മുറിവ് തുന്നിക്കെട്ടുമ്പോൾ സർജിക്കൽ ബ്ലേഡ് അകത്ത് വിട്ടെന്ന് പരാതി; പമ്പ ആശുപത്രിക്കെതിരെ ഗുരുതര ആരോപണവുമായി യുവതി

JANUARY 16, 2026, 11:59 PM

കൊച്ചി: പമ്പ ആശുപത്രിക്കെതിരെ ഗുരുതര ആരോപണവുമായി യുവതി രംഗത്ത്. നെടുമ്പാശേരി സ്വദേശിനിയായ പ്രീതയാണ് പരാതിയുമായി രംഗത്തെത്തിയത്. കാലിലെ മുറിവ് തുന്നിക്കെട്ടുന്നതിനിടെ സർജിക്കൽ ബ്ലേഡ് ശരീരത്തിനകത്ത് അവശേഷിപ്പിച്ചതായി ആണ് യുവതി ആരോപിക്കുന്നത്. സംഭവത്തിൽ ജില്ലാ മെഡിക്കൽ ഓഫീസർക്ക് (DMO) പ്രീത പരാതി നൽകി.

ഈ മാസം 14ന് തിരുവാഭരണ ഘോഷയാത്ര കാണുന്നതിനായി പമ്പയിലെത്തിയപ്പോഴാണ് പ്രീതയ്ക്ക് കാലിൽ പരിക്കേറ്റത്. തുടർന്ന് സമീപത്തെ ആശുപത്രിയിൽ ചികിത്സ തേടുകയായിരുന്നു. മുറിവ് തുന്നിക്കെട്ടിയ ശേഷം കടുത്ത വേദന അനുഭവപ്പെട്ടതോടെയാണ് ചികിത്സയിൽ ഗുരുതര പിഴവ് സംഭവിച്ചതായി സംശയം ഉയർന്നത്. പരിശോധനയിൽ മുറിവിനകത്ത് സർജിക്കൽ ബ്ലേഡ് അവശേഷിപ്പിച്ചിരുന്നതായി കണ്ടെത്തിയതായും പ്രീത പരാതിയിൽ വ്യക്തമാക്കുന്നു.