ലഹരി മാഫിയക്കെതിരായ പോരാട്ടം: രമേശ് ചെന്നിത്തലയുടെ സുരക്ഷയിൽ ആശങ്ക പ്രകടിപ്പിച്ച് മകൻ രോഹിത്ത് ചെന്നിത്തല

AUGUST 8, 2026, 2:50 AM

കൊച്ചി: സംസ്ഥാനത്ത് ലഹരി മാഫിയക്കെതിരെ ശക്തമായ നടപടികളുമായി മുന്നോട്ടുപോകുന്ന ആഭ്യന്തരമന്ത്രി രമേശ് ചെന്നിത്തലയുടെ സുരക്ഷയിൽ ആശങ്കയുണ്ടെന്ന് മകൻ രോഹിത്ത് ചെന്നിത്തല. മാതൃഭൂമി ഡോട്ട്കോമിന് നൽകിയ പ്രത്യേക അഭിമുഖത്തിലാണ് അദ്ദേഹം മനസ്സ് തുറന്നത്. ലഹരി വിപത്തിന് പിന്നിൽ വൻ ശൃംഖലകൾ തന്നെ പ്രവർത്തിക്കുന്നുണ്ടെന്നും അതിനെതിരെ പോരാടുമ്പോൾ കുടുംബമെന്ന നിലയിൽ സുരക്ഷാ കാര്യങ്ങളിൽ ആശങ്ക സ്വാഭാവികമാണെന്നും രോഹിത്ത് വ്യക്തമാക്കി. എങ്കിലും എത്തരം എതിർപ്പുകളെയും ഭീഷണികളെയും അതിജീവിച്ച് ആഭ്യന്തരമന്ത്രി ലക്ഷ്യവുമായി മുന്നോട്ടുപോകുമെന്നും അദ്ദേഹം കൂട്ടിച്ചേർത്തു.

ഔദ്യോഗിക പദവികൾ ഒന്നുമില്ലാതിരുന്ന സമയത്ത് പോലും 'പ്രൗഡ് കേരള' പോലുള്ള ലഹരിവിരുദ്ധ പ്രചാരണങ്ങൾക്ക് നേതൃത്വം നൽകിയ വ്യക്തിയാണ് രമേശ് ചെന്നിത്തല. അതിനാൽ തന്നെ അധികാരത്തിലെത്തുമ്പോൾ ഈ വിഷയം ഗൗരവമായി ഏറ്റെടുക്കുമെന്ന് ഉറപ്പായിരുന്നു. സുരക്ഷ വർധിപ്പിക്കണമെന്ന് പലരും ആവശ്യപ്പെടുന്നുണ്ടെന്നും ഇക്കാര്യം അദ്ദേഹത്തോട് സംസാരിച്ചിട്ടുണ്ടെന്നും രോഹിത്ത് വെളിപ്പെടുത്തി. ലഹരി മാഫിയയെ ഭയപ്പെടുത്താൻ 'ഓപ്പറേഷൻ തൂഫാൻ' എന്ന പദ്ധതിക്ക് സാധിച്ചിട്ടുണ്ടെന്നത് ഏറെ ആശ്വാസകരമായ കാര്യമാണ്.

കേവലം കേസെടുക്കലിൽ ഒതുങ്ങാതെ, ലഹരിക്ക് അടിമപ്പെട്ടവരെ സമൂഹത്തിന്റെ പ്രധാന ധാരയിലേക്ക് തിരികെ കൊണ്ടുവരാൻ ലക്ഷ്യമിട്ടാണ് 'തൂഫാൻ കെയർ' എന്ന പുനരധിവാസ പദ്ധതി ആരംഭിച്ചത്. ആശുപത്രികളും സാമൂഹിക-സാംസ്കാരിക സംഘടനകളും ഈ ദൗത്യം ഏറ്റെടുത്തു കഴിഞ്ഞു. ആരോഗ്യമേഖലയിൽ പ്രവർത്തിക്കുന്ന വ്യക്തി എന്ന നിലയിൽ ലഹരിയുടെ ഭയാനകമായ പ്രത്യാഘാതങ്ങൾ നേരിട്ട് കണ്ടിട്ടുണ്ടെന്ന് രോഹിത്ത് പറഞ്ഞു. വളർന്നുവരുന്ന തന്റെ മക്കൾ ഉൾപ്പെടെയുള്ള പുതിയ തലമുറ ഈ വിപത്തിൽപ്പെടരുതെന്ന ആഗ്രഹത്തോടെ, ലഹരിക്കെതിരായ പോരാട്ടത്തിൽ കുടുംബത്തിന്റെ പൂർണ്ണ പിന്തുണയോടെ താനും പങ്കാളിയാകുമെന്ന് രോഹിത്ത് ചെന്നിത്തല വ്യക്തമാക്കി.