ഡയാനയുടെ ഓർമ്മക്കായി ആരംഭിച്ച ചാരിറ്റി സംഘടനയിൽ നിന്നും രാജിവച്ചു ഹാരി രാജകുമാരൻ; കാരണം ഇതാണ്

MARCH 26, 2025, 3:21 AM

ഡയാന രാജകുമാരിയുടെ ബഹുമാനാർത്ഥം ആരംഭിച്ച ആഫ്രിക്കൻ ചാരിറ്റിയിൽ നിന്ന് ഹാരി രാജകുമാരൻ പിന്മാറിയതായി റിപ്പോർട്ട്. 2006-ൽ ലെസോത്തോയിലെ പ്രിൻസ് സീസോയുമായി ചേർന്ന് ആരംഭിച്ച സെൻറ്റിബേലെ എന്ന ചാരിറ്റിയിൽ നിന്ന് ആണ് രാജിവെച്ചിരിക്കുന്നത്.

തന്റെ അമ്മയായ പ്രിൻസ്‌സ് ഡയാനയുടെ ഓർമ്മക്കായി ആണ് അദ്ദേഹം ഈ സംഘടന സ്ഥാപിച്ചത്. ദക്ഷിണാഫ്രിക്കയിൽ എച്ച്‌ഐവി, എയ്ഡ്സ് ബാധിതരായ കുട്ടികൾക്കും യുവജനങ്ങൾക്കുമുള്ള സഹായം ഉറപ്പാക്കുന്നതിനും വേണ്ടിയായിരുന്നു ഈ സംഘടന.

സെൻറ്റിബേലെയുടെ ചെയർപേഴ്സണായ ഡോ. സോഫി ചാണ്ടൗക്കയുമായുള്ള ബന്ധം പൂർണ്ണമായും തകരാറിലായതിന്റെ ഫലമായാണ് ഹാരിയും സംഘടനയിലെ ട്രസ്റ്റിമാരും രാജിവെക്കേണ്ടിവന്നത് എന്നാണ് ലഭിക്കുന്ന വിവരം. സംഘടനയിലെ ഭരണം സംബന്ധിച്ച് നിരവധി പ്രശ്നങ്ങൾ ഉയർന്നതോടെയാണ് ഈ തീരുമാനം ഉണ്ടായത് എന്നാണ് റിപ്പോർട്ടുകൾ പുറത്തു വരുന്നത്.

അതേസമയം ഹാരിയും മറ്റു ട്രസ്റ്റിമാരും ചേർന്ന് ചെയർപേഴ്സൺ ഡോ. സോഫി ചാണ്ടൗക്ക രാജിവെയ്ക്കണമെന്ന് ആവശ്യപ്പെട്ടിരുന്നു. അവർ രാജിയ്ക്ക് തയ്യാറായില്ല, പകരം അവർ ഈ വിഷയത്തെക്കുറിച്ച് യു.കെ ചാരിറ്റി കമ്മീഷനിൽ പരാതി നൽകി. സെൻറ്റിബേലെയുടെ അദ്ധ്യക്ഷപദത്തിൽ തുടരാനുള്ള തന്റെ അവകാശം നിരസിക്കാൻ ശ്രമിച്ചെന്നും, അതിനിടയിൽ അധികാര ദുരുപയോഗം, പീഡനം, അതിക്രമം തുടങ്ങിയവ നേരിടേണ്ടിവന്നെന്നും ആയിരുന്നു അവർ ആരോപിച്ചത്. ഇതേ തുടർന്ന് ആണ് ഡ്യൂക്ക് ഹാരിയും ട്രസ്റ്റിമാരും ചേർന്ന് രാജിവെക്കാൻ തീരുമാനിച്ചത്.

"ഇത്തരം ഒരു അവസ്ഥ വന്നത് ഞങ്ങൾക്ക് നിരാശാജനകമാണ്. സംഘടനയുടെ ഭാവി ഞങ്ങൾക്ക് പ്രിയപ്പെട്ടതാണ്, അതിനാൽ ഈ നിലപാട് എടുക്കേണ്ടി വന്നു. ട്രസ്റ്റിമാർ എല്ലാ സാഹചര്യങ്ങളിലും സെൻറ്റിബേലെയുടെ ഉദ്ദേശ്യങ്ങൾ സംരക്ഷിക്കാനാണ് ശ്രമിച്ചത്. എന്നാൽ, ചെയർപേഴ്സൺ രാജി വെയ്ക്കാതെ നിയമ നടപടികളിലേക്ക് നീങ്ങിയതോടെ, പ്രശ്നം പരിഹരിക്കാൻ പറ്റാത്തവിധം വഷളായി," എന്നാണ് ഹാരിയും സീസോയും അവരുടെ സംയുക്ത പ്രസ്താവനയിൽ വ്യക്തമാക്കിയത്.

"ചെയർപേഴ്സൺ ഡോ. ചാണ്ടൗക്കയോട് ഞങ്ങൾക്കുള്ള വിശ്വാസം നഷ്ടപ്പെട്ടു. എന്നാൽ, അവർക്കെതിരെ നിയമ നടപടികൾ സ്വീകരിക്കാൻ ഈ സംഘടനയ്ക്ക് സാമ്പത്തികമായും ബുദ്ധിമുട്ടുകൾ ഉണ്ടാവുമെന്നു മനസ്സിലാക്കിയതിനാൽ ഞങ്ങൾ രാജി വെച്ചു," എന്നാണ് മുൻ ട്രസ്റ്റിമാർ വ്യക്തമാക്കിയത്.

"സെൻറ്റിബേലെയിൽ ഞാൻ ചെയ്ത എല്ലാ കാര്യങ്ങളും നീതിയുടെയും സമത്വത്തിന്റെയും അടിസ്ഥാനത്തിലാണ്. പക്ഷേ, ഈ ലോകത്ത് ചിലർ തന്നെ നിയമത്തിന് മുകളിൽ നിൽക്കുന്നു. അവർ മറ്റുള്ളവരെ ദുരുപയോഗം ചെയ്യുകയും, അതിനുശേഷം സ്വയം ഇരകളായി ചിത്രീകരിക്കുകയും ചെയ്യുന്നു. അവർ മാധ്യമങ്ങളെ ഉപയോഗിച്ച് തിരിച്ചടി നൽകാൻ ശ്രമിക്കുകയാണ്," എന്നായിരുന്നു വിഷയത്തിൽ ഡോ. ചാണ്ടൗക്കയുടെ പ്രതികരണം. യു.കെ ചാരിറ്റി കമ്മീഷൻ ഈ വിഷയത്തെക്കുറിച്ച് അന്വേഷിച്ച് വരികയാണ്.

അതേസമയം, ഈ തർക്കം ചാരിറ്റിയുടെ ഭാവിയിൽ എന്ത് മാറ്റങ്ങൾ ഉണ്ടാക്കും എന്നത് ഇപ്പോഴും വ്യക്തമല്ല. ഞങ്ങളുടെ ലക്ഷ്യം മാറിയിട്ടില്ല, ചാരിറ്റിയുടെ പ്രവർത്തനം ശക്തിപ്പെടുത്തുക മാത്രമാണ് എന്ന് സെൻറ്റിബേലെ അധികൃതർ വ്യക്തമാക്കി.