മഞ്ജുവിന്റെ ചുവടുകൾക്ക് ആവേശം പകർന്ന ശബ്ദം; ' മനസിലായോ' ഗായിക ഇവിടെയുണ്ട് !

SEPTEMBER 25, 2024, 10:32 AM

ടി ജെ ജ്ഞാനവേൽ സംവിധാനത്തിലൊരുങ്ങുന്ന വേട്ടയ്യനിലെ ബ്ലോക്ക്ബസ്റ്റർ ഹിറ്റ് ' മനസിലായോ' എന്ന ഗാനം ഇതിനോടകം തന്നെ സോഷ്യൽ മീഡിയയിൽ ട്രെൻഡിങ് ആണ്.

മഞ്ജു വാര്യരും രജനിയും തകർത്ത ഈ ഗാനം അനിരുദ്ധ് രവിചന്ദറുടെ സംഗീതത്തിലൊരുങ്ങി മലേഷ്യ വാസുദേവൻ, യുഗേന്ദ്രൻ വാസുദേവൻ, ദീപ്തി സുരേഷ് എന്നിവർ ചേർന്നാണ് ആലപിച്ചത്. ഈ ഒരൊറ്റ ഗാനത്തിലൂടെ ഗായിക ദീപ്തി സുരേഷും താരപദവിയിലേക്ക് ഉയർന്നിരിക്കുകയാണ്.

മഞ്ജു വാര്യരുടെ ചടുലമായ നൃത്തത്തിനൊപ്പം ഗായികയുടെ ഊർജ്ജസ്വലമായ സ്വരത്തിന് ആരാധകരിൽ നിന്നും പ്രേക്ഷകരിൽ നിന്നും മികച്ച പ്രതികരണമാണ് ലഭിച്ചത്. ദീപ്തിയുടെ അപാരമായ സ്റ്റാമിനയെയും ആളുകൾ പ്രശംസിക്കുന്നുണ്ട്. സൂപ്പർ സുബുവും വിഷ്ണു എടവനും ചേർന്നാണ് വരികൾ എഴുതിയിരിക്കുന്നത്.

2021-ൽ പുറത്തിറങ്ങിയ മാറാ എന്ന ചിത്രത്തിലെ ഉന്നൈതാനേ എന്ന ഗാനത്തിലൂടെയാണ് ഗായിക തൻ്റെ യാത്ര ആരംഭിച്ചത്. ആർ മാധവൻ, ശ്രദ്ധ ശ്രീനാഥ്, അഭിരാമി, ശിവദ തുടങ്ങിയവർ അഭിനയിച്ച ചിത്രം സംവിധാനം ചെയ്തത് ദിലീപ് കുമാറാണ്.

തുടർന്നുള്ള വർഷങ്ങളിൽ, മാമന്നൻ, ലാൽ സലാം, പാത്തു തല തുടങ്ങിയ നിരവധി വലിയ റിലീസുകളിൽ അവർ അവളുടെ ശബ്ദം നൽകി. 2023-ൽ, എക്കാലത്തെയും വലിയ ഇന്ത്യൻ റിലീസുകളിലൊന്നായ ജവാനിലും ദീപ്തി പാടി. ദീപിക പദുക്കോൺ അവതരിപ്പിച്ച ആരാരാരി രാരോ എന്ന ഹിന്ദി ഗാനത്തിന് ദീപ്തിയാണ് ശബ്ദം നൽകിയത്. ഈ ഗാനത്തിന് മികച്ച പിന്നണി ഗായിക (സ്ത്രീ) ഫിലിംഫെയർ അവാർഡിന് നാമനിർദ്ദേശം ചെയ്യപ്പെടുകയുമുണ്ടായി.

അതേസമയം ഒക്‌ടോബർ പത്തിനാണ് വേട്ടയ്യൻ റിലീസിനെത്തുന്നത്. കഴിഞ്ഞ ദിവസം പുറത്തുവിട്ട പ്രീവ്യൂ വീഡിയോയും ആരാധകർ ഏറ്റെടുത്തിരുന്നു. പൊലീസ് എന്‍കൗണ്ടറിനെക്കുറിച്ചാണ് ചിത്രത്തിന്റെ കഥയെന്നാണ് ടീസര്‍ നല്‍കുന്ന സൂചന. വ്യാജ ഏറ്റുമുട്ടല്‍കൊലപാതകങ്ങളും ചിത്രത്തിന് വിഷയമാകുന്നുണ്ടെന്നാണ് സൂചന. എന്‍കൗണ്ടറിനെ എതിര്‍ക്കുന്ന സത്യദേവ് എന്ന ഉദ്യോഗസ്ഥനായാണ് അമിതാഭ് ബച്ചന്‍ എത്തുന്നത്.