കിഫ്ബി നിർത്തലാക്കുന്നത് കേരളത്തിന്റെ വികസനത്തിന് തിരിച്ചടിയാകും: തോമസ് ഐസക്

OCTOBER 15, 2026, 5:48 AM

തിരുവനന്തപുരം: കിഫ്ബി നിർത്തലാക്കാനുള്ള നീക്കം കേരളത്തിന്റെ പശ്ചാത്തല വികസനത്തെ ഗുരുതരമായി ബാധിക്കുമെന്ന് മുൻ ധനമന്ത്രി തോമസ് ഐസക്. സംസ്ഥാന ബജറ്റിൽനിന്നുള്ള തുക മാത്രം ഉപയോഗിച്ച് വലിയ വികസന പദ്ധതികൾ നടപ്പാക്കാനാകില്ലെന്നും കിഫ്ബി ഇല്ലാതായാൽ സർക്കാർ പ്രഖ്യാപിച്ച പദ്ധതികളിൽ പകുതിപോലും യാഥാർഥ്യമാക്കാൻ കഴിയാത്ത സാഹചര്യമുണ്ടാകുമെന്നും അദ്ദേഹം പറഞ്ഞു.

കിഫ്ബിയുടെ വിശ്വാസ്യത സർക്കാർ തന്നെ തകർത്തുവെന്നാണ് തോമസ് ഐസക്കിന്റെ വിമർശനം. വായ്പയെടുക്കുന്നതുമായി ബന്ധപ്പെട്ട സാങ്കേതിക പരിമിതികൾ മറികടക്കുന്നതിനായാണ് കിഫ്ബി രൂപീകരിച്ചതെന്നും അദ്ദേഹം വിശദീകരിച്ചു. കിഫ്ബിയുടെ കൈവശം 30,000 കോടി രൂപ പണമായും നിക്ഷേപമായും ഉണ്ടെന്നും ഈ തുകയാണ് പ്രതിപക്ഷ നേതാവ് വി.ഡി. സതീശൻ ലക്ഷ്യമിടുന്നതെന്നും ഐസക് ആരോപിച്ചു. കിഫ്ബി പദ്ധതികളിൽ അഴിമതിയുണ്ടെങ്കിൽ ഏത് അന്വേഷണവും നടത്താമെന്നും അദ്ദേഹം വ്യക്തമാക്കി.

അതേസമയം, കിഫ്ബിയുടെ പ്രവർത്തനരീതിയിൽ സമഗ്രമായ മാറ്റങ്ങൾ വേണമെന്ന് നിർദേശിക്കുന്ന വിദഗ്ധസമിതി റിപ്പോർട്ട് നിയമസഭയിൽ സമർപ്പിച്ചിട്ടുണ്ട്. നിലവിലെ രീതിയിൽ കിഫ്ബി തുടരേണ്ടതില്ലെന്നാണ് സമിതിയുടെ പ്രധാന ശുപാർശ. കിഫ്ബി സർക്കാരിന് വലിയ സാമ്പത്തിക ബാധ്യത സൃഷ്ടിക്കുന്നുവെന്നും റിപ്പോർട്ടിൽ ചൂണ്ടിക്കാട്ടുന്നു.

ഭൂമിയേറ്റെടുക്കലുമായി ബന്ധപ്പെട്ട് ഗുരുതര ക്രമക്കേടുകൾ നടന്നതായും റിപ്പോർട്ട് ആരോപിക്കുന്നു. കണ്ണൂരിൽ 3,829 ഏക്കർ ഭൂമി 9,572 കോടി രൂപയ്ക്ക് ഏറ്റെടുത്തതിൽ സമഗ്ര അന്വേഷണം വേണമെന്നും ഭൂമിയുടെ വിലയുടെ അഞ്ചിരട്ടി വരെ നൽകിയെന്ന ആരോപണം പരിശോധിക്കണമെന്നും സമിതി നിർദേശിച്ചിട്ടുണ്ട്.