നവകേരള യാത്രയിലെ മർദ്ദനക്കേസ്; മുൻകൂർ ജാമ്യ ഉത്തരവിനെതിരെ അപ്പീൽ പരിഗണിക്കുമെന്ന് രമേശ് ചെന്നിത്തല

JUNE 9, 2026, 7:55 AM

തിരുവനന്തപുരം: നവകേരള യാത്രയ്ക്കിടെ ആലപ്പുഴയിൽ യൂത്ത് കോൺഗ്രസ് പ്രവർത്തകർക്ക് നേരെയുണ്ടായ മർദ്ദനക്കേസിൽ മുൻ മുഖ്യമന്ത്രിയുടെ സുരക്ഷാ ഉദ്യോഗസ്ഥർക്ക് മുൻകൂർ ജാമ്യം അനുവദിച്ച കോടതി നടപടി സർക്കാരിന് തിരിച്ചടിയല്ലെന്ന് വ്യക്തമാക്കി ആഭ്യന്തര മന്ത്രി രമേശ് ചെന്നിത്തല. കോടതി ഉത്തരവ് വിശദമായി പരിശോധിച്ച ശേഷം ആവശ്യമെങ്കിൽ അപ്പീൽ നൽകുന്ന കാര്യം പരിഗണിക്കുമെന്നും അദ്ദേഹം വ്യക്തമാക്കി.

അഡ്വക്കേറ്റ് ജനറലുമായും സംസ്ഥാന പൊലീസ് മേധാവിയുമായും ആലോചിച്ച ശേഷമായിരിക്കും തുടർനടപടികൾ സംബന്ധിച്ച തീരുമാനം എടുക്കുകയെന്ന് മന്ത്രി പറഞ്ഞു. കേസിൽ നടന്നത് സമാനതകളില്ലാത്ത അക്രമ സംഭവമാണെന്നും അന്വേഷണം നടത്താൻ തീരുമാനിച്ചത് സർക്കാരാണെന്നും അദ്ദേഹം കൂട്ടിച്ചേർത്തു.

കേസിലെ പ്രതികളായ മുൻ മുഖ്യമന്ത്രി പിണറായി വിജയന്റെ സുരക്ഷാ ഉദ്യോഗസ്ഥരായ അനിൽ കല്ലിയൂർ, സന്ദീപ് എസ്, വിപിൻ, അരുൺ, ഷൈജു എന്നിവർക്ക് ആലപ്പുഴ ജില്ലാ സെഷൻസ് കോടതി മുൻകൂർ ജാമ്യം അനുവദിച്ചിരുന്നു. ജില്ലാ സെഷൻസ് കോടതി ജഡ്ജി ഹണി എം. വർഗീസാണ് ഉത്തരവ് പുറപ്പെടുവിച്ചത്.