ക്രിക്കറ്റ് താരം മുഹമ്മദ് ഷമിയെ കടന്നാക്രമിച്ച് മുസ്ലീം മത പണ്ഡിതന്‍; നോമ്പെടുക്കാതെ ഷമി പാപം ചെയ്‌തെന്ന് വിമര്‍ശനം

MARCH 6, 2025, 3:25 AM

ന്യൂഡെല്‍ഹി: ചാംപ്യന്‍സ് ട്രോഫിയില്‍ ഓസ്ട്രേലിയയ്ക്കെതിരായ ഇന്ത്യയുടെ സെമി ഫൈനല്‍ മത്സരത്തിനിടെ റമസാന്‍ നൊയമ്പിന്റെ ഭാഗമായ ഉപവാസം അനുഷ്ഠിക്കാത്തതിന് ഇന്ത്യന്‍ ക്രിക്കറ്റ് താരം മുഹമ്മദ് ഷമിയെ വിമര്‍ശിച്ച് മുസ്ലീം പുരോഹിതന്‍. ഉപവാസം ഒഴിവാക്കിയതിന് ഷമിയെ ക്രിമിനലെന്ന് വിശേഷിപ്പിച്ച അഖിലേന്ത്യാ മുസ്ലീം ജമാഅത്ത് പ്രസിഡന്റ് മൗലാന ഷഹാബുദ്ദീന്‍ റസ്വി ബറേല്‍വി, അത് പാപമാണെന്നും മതപരമായ തത്വങ്ങള്‍ക്ക് വിരുദ്ധമാണെന്നും പ്രസ്താവിച്ചു. ക്രിക്കറ്റ് താരത്തിനു നേരെ നടത്തിയ വിമര്‍ശനം വിവാദമായി.

'ഇസ്ലാമില്‍ നോമ്പ് ഒരു കടമയാണ്... ആരെങ്കിലും മനഃപൂര്‍വ്വം ഉപവാസം ഒഴിവാക്കിയാല്‍ അവര്‍ പാപികളാണ്. ക്രിക്കറ്റ് താരം മുഹമ്മദ് ഷമിയും നോമ്പ് അനുഷ്ഠിച്ചിട്ടില്ല; അവന്‍ പാപം ചെയ്തു. അവന്‍ കുറ്റവാളിയാണ്' എന്ന് ബറേല്‍വി വിവാദ വീഡിയോ പ്രസ്താവനയില്‍ പറഞ്ഞു. മത്സരത്തിനിടെ ഷമി ജ്യൂസ് കുടിക്കുന്ന ചിത്രങ്ങള്‍ പ്രചരിച്ചിരുന്നു.

'നിര്‍ബന്ധിത കര്‍ത്തവ്യങ്ങളില്‍ ഒന്നാണ് 'റോസ' (നോമ്പ്). ആരോഗ്യമുള്ള ആണോ പെണ്ണോ 'റോസ' ആചരിച്ചില്ലെങ്കില്‍ അവര്‍ വലിയ കുറ്റവാളിയാകും...ഇന്ത്യയിലെ പ്രശസ്ത ക്രിക്കറ്റ് താരം മുഹമ്മദ് ഷമി ഒരു മത്സരത്തിനിടെ വെള്ളമോ മറ്റെന്തെങ്കിലും പാനീയമോ കഴിച്ചു. ആളുകള്‍ അവനെ നിരീക്ഷിക്കുന്നുണ്ടായിരുന്നു. അവന്‍ കളിക്കുന്നുവെങ്കില്‍ അവന്‍ ആരോഗ്യവാനാണെന്ന് അര്‍ത്ഥമാക്കുന്നു. 'റോസ' പാലിക്കാത്തതിനാല്‍, അവന്‍ ഒരു കുറ്റവാളിയാണ്, ' ബറേല്‍വി പറഞ്ഞു.

മുസ്ലീം മതപ്രഭാഷകന്റെ വിമര്‍ശനത്തിനെതിരെ താരത്തെ പ്രതിരോധിച്ച് മുഹമ്മദ് ഷമിയുടെ പരിശീലകന്‍ മുഹമ്മദ് ബദ്റുദ്ദീന്‍ രംഗത്തുവന്നു. ഷമിക്ക് തെറ്റ് പറ്റിയിട്ടില്ലെന്നും രാജ്യത്തിന്റെ പിന്തുണയുണ്ടെന്നും അദ്ദേഹം പറഞ്ഞു. ദേശസ്നേഹത്തിനാണ് ഷമി ഊന്നല്‍ നല്‍കിയത്. എല്ലാറ്റിനുമുപരിയായി രാജ്യത്തിന് മുന്‍ഗണന നല്‍കണമെന്ന് അദ്ദേഹം പുരോഹിതന്മാരോട് അഭ്യര്‍ത്ഥിച്ചു. രാജ്യത്തിന് മുന്നില്‍ മറ്റൊന്നും വരുന്നില്ലെന്നും അദ്ദേഹം പറഞ്ഞു.

എന്‍സിപി (എസ്പി) എംഎല്‍എ രോഹിത് പവാറും ഷമിയെ പിന്തുണച്ച് രംഗത്തെത്തി. മതത്തെ സ്‌പോര്‍ട്‌സുമായി ബന്ധിപ്പിക്കരുതെന്ന് അദ്ദേഹം പറഞ്ഞു. ഇന്ത്യയെ ഒന്നിലധികം തവണ വിജയത്തിലേക്ക് നയിച്ച അര്‍പ്പണബോധമുള്ള കളിക്കാരനാണ് ഷമിയെന്ന് പവാര്‍ പറഞ്ഞു. 'ടീമിനെ പലതവണ വിജയിപ്പിച്ച ഒരു ഇന്ത്യന്‍ പൗരനാണ് അദ്ദേഹം, സ്‌പോര്‍ട്‌സില്‍ മതം വളര്‍ത്തരുത്, ഇന്ന് ഏതെങ്കിലും മുസ്ലിമിനോട് ചോദിച്ചാല്‍ അവര്‍ പറയും മുഹമ്മദ് ഷമിയെക്കുറിച്ച് അഭിമാനിക്കുന്നുവെന്ന്,' പവാര്‍ കൂട്ടിച്ചേര്‍ത്തു.