വിഴിഞ്ഞം ഓഹരി കൈമാറ്റം: മുഖ്യമന്ത്രിക്കെതിരെ രൂക്ഷ വിമർശനവുമായി തോമസ് ഐസക്

JULY 9, 2026, 1:56 AM

തിരുവനന്തപുരം: വിഴിഞ്ഞം തുറമുഖത്തിന്റെ ഓഹരി കൈമാറ്റം സർക്കാർ നിശ്ചയിച്ച കർശന നിബന്ധനകൾ പാലിക്കാതെയാണെന്ന് മുൻ ധനമന്ത്രി തോമസ് ഐസക് ആരോപിച്ചു. വിഷയം മന്ത്രിസഭയിൽ ചർച്ച ചെയ്തിട്ടുണ്ടോയെന്ന് മുഖ്യമന്ത്രി വി.ഡി. സതീശൻ വ്യക്തമാക്കണമെന്നും അദ്ദേഹം ആവശ്യപ്പെട്ടു.

ഓഹരി കൈമാറ്റവുമായി ബന്ധപ്പെട്ട വാർത്ത ആദ്യം ആരാണ് പുറത്തുവിട്ടതെന്ന തർക്കമല്ല പ്രധാന വിഷയമെന്ന് തോമസ് ഐസക് പറഞ്ഞു. എക്കണോമിക്സ് ടൈംസ് ജൂൺ ഒന്നിന് തന്നെ ഇക്കാര്യം റിപ്പോർട്ട് ചെയ്തിരുന്നു. തുടർന്ന് ദേശാഭിമാനിയും വാർത്ത പ്രസിദ്ധീകരിച്ചു. എന്നാൽ, മെയ് 18-ന് തന്നെ മുഖ്യമന്ത്രിയായിരുന്ന വി.ഡി. സതീശൻ ഇക്കാര്യത്തിൽ അറിവില്ലായിരുന്നുവെന്ന വിശദീകരണം വിശ്വസിക്കാനാകില്ലെന്നും അദ്ദേഹം വിമർശിച്ചു.

പുതിയ സിഇഒ ചുമതലയേറ്റ ശേഷമാണ് വിവരം ലഭിച്ചതെന്ന മുഖ്യമന്ത്രിയുടെ വാദത്തിന് യാതൊരു അടിസ്ഥാനവുമില്ലെന്നും ഇതിൽ വ്യക്തമായ മറുപടി നൽകേണ്ടത് മുഖ്യമന്ത്രിയുടെ ബാധ്യതയാണെന്നും തോമസ് ഐസക് പറഞ്ഞു.

വിഴിഞ്ഞം തുറമുഖത്തിന് പ്രത്യേക ഓഹരിയില്ലെന്നും വിസിൽ (VGF) സംബന്ധിച്ച ഓഹരി സംസ്ഥാന സർക്കാരിനാണെന്നും അദ്ദേഹം ചൂണ്ടിക്കാട്ടി. നിലവിൽ തുറമുഖത്തിന്റെ നടത്തിപ്പ് ചുമതല അദാനി ഗ്രൂപ്പിനാണ്. "തുറമുഖത്തിന്റെ ഓഹരിയല്ല കൈമാറുന്നത്" എന്ന മുഖ്യമന്ത്രിയുടെ വിശദീകരണം തെറ്റിദ്ധരിപ്പിക്കുന്നതാണെന്നും, യഥാർത്ഥത്തിൽ കൈമാറുന്നത് അദാനി പോർട്ട് പ്രൈവറ്റ് ലിമിറ്റഡിന്റെ ഓഹരികളാണെന്നും അദ്ദേഹം പറഞ്ഞു.

വിഴിഞ്ഞത്തിനൊപ്പം കുളച്ചിൽ തുറമുഖവും ലക്ഷ്യമിട്ടാണ് അദാനി നീക്കങ്ങൾ നടത്തുന്നതെന്ന് തോമസ് ഐസക് ആരോപിച്ചു. എംഎസ്‌സി പോലൊരു ആഗോള കമ്പനിയുടെ വരവിനോട് എതിർപ്പില്ലെന്നും, എന്നാൽ വിഴിഞ്ഞം പദ്ധതിയുടെ നിയന്ത്രണം ഏറ്റെടുക്കുന്ന രീതിയിലുള്ള നീക്കങ്ങളോടാണ് എതിർപ്പെന്നും അദ്ദേഹം വ്യക്തമാക്കി.

സംസ്ഥാനത്തിന്റെ ചരിത്രത്തിൽ ആദ്യമായാണ് മൂന്ന് പ്രധാന വകുപ്പുകൾ മുഖ്യമന്ത്രിയുടെ കൈവശമുണ്ടാകുന്നതെന്നും, അത്തരമൊരു സാഹചര്യത്തിൽ ഇത്രയും പ്രധാനപ്പെട്ട വിഷയത്തെക്കുറിച്ച് അറിവില്ലായിരുന്നുവെന്ന വാദം ഗുരുതരമായ വീഴ്ചയാണെന്നും തോമസ് ഐസക് പറഞ്ഞു.

"മുഖ്യമന്ത്രി ഈ വിഷയത്തിൽ വേണ്ടത്ര പഠനം നടത്തിയില്ല, അല്ലെങ്കിൽ അദാനിക്ക് അനുകൂലമായ രീതിയിൽ കാര്യങ്ങൾ മനസ്സിലാക്കി" എന്ന രണ്ട് സാധ്യതകളിലൊന്നാണ് നിലനിൽക്കുന്നതെന്ന് അദ്ദേഹം അഭിപ്രായപ്പെട്ടു. ഒന്നും അറിയില്ലെന്ന വിശദീകരണം അംഗീകരിക്കാനാവില്ലെന്നും, സത്യപ്രതിജ്ഞയ്ക്ക് മുമ്പ് ചാർട്ടേഡ് വിമാനത്തിൽ പോയി മുഖ്യമന്ത്രി അദാനിയെ കണ്ടത് എന്തിനായിരുന്നുവെന്നും തോമസ് ഐസക് ചോദിച്ചു.

വിഴിഞ്ഞം തുറമുഖവുമായി ബന്ധപ്പെട്ട നിലവിലെ നടപടികൾ കരാർ വ്യവസ്ഥകൾക്ക് വിരുദ്ധമാണെന്നും, ഈ വിഷയത്തിൽ സർക്കാർ വ്യക്തത വരുത്തണമെന്നും അദ്ദേഹം ആവശ്യപ്പെട്ടു.