കോഴിക്കോട് ഡിവൈഎസ്പിക്കെതിരെ ഗുരുതര ആരോപണങ്ങൾ: ജീവനൊടുക്കിയ എസ്.എച്ച്.ഒയുടെ ആത്മഹത്യാക്കുറിപ്പ് പുറത്ത്

NOVEMBER 27, 2025, 6:00 AM

ചെർപ്പുളശ്ശേരി സ്വദേശിയായ ബിനു തോമസ് എന്ന എസ്.എച്ച്.ഒ. രണ്ടാഴ്ച മുമ്പ് ജീവനൊടുക്കിയ സംഭവത്തിൽ കോഴിക്കോട് ഡിവൈ.എസ്.പി ഉമേഷിനെതിരെ ഗുരുതരമായ ആരോപണങ്ങളടങ്ങിയ ആത്മഹത്യാക്കുറിപ്പ് പുറത്തുവന്നു. 32 പേജുള്ള ഈ കുറിപ്പിലാണ് ഞെട്ടിക്കുന്ന വെളിപ്പെടുത്തലുകൾ ഉള്ളത്.

പോലീസ് ഉദ്യോഗസ്ഥനായ ബിനു തോമസ് ആത്മഹത്യ ചെയ്തതിന് പിന്നിൽ ഉന്നത ഉദ്യോഗസ്ഥന്റെ പീഡനമുണ്ടായിരുന്നുവെന്നാണ് സൂചനകൾ. 2014-ൽ സി.ഐ ആയിരുന്ന ഉമേഷ് (നിലവിൽ ഡിവൈ.എസ്.പി) ഒരു അനാശാസ്യ കേസിൽ അറസ്റ്റിലായ യുവതിയെ ലൈംഗികമായി പീഡിപ്പിച്ചു എന്നാണ് കുറിപ്പിലെ പ്രധാന ആരോപണം. പാലക്കാട് ജില്ലയിൽ വെച്ച് അറസ്റ്റിലായ ഈ യുവതിയുടെ വീട്ടിൽ വെച്ചാണ് ഉമേഷ് പീഡിപ്പിച്ചത്. കേസ് ഒതുക്കിത്തീർക്കാനും മാധ്യമങ്ങളിൽ വാർത്ത വരാതിരിക്കാനും യുവതിക്ക് പോലീസുകാരന് കീഴടങ്ങേണ്ടിവന്നുവെന്നും കുറിപ്പിൽ പറയുന്നു.

മാത്രമല്ല, യുവതിയുടെ അടുത്ത് പോകാൻ ഡിവൈ.എസ്.പി ഉമേഷ് തന്നെയും നിർബന്ധിച്ചതായി ബിനു തോമസ് ആത്മഹത്യാക്കുറിപ്പിൽ വെളിപ്പെടുത്തുന്നുണ്ട്. അമ്മയും രണ്ട് മക്കളുമുളള വീട്ടിൽ വെച്ച് സന്ധ്യാ സമയത്താണ് ഉമേഷ് യുവതിയെ കീഴ്‌പ്പെടുത്തിയതെന്നാണ് കുറിപ്പിൽ പറയുന്നത്. ഈ ഗുരുതര ആരോപണങ്ങൾ പുറത്തുവന്ന സാഹചര്യത്തിൽ, സമഗ്രമായ അന്വേഷണത്തിനായി ഉന്നത പോലീസ് ഉദ്യോഗസ്ഥർ നടപടി സ്വീകരിക്കുമെന്നാണ് റിപ്പോർട്ടുകൾ.