ബോക്‌സ് ഓഫീസ് ബ്ലോക്ക് ബസ്റ്റർ ഹിറ്റ് ട്രെൻഡ് തുടരാൻ മമിത ബൈജു; വിഷ്ണു വിശാൽ നായകനാകുന്ന 'ഇരണ്ടു വാനം' ഒക്ടോബർ 23ന് റിലീസ്

SEPTEMBER 26, 2026, 1:08 PM

മമിത ബൈജു - വിഷ്ണു വിശാൽ ചിത്രം 'ഇരണ്ടു വാനം' കേരള വിതരണാവകാശം സ്വന്തമാക്കി ബിനു ജോർജ് അലക്‌സാണ്ടർ പ്രൊഡക്ഷൻസ്. ഒക്ടോബർ 23ന് തിയേറ്ററുകളിൽ എത്തും.

മമിത ബൈജുവും വിഷ്ണു വിശാലും പ്രധാന വേഷങ്ങളിലെത്തുന്ന തമിഴ് ചിത്രം 'ഇരണ്ടു വാനം' കേരളാ വിതരണാവകാശം സ്വന്തമാക്കി ബിനു ജോർജ് അലക്‌സാണ്ടർ പ്രൊഡക്ഷൻസ്. 'മുണ്ടാസുപ്പട്ടി', 'രാക്ഷസൻ' എന്നീ സൂപ്പർ ഹിറ്റ് ചിത്രങ്ങൾക്ക് ശേഷം റാം കുമാറും വിഷ്ണു വിശാലും വീണ്ടും ഒന്നിക്കുന്ന ചിത്രമാണ് 'ഇരണ്ടു വാനം'. സത്യജ്യോതി ഫിലിംസിന്റെ ബാനറിൽ ടി.ജി. ത്യാഗരാജൻ അവതരിപ്പിക്കുന്ന ചിത്രം സെന്ധിൽ ത്യാഗരാജനും, അർജുൻ ത്യാഗരാജനും ചേർന്നാണ് നിർമ്മിക്കുന്നത്. ഒക്ടോബർ 23നാണ് ചിത്രം ആഗോള റിലീസായി തിയ്യേറ്ററുകളിലെത്തുന്നത്.

പ്രണയത്തിന് പ്രാധാന്യം നൽകുന്ന ഒരു റൊമാന്റിക് ഫാന്റസി ചിത്രമായാണ് 'ഇരണ്ടു വാനം' ഒരുങ്ങുന്നത്. വിഷ്ണു വിശാലും മമിത ബൈജുവും അവതരിപ്പിക്കുന്ന കഥാപാത്രങ്ങളെ കേന്ദ്രീകരിച്ചുള്ള പ്രണയകഥയാണ് ചിത്രം പറയുന്നത്. 'മുണ്ടാസുപ്പട്ടി', 'രാക്ഷസൻ' എന്നീ ചിത്രങ്ങളിലൂടെ ശ്രദ്ധ നേടിയ സംവിധായകൻ റാം കുമാറും, വിഷ്ണു വിശാലും മൂന്നാം തവണ ഒന്നിക്കുന്ന ചിത്രം കൂടിയാണിത്.

തുടർച്ചയായ മെഗാവിജയങ്ങളിലൂടെ തമിഴിലും മലയാളത്തിലും ഒരുപോലെ ശ്രദ്ധ നേടുന്ന മമിത ബൈജുവിന്റെ മറ്റൊരു പ്രധാന തമിഴ് ചിത്രമെന്ന പ്രത്യേകതയും 'ഇരണ്ടു വാന'ത്തിനുണ്ട്. വിജയ് നായകനായ 'ജനനായകൻ', സൂര്യ നായകനായ 'വിശ്വനാഥ് ആൻഡ് സൺസ് ' എന്നീ സൂപ്പർ ഹിറ്റ് തമിഴ് ചിത്രങ്ങളിലും മമിത ബൈജു ശ്രദ്ധേയമായ നായികാ വേഷങ്ങളിൽ എത്തിയിരുന്നു. മലയാളത്തിൽ മമിത നായികയായി എത്തിയ 'ബെത്‌ലഹേം കുടുംബ യൂണിറ്റ്' മലയാളത്തിലെ പുതിയ ഇൻഡസ്ട്രി ഹിറ്റ് വിജയം സ്വന്തമാക്കുകയും ഈ വർഷത്തെ തെന്നിന്ത്യയിലെ തന്നെ ഏറ്റവും വലിയ വിജയമായി മാറുകയും ചെയ്തു.

അതു കൊണ്ട് തന്നെ, മമിത ബൈജു നായികയായി എത്തുന്ന ചിത്രങ്ങളുടെ നിരയിൽ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നാണ് 'ഇരണ്ടു വാനം'. പ്രണയവും, ഫാന്റസിയും വൈകാരികതയും പ്രമേയമാക്കുന്ന ചിത്രത്തിൽ വിഷ്ണു വിശാലും മമിത ബൈജുവും ആദ്യമായി ഒന്നിക്കുകയാണ്. കൊടൈക്കനാൽ ഉൾപ്പെടെയുള്ള ലൊക്കേഷനുകളിൽ ചിത്രീകരണം പൂർത്തിയാക്കിയ ചിത്രം ഇപ്പോൾ തിയ്യേറ്റർ റിലീസിനൊരുങ്ങുകയാണ്.

രചന, സംവിധാനം: റാം കുമാർ, നിർമ്മാതാക്കൾ: സെന്ധിൽ ത്യാഗരാജൻ, അർജുൻ ത്യാഗരാജൻ, ബാനർ: സത്യജ്യോതി ഫിലിംസ്, സംഗീതം: ദിബു നൈനൻ തോമസ്, ഛായാഗ്രഹണം: ദിനേഷ് കെ. ബാബു, എഡിറ്റിംഗ്: സാൻ ലോകേഷ്. ബിനു ജോർജ് അലക്‌സാണ്ടർ പ്രൊഡക്ഷൻസ് തന്നെയാണ് ചിത്രത്തിന്റെ ഓൾ ഇന്ത്യ വിതരണ പങ്കാളിയും. ചിത്രത്തിന്റെ കേരളാ ഡിസ്ട്രിബ്യൂഷൻ പാർട്ണർ ഡ്രീം ബിഗ് ഫിലിംസ് ആണ്.