ക്ഷമ നശിച്ച് രൺബീർ കപൂർ; 'ഫോട്ടോ വേണോ, എങ്കിൽ മാറി നിൽക്കൂ'; വൈറലായി വീഡിയോ

MAY 5, 2026, 11:14 PM

മുംബൈയിൽ കുടുംബത്തോടൊപ്പം സിനിമാ പ്രദർശനത്തിനെത്തിയ നടൻ രൺബീർ കപൂർ പാപ്പരാസികൾക്ക് നേരെ ക്ഷോഭിച്ച വാർത്തയാണ് ഇപ്പോൾ സിനിമാ ലോകത്ത് ചർച്ചയാകുന്നത്. അമ്മ നീതു കപൂറും സഹോദരി റിദ്ധിമയും അഭിനയിച്ച 'ദാദി കി ഷാദി' (Daadi Ki Shaadi) എന്ന ചിത്രത്തിന്റെ സ്ക്രീനിംഗിനായി ഭാര്യ ആലിയ ഭട്ടിനൊപ്പമാണ് രൺബീർ എത്തിയത്.

കാറിൽ നിന്നിറങ്ങിയ താരങ്ങളെ ഫോട്ടോ എടുക്കാനായി ഫോട്ടോഗ്രാഫർമാർ വളയുകയും ക്യാമറകൾ മുഖത്തേക്ക് അടുപ്പിക്കുകയും ചെയ്തതാണ് താരത്തെ പ്രകോപിപ്പിച്ചത്.

"നിങ്ങൾക്ക് ഫോട്ടോ വേണമല്ലേ... നിക്കൂ" എന്ന് രൂക്ഷമായ ഭാഷയിൽ പറഞ്ഞ രൺബീർ, തങ്ങൾക്ക് നടക്കാൻ സ്ഥലം നൽകണമെന്നും ആവശ്യപ്പെട്ടു. തുടർന്ന് അല്പം മാറിനിന്ന് ഇരുവരും ഫോട്ടോയ്ക്ക് പോസ് ചെയ്തു. രൺബീറിനെ പിന്തുണച്ച് നിരവധി ആരാധകർ രംഗത്തെത്തിയിട്ടുണ്ട്.

സെലിബ്രിറ്റികളുടെ സ്വകാര്യതയെ മാനിക്കണമെന്നും മാന്യമായ അകലം പാലിക്കാൻ ഫോട്ടോഗ്രാഫർമാർ തയ്യാറാകണമെന്നുമാണ് സോഷ്യൽ മീഡിയയിലെ സംസാരം. സഞ്ജയ് ലീല ബൻസാലിയുടെ 'ലവ് ആൻഡ് വാർ' (Love and War) എന്ന ചിത്രത്തിലാണ് രൺബീറും ആലിയയും ഇനി ഒന്നിച്ചഭിനയിക്കുന്നത്. കൂടാതെ രൺബീറിന്റെ ബ്രഹ്മാണ്ഡ ചിത്രം 'രാമായണ' 2026 ദീപാവലിക്ക് പുറത്തിറങ്ങും.