വയനാട്, കോഴിക്കോട് ജില്ലകളിൽ റെഡ് അലർട്ട്; കനത്ത മഴ തുടരുന്നു

JULY 7, 2026, 2:57 AM

സംസ്ഥാനത്ത് അതിതീവ്ര മഴ തുടരുന്ന സാഹചര്യത്തിൽ വയനാട്, കോഴിക്കോട് ജില്ലകളിൽ റെഡ് അലർട്ട് പ്രഖ്യാപിച്ചു. അതിശക്തമായതോ അതിതീവ്രമായതോ ആയ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ഇരു ജില്ലകളിലെയും വിവിധ പ്രദേശങ്ങളിൽ ശക്തമായ മഴ തുടരുകയാണ്.

മണ്ണിടിച്ചിൽ ദുരന്തം നേരിട്ട വയനാട്ടിലെ മേപ്പാടിയിൽ ഇന്നലെ മാത്രം 250 മില്ലിമീറ്റർ മഴ രേഖപ്പെടുത്തി. ഇന്നലെ രാത്രി ആരംഭിച്ച മഴ ഇപ്പോഴും തുടരുന്നതിനാൽ രക്ഷാപ്രവർത്തനങ്ങൾ ദുഷ്‌കരമായിരിക്കുകയാണ്.

അതേസമയം, മേപ്പാടി–ചൂരൽമല റോഡിലെ തുരങ്കപാത നിർമാണ സ്ഥലത്ത് ഉണ്ടായ മണ്ണിടിച്ചിലിൽ കുടുങ്ങിയ തൊഴിലാളികളെ രക്ഷപ്പെടുത്താനുള്ള ശ്രമം തുടരുകയാണ്. കനത്ത മഴയെ തുടർന്ന് നിർമാണ സ്ഥലത്ത് കൂട്ടിയിട്ടിരുന്ന മണ്ണ് ഇടിഞ്ഞുവീണതാണ് അപകടത്തിന് കാരണം.