സമഗ്ര വ്യാപാര-നിക്ഷേപ ഉടമ്പടിക്ക് ഒരുങ്ങി ഇന്ത്യയും ഒമാനും

JANUARY 15, 2025, 10:18 AM

ന്യൂഡല്‍ഹി: ഇന്ത്യയും ഒമാനും ഈ വര്‍ഷം ഒരു സമഗ്ര വ്യാപാര-നിക്ഷേപ ഉടമ്പടി ഒപ്പിടും. ഇത് ഇരു രാജ്യങ്ങളുടെയും ചരക്കുകളുടെ തീരുവ കുറയ്ക്കുകയും സാമ്പത്തിക മേഖലയിലെ ബന്ധം ശക്തിപ്പെടുത്തുന്നതിന്റെ ഭാഗമായി മൊത്തത്തിലുള്ള വ്യാപാരം വര്‍ദ്ധിപ്പിക്കുകയും ചെയ്യും. ഒരു വര്‍ഷം മുമ്പ് ഒമാന്‍ സുല്‍ത്താന്‍ ഹൈതം ബിന്‍ താരിക് ഇന്ത്യ സന്ദര്‍ശിച്ചതിന് ശേഷമാണ് സമഗ്ര സാമ്പത്തിക പങ്കാളിത്ത ഉടമ്പടിക്കായുള്ള ചര്‍ച്ചകള്‍ക്ക് പുതിയ ഉണര്‍വ് ലഭിച്ചത്.

ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാര-നിക്ഷേപ ബന്ധം ഗണ്യമായി വികസിപ്പിക്കാന്‍ സാധ്യതയുള്ള ഇന്ത്യയുമായുള്ള ഈ സുപ്രധാന വ്യാപാര ഉടമ്പടി ഈ വര്‍ഷം തന്നെ പൂര്‍ത്തിയാക്കാനാകുമെന്ന് മസ്‌കറ്റ് പ്രതീക്ഷിക്കുന്നതായി ഒമാന്‍ വാണിജ്യ മന്ത്രി ഖൈസ് ബിന്‍ മുഹമ്മദ് അല്‍-യൂസഫ് പിടിഐ വാര്‍ത്താ ഏജന്‍സിയോട് പറഞ്ഞു.

കഴിഞ്ഞ കുറച്ച് വര്‍ഷങ്ങളായി ഇരു രാജ്യങ്ങളും തമ്മിലുള്ള സാമ്പത്തിക ബന്ധത്തില്‍ വലിയ മുന്നേറ്റം ഉണ്ടായിട്ടുണ്ട്. ഒമാന്റെ പ്രധാന വ്യാപാര പങ്കാളികളില്‍ ഒരാളായി ഇന്ത്യ വളര്‍ന്നു. 2023 ല്‍ ദക്ഷിണ കൊറിയയ്ക്ക് ശേഷം ഒമാന്റെ ക്രൂഡ് ഓയില്‍ കയറ്റുമതിയുടെ നാലാമത്തെ വലിയ വിപണിയായിരുന്നു ഇന്ത്യ. സൗദി അറേബ്യ കഴിഞ്ഞാല്‍ ഒമാന്റെ എണ്ണ ഇതര കയറ്റുമതിയുടെ മൂന്നാമത്തെ വലിയ വിപണിയുമായിരുന്നു ഇന്ത്യ.

ഇന്ത്യയുമായുള്ള മൊത്തത്തിലുള്ള വ്യാപാര ബന്ധം വികസിപ്പിക്കാന്‍ ഒമാന്‍ താല്‍പ്പര്യപ്പെടുന്നുവെന്നും ഒമാനില്‍ ഇന്ത്യന്‍ നിക്ഷേപകര്‍ക്ക് വലിയ താല്‍പ്പര്യമുണ്ടെന്നും അല്‍-യൂസഫ് പറഞ്ഞു. സൗദി അറേബ്യ, ഖത്തര്‍, യുഎഇ എന്നിവരെപ്പോലെ ഒമാനും 'വിഷന്‍ 2040' ന് അനുസൃതമായി ശുദ്ധമായ ഊര്‍ജ്ജ സ്രോതസ്സുകളില്‍ ശ്രദ്ധ കേന്ദ്രീകരിക്കുകയും മറ്റ് വിവിധ മേഖലകളെ പ്രോത്സാഹിപ്പിക്കുകയും ചെയ്തുകൊണ്ട് എണ്ണ വരുമാനത്തെ ആശ്രയിക്കുന്നത് കുറയ്ക്കാന്‍ ശ്രമിക്കുന്നു.