രാജൻ കേസിലെ പ്രധാന സാക്ഷിയും അധ്യാപകനുമായ പ്രൊഫ. കെ.കെ. അബ്ദുൾ ഗഫാർ അന്തരിച്ചു

JULY 6, 2026, 12:33 AM

കാസർകോട്: അടിയന്തരാവസ്ഥക്കാലത്തെ വിവാദമായ രാജൻ കേസിലെ പ്രധാന സാക്ഷിയും രാജന്റെ അധ്യാപകനുമായ കാസർകോട് ചൗക്കി കെ.കെ. പുറം ചെമ്പകം വീട്ടിൽ പ്രൊഫ. കെ.കെ. അബ്ദുൾ ഗഫാർ അന്തരിച്ചു. 89 വയസ്സായിരുന്നു. വാർധക്യസഹജമായ അസുഖങ്ങളെ തുടർന്നായിരുന്നു അന്ത്യം.

കോഴിക്കോട് റീജിയണൽ എൻജിനീയറിങ് കോളജിൽ (ആർ.ഇ.സി.) മെക്കാനിക്കൽ എൻജിനീയറിങ് വിഭാഗം അധ്യാപകനായിരുന്ന അദ്ദേഹം, രാജനെ പൊലീസ് കസ്റ്റഡിയിലെടുക്കുന്നതിന് മുമ്പ് ജീവനോടെ കണ്ട അവസാന വ്യക്തികളിൽ ഒരാളായിരുന്നു.

രാജനെ പൊലീസ് കക്കയം ക്യാമ്പിലേക്ക് കൊണ്ടുപോയതിന് ശേഷം, പൊലീസ് അറിയിച്ചതിനെ തുടർന്ന് കോളജിനെ പ്രതിനിധീകരിച്ച് കക്കയം ക്യാമ്പിലെത്തിയ വ്യക്തിയും പ്രൊഫ. അബ്ദുൾ ഗഫാറായിരുന്നു. അതിനാൽ രാജൻ കേസിൽ അദ്ദേഹത്തിന്റെ മൊഴി ഏറെ നിർണായകമായിരുന്നു.