മഹുവ മൊയ്ത്രക്കെതിരെ കള്ളപ്പണം വെളുപ്പിക്കലിന് കേസെടുത്ത് ഇഡി

APRIL 2, 2024, 7:46 PM

ന്യൂഡെല്‍ഹി: തൃണമൂല്‍ കോണ്‍ഗ്രസ് നേതാവ് മഹുവ മൊയ്ത്രയ്ക്കെതിരെ എന്‍ഫോഴ്സ്മെന്റ് ഡയറക്ടറേറ്റ് (ഇഡി) കള്ളപ്പണം വെളുപ്പിക്കല്‍ കേസ് രജിസ്റ്റര്‍ ചെയ്തു.

ലോക്‌സഭയില്‍ നിന്ന് പുറത്താക്കപ്പെട്ട മുന്‍ ടിഎംസി എംപിക്കെതിരെ സിബിഐ ഫയല്‍ ചെയ്ത എഫ്‌ഐആറിന്റെ അടിസ്ഥാനത്തിലാണ് ഇഡി കേസ് രജിസ്റ്റര്‍ ചെയ്തിരിക്കുന്നത്. ഡെല്‍ഹിയിലെ ഓഫീസില്‍ ചോദ്യം ചെയ്യലിന് ഹാജരാകാന്‍ ആവശ്യപ്പെട്ട ഏജന്‍സിയുടെ സമന്‍സ് മൊയ്ത്ര തള്ളി ദിവസങ്ങള്‍ക്ക് ശേഷമാണ് ഇഡി നടപടി.

ഫോറിന്‍ എക്സ്ചേഞ്ച് മാനേജ്മെന്റ് ആക്ട് (ഫെമ) നിയമ ലംഘന കേസില്‍ മൊയ്ത്രയ്ക്കൊപ്പം വ്യവസായി ദര്‍ശന്‍ ഹിരാനന്ദാനിയെയും ചോദ്യം ചെയ്യാന്‍ ഇഡി സമന്‍സ് അയച്ചിരുന്നു. പാര്‍ലമെന്റിലെ ലോഗിന്‍ പാസ്‌വേഡുകള്‍ക്ക് പകരമായി ഹിരാനന്ദാനിയില്‍ നിന്ന് മൊയ്ത്ര പണവും സമ്മാനങ്ങളും സ്വീകരിച്ചെന്നാണ് ആരോപണം.

ബിജെപി എംപി നിഷികാന്ത് ദുബെ ഉന്നയിച്ച ആരോപണങ്ങള്‍ അന്വേഷിക്കാന്‍ ലോക്പാല്‍ നിര്‍ദ്ദേശം നല്‍കിയതിന് പിന്നാലെയാണ് പണമിടപാട് കേസുമായി ബന്ധപ്പെട്ട് സിബിഐ മൊയ്ത്രയുമായി ബന്ധപ്പെട്ട സ്ഥലങ്ങളില്‍ റെയ്ഡ് നടത്തിയത്.

വ്യവസായി അദാനി ഗ്രൂപ്പിനെതിരെ മൊയ്ത്രയുടെ പേരില്‍ ചോദ്യങ്ങള്‍ പോസ്റ്റ് ചെയ്തു. അഭിഭാഷകനായ ജയ് അനന്ത് ദേഹാദ്രായിയാണ് ആദ്യം പരാതി ഉന്നയിച്ചത്. പിന്നീട് ബിജെപി എംപി നിഷികാന്ത് ദുബെ ലോക്സഭാ സ്പീക്കര്‍ ഓം ബിര്‍ളയ്ക്ക് പരാതി കൈമാറി. പിന്നീട് മൊയ്ത്രയെ ലോക്‌സഭാംഗത്വത്തില്‍ നിന്ന് പുറത്താക്കി.

അദാനി ഗ്രൂപ്പിന്റെ ഇടപാടുകളെക്കുറിച്ച് താന്‍ ചോദ്യങ്ങള്‍ ഉന്നയിച്ചതിനെത്തുടര്‍ന്ന് തന്നെ കേന്ദ്ര സര്‍ക്കാര്‍ ലക്ഷ്യമിട്ടിരിക്കുന്നതെന്ന് മൊയ്ത്ര ആരോപിക്കുന്നു.