേരിട്ട് പ്രവേശനം സാധ്യമാകും എന്നതിനാൽ ഇരു ടീമുകളും കടുത്ത പോരാട്ട വീര്യത്തോടെയാണ് കളം നിറഞ്ഞത്. കൂടുതൽ സമയവും പന്ത് കൈവശം വെച്ച് കളിച്ച മെക്‌സിക്കോ, കൊറിയൻ പ്രതിരോധം തകർക്കാൻ ശ്രമിച്ചെങ്കിലും കൊറിയൻ ഗോൾകീപ്പർ കിം സ്യുങ് ഗ്യുവിന്റെ (കിം സ്യൂൻജ്യു) മികച്ച ഫോമും കൃത്യമായ ഇടപെടലുകളും മെക്‌സിക്കൻ മുന്നേറ്റങ്ങളുടെ മൂർച്ച കുറച്ചു.

മറുവശത്ത്, കിട്ടിയ അവസരങ്ങളിലെല്ലാം സൺ ഹ്യുങ് മിൻ നയിച്ച കൊറിയൻ മുന്നേറ്റനിര മെക്‌സിക്കൻ പ്രതിരോധത്തെ ശക്തമായി പരീക്ഷിക്കുകയും ചെയ്തു. ആദ്യപകുതി ഗോൾരഹിതമായി അവസാനിക്കുകയായിരുന്നു. ഇതോടെ ലോകകപ്പിലെ കഴിഞ്ഞ 12 മത്സരങ്ങളിൽ ആദ്യപകുതിയിൽ ഗോൾ വഴങ്ങിയിട്ടില്ലെന്ന തങ്ങളുടെ അപരാജിത റെക്കോർഡ് നിലനിർത്താൻ മെക്‌സിക്കോയ്ക്ക് സാധിച്ചു. 2010ൽ അർജന്റീനയ്‌ക്കെതിരെയാണ് മെക്‌സിക്കോ അവസാനമായി ഒരു ലോകകപ്പ് മത്സരത്തിന്റെ ആദ്യ പകുതിയിൽ ഗോൾ വഴങ്ങിയത്.

രണ്ടാം പകുതിയിൽ കളി കൂടുതൽ വേഗതയേറിയതായി മാറി. 50-ാം മിനിറ്റിൽ തന്നെ മത്സരത്തിന്റെ വിധി നിർണ്ണയിച്ച ആദ്യ ഗോൾ പിറന്നു. ഇടതുവിങ്ങിൽ നിന്നും ഉയർന്നുവന്ന ക്രോസ് കൈപ്പിടിയിലൊതുക്കുന്നതിനിടെ കൊറിയൻ ഗോൾകീപ്പർ കിം സ്യുങ് ഗ്യുവിന് പിഴച്ചു. പന്ത് പിടിച്ചെടുക്കുന്നതിനിടെ സ്വന്തം സഹതാരവുമായി കൂട്ടിയിടിച്ച ഗോൾകീപ്പറുടെ കയ്യിൽ നിന്നും മുന്നിലേക്ക് വഴുതിവീണ പന്ത്, കാത്തുനിന്ന മെക്‌സിക്കൻ താരം ലൂയിസ് റോമോ അനായാസം വലയിലെത്തിക്കുകയായിരുന്നു.

75ാം മിനിറ്റിൽ പെനാൽറ്റി ബോക്‌സിനുള്ളിൽ നിന്ന് റൗൾ ജിമെനെസ് ഉതിർത്ത തകർപ്പൻ ഷോട്ട് കൊറിയൻ ഗോളി അതിസാഹസികമായി തട്ടിയകറ്റി. മത്സരത്തിന്റെ അവസാന മിനിറ്റുകളിൽ കളി സമനിലയിലാക്കാൻ ദക്ഷിണ കൊറിയ സർവ്വശക്തിയുമെടുത്ത് പോരാടി.

87-ാം മിനിറ്റിൽ ചോ ഗ്യൂസങ്ങിന്റെ ഗോളെന്നുറച്ച ഉഗ്രൻ ഹെഡർ അവിശ്വസനീയമാംവിധം തട്ടിയകറ്റി മെക്‌സിക്കൻ ഗോളി റൗൾ റെയ്ഞ്ചൽ ടീമിന്റെ രക്ഷകനായി. തൊട്ടുപിന്നാലെ 88-ാം മിനിറ്റിലും കൊറിയൻ നിര അപകടകരമായ മുന്നേറ്റം നടത്തിയെങ്കിലും മെക്‌സിക്കൻ പ്രതിരോധം അത് വിജയകരമായി തടഞ്ഞു.

ഈ വിജയത്തോടെ മെക്‌സിക്കോ ഗ്രൂപ്പ് ജേതാക്കളായി അടുത്ത റൗണ്ടിലേക്ക് യോഗ്യത നേടുമെന്ന് ഉറപ്പായിക്കഴിഞ്ഞു. അതേസമയം പൊരുതിത്തോറ്റ ദക്ഷിണ കൊറിയയ്ക്ക് നോക്കൗട്ട് ഘട്ടത്തിലേക്ക് യോഗ്യത നേടണമെങ്കിൽ ദക്ഷിണാഫ്രിക്കയുമായി നടക്കുന്ന അടുത്ത മത്സരം ജയിക്കുക എന്നത് അനിവാര്യമായി മാറിയിരിക്കുകയാണ്.