ന്യൂഡെല്‍ഹി: ബലാല്‍സംഗം സംബന്ധിച്ച അലഹബാദ് ഹൈക്കോടതി ജഡ്ജിയുടെ വിവാദ ഉത്തരവിനെ അപലപിച്ച് കേന്ദ്രമന്ത്രി അന്നപൂര്‍ണ്ണ ദേവി. പൊതു സമൂഹത്തിന് മേല്‍ പ്രതികൂല സ്വാധീനം ചെലുത്തുന്ന ഉത്തരവ് സുപ്രീം കോടതി പുനപരിശോധിക്കണമെന്ന് അന്നപൂര്‍ണ ദേവി ആവശ്യപ്പെട്ടു. 

'ഞാന്‍ ഈ തീരുമാനത്തെ പിന്തുണയ്ക്കുന്നില്ല, കൂടാതെ സുപ്രീം കോടതിയും ഈ തീരുമാനം പുനഃപരിശോധിക്കേണ്ടതുണ്ട്, കാരണം ഇത് ഒരു സിവില്‍ സമൂഹത്തില്‍ പ്രതികൂല സ്വാധീനം ചെലുത്തും.' അന്നപൂര്‍ണ ദേവി പറഞ്ഞു.

മാറിടങ്ങളില്‍ പിടിക്കുന്നതും പൈജാമയുടെ ചരട് പൊട്ടിക്കുന്നതും ബലാത്സംഗ കുറ്റമായി കണക്കാക്കില്ലെന്ന് അലഹബാദ് ഹൈക്കോടതി ജഡ്ജി നിരീക്ഷിച്ചിരുന്നു. ഒരു കുറ്റകൃത്യത്തിനുള്ള തയ്യാറെടുപ്പിനും ഒരു കുറ്റകൃത്യം ചെയ്യാനുള്ള യഥാര്‍ത്ഥ ശ്രമത്തിനും ഇടയില്‍ ഒരു വിടവ് ഉണ്ടെന്നാണ് ജസ്റ്റിസ് റാം മനോഹര്‍ നാരായണ്‍ മിശ്രയുടെ ബെഞ്ച് പ്രസ്താവിച്ചത്. 

'മാറില്‍ പിടിക്കുന്നതും പൈജാമയുടെ ചരട് പൊട്ടിക്കുന്നതും ബലാത്സംഗ കുറ്റമല്ല... എന്ന പ്രസ്താവന വളരെ സെന്‍സിറ്റീവാണ്, സമൂഹത്തിന് വളരെ അപകടകരമാണ്. സുപ്രീം കോടതി ഈ വിഷയത്തില്‍ ഇടപെടണം' എന്ന് രാജ്യസഭാ എംപി സ്വാതി മലിവാളും ആവശ്യപ്പെട്ടു.

'ഇന്ത്യന്‍ ജുഡീഷ്യറിയുടെ മറ്റൊരു രത്‌നമാണോ ഇത്? ഇരയുടെ സ്തനങ്ങളില്‍ പിടിക്കുന്നതും പൈജാമയുടെ ചരട് പൊട്ടിക്കുന്നതും ബലാത്സംഗ ശ്രമമല്ലെന്ന് അലഹബാദ് ഹൈക്കോടതി പറയുന്നു. കേസിലെ ഇരയായ പെണ്‍കുട്ടിക്ക് 11 വയസ്സ് മാത്രമേ ഉണ്ടായിരുന്നുള്ളൂ. അത്തരം വിധികള്‍ നല്‍കുമ്പോള്‍ പോക്‌സോയുടെയും ബിഎന്‍എസിന്റെയും കര്‍ശന നിയമങ്ങള്‍ കൊണ്ട് എന്താണ് പ്രയോജനം? പ്രകൃതിവിരുദ്ധ ലൈംഗികബന്ധം കാരണം ഭാര്യയുടെ മരണത്തിന് കാരണക്കാരനായ ഒരാളെ കുറ്റവിമുക്തനാക്കിയ ഛത്തീസ്ഗഢ് ഹൈക്കോടതി വിധി ഓര്‍ക്കുന്നുണ്ടോ?' ബിജെപി നേതാവായ സി ടി പല്ലവി പറഞ്ഞു.

സുപ്രീം കോടതി വിഷയത്തില്‍ സ്വമേധയാ ഇടപെടണമെന്ന് മുതിര്‍ന്ന അഭിഭാഷക ഇന്ദിര ജയ്‌സിംഗും ആവശ്യപ്പെട്ടു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്