രണ്ടു വയസ്സിൽ താഴെയുള്ള കുട്ടികൾക്ക് കഫ് സിറപ്പ് നിരോധിച്ചേക്കും

APRIL 11, 2026, 10:54 PM

ന്യൂഡൽഹി: രാജ്യത്ത് രണ്ടു വയസ്സിൽ താഴെയുള്ള കുട്ടികൾക്ക് ചുമയ്ക്കുള്ള മരുന്നുകൾ (Cough Syrups) നൽകുന്നത് നിരോധിക്കാൻ കേന്ദ്ര ആരോഗ്യ മന്ത്രാലയം ആലോചിക്കുന്നു. അഞ്ച് വയസ്സിൽ താഴെയുള്ള കുട്ടികളിൽ ഇത്തരം മരുന്നുകളുടെ ഉപയോഗം പരമാവധി കുറയ്ക്കാനും നിയന്ത്രിക്കാനും മന്ത്രാലയം ലക്ഷ്യമിടുന്നുണ്ട്.

ഇന്ത്യൻ ഫാർമക്കോപ്പിയ കമ്മീഷൻ പുറത്തിറക്കിയ 'നാഷണൽ ഫോർമുലറി ഓഫ് ഇന്ത്യ' (NFI) 2026-ന്റെ കരട് രേഖയിലാണ് ഈ നിർദ്ദേശങ്ങളുള്ളത്. കഴിഞ്ഞ വർഷങ്ങളിൽ കഫ് സിറപ്പുകളിലെ വിഷാംശം മൂലം കുട്ടികൾ മരിച്ച സംഭവങ്ങളുടെ പശ്ചാത്തലത്തിലാണ് മരുന്നുകൾ കുറിച്ചു നൽകുന്ന രീതിയിൽ വലിയ മാറ്റം വരുത്താൻ സർക്കാർ ഒരുങ്ങുന്നത്. ഇതുസംബന്ധിച്ച് മന്ത്രാലയത്തിന്റെ ഔദ്യോഗിക സ്ഥിരീകരണം വന്നിട്ടില്ലെങ്കിലും, ഡോക്ടർമാർക്കും ഫാർമസിസ്റ്റുകൾക്കുമുള്ള പുതിയ മാർഗ്ഗനിർദ്ദേശങ്ങൾ വരാനിരിക്കുന്ന മാറ്റത്തിന്റെ സൂചനയാണ് നൽകുന്നത്.

രണ്ടു വയസ്സിൽ താഴെയുള്ള കുട്ടികൾക്ക് ചുമയ്ക്കും ജലദോഷത്തിനുമുള്ള മരുന്നുകൾ നൽകുകയോ വിതരണം ചെയ്യുകയോ ചെയ്യരുതെന്ന് കരട് രേഖയിൽ വ്യക്തമായി പറയുന്നു. അഞ്ച് വയസ്സിൽ താഴെയുള്ള കുട്ടികൾക്ക് കൃത്യമായ ക്ലിനിക്കൽ പരിശോധനയും മേൽനോട്ടവുമില്ലാതെ ഇത്തരം മരുന്നുകൾ ശുപാർശ ചെയ്യരുതെന്നും നിർദ്ദേശമുണ്ട്.

മരുന്ന് നിർമ്മാണത്തിന് ഉപയോഗിക്കുന്ന അസംസ്‌കൃത വസ്തുക്കളും അന്തിമ ഉൽപ്പന്നങ്ങളും സ്വതന്ത്രമായി പരിശോധിക്കേണ്ട ഉത്തരവാദിത്തം ഇനി കമ്പനികൾക്കായിരിക്കും. ഡൈതലിൻ ഗ്ലൈക്കോൾ (DEG), എഥിലീൻ ഗ്ലൈക്കോൾ (EG) തുടങ്ങിയ വിഷാംശങ്ങൾ കലർന്ന സിറപ്പുകൾ കഴിച്ച് 2025-ൽ കുട്ടികൾ മരിച്ച സംഭവങ്ങൾ ആവർത്തിക്കാതിരിക്കാനാണ് ഈ കടുത്ത നടപടി. ഗ്ലിസറിൻ, പ്രൊപ്പിലീൻ ഗ്ലൈക്കോൾ തുടങ്ങിയ ഉയർന്ന അപകടസാധ്യതയുള്ള ചേരുവകളുടെ ഗുണനിലവാരവും പരിശോധനയും കർശനമാക്കാൻ ഇന്ത്യൻ ഫാർമക്കോപ്പിയ കമ്മീഷൻ തീരുമാനിച്ചു.

ആരോഗ്യ വിദഗ്ധരും ഡോക്ടർമാരും ഈ നീക്കത്തെ സ്വാഗതം ചെയ്തിട്ടുണ്ട്. ശിശുക്കളിൽ കഫ് സിറപ്പുകൾ നൽകുന്നതിലൂടെ ലഭിക്കുന്ന ഗുണത്തേക്കാൾ വലിയ ആരോഗ്യപ്രശ്നങ്ങളാണ് അവയുണ്ടാക്കുന്നതെന്ന് വിദഗ്ധർ ചൂണ്ടിക്കാട്ടുന്നു. ചുമ എന്നത് ശരീരത്തിന്റെ സ്വാഭാവികമായ ഒരു പ്രതിരോധ സംവിധാനമാണെന്നും, ലക്ഷണങ്ങൾ അടിച്ചമർത്തുന്നതിന് പകരം അതിന്റെ മൂലകാരണം കണ്ടെത്തി ചികിൽസിക്കുകയാണ് വേണ്ടതെന്നും അവർ അഭിപ്രായപ്പെട്ടു. അംഗീകൃത ലാബുകളിൽ ഓരോ ബാച്ച് മരുന്നുകളും കർശനമായ പരിശോധനയ്ക്ക് വിധേയമാക്കണമെന്നും അവയുടെ രേഖകൾ കൃത്യമായി സൂക്ഷിക്കണമെന്നും നിർമ്മാതാക്കൾക്ക് നിർദ്ദേശം നൽകിയിട്ടുണ്ട്.