മാനുവൽ ന്യൂയർ അന്താരാഷ്ട്ര ഫുട്‌ബോളിൽ നിന്നും വിരമിച്ചു

JUNE 30, 2026, 5:10 AM

ആധുനിക ഫുട്‌ബോളിലെ ഗോൾകീപ്പിങ്ങിന്റെ നിർവചനം മാറ്റിയെഴുതിയ ജർമനിയുടെ ഇതിഹാസ ഗോൾകീപ്പർ മാനുവൽ ന്യൂയർ അന്താരാഷ്ട്ര ഫുട്‌ബോളിൽ നിന്നും ഔദ്യോഗികമായി വിരമിച്ചു.

ലോകകപ്പ് നോക്കൗട്ടിൽ പരാഗ്വെയ്‌ക്കെതിരേ പെനാൽറ്റി ഷൂട്ടൗട്ടിൽ അപ്രതീക്ഷിതമായി പരാജയപ്പെട്ടതിന് പിന്നാലെയാണ് താരത്തിന്റെ വിടവാങ്ങൽ. 40 കാരനായ ന്യൂയർ തന്റെ സോഷ്യൽ മീഡിയ അക്കൗണ്ടുകളിലൂടെയാണ് ആരാധകരെ സങ്കടത്തിലാഴ്ത്തിയ ഈ പ്രഖ്യാപനം നടത്തിയത്. നീണ്ട 15 വർഷത്തെ അന്താരാഷ്ട്ര കരിയറിനാണ് ഇതോടെ വിരാമമായിരിക്കുന്നത്. കഴിഞ്ഞ കുറച്ചുകാലമായി വിരമിക്കലിനെക്കുറിച്ച് ആലോചിക്കുന്നുണ്ടായിരുന്നുവെന്നും കുടുംബവുമായി സംസാരിച്ച ശേഷമാണ് അന്തിമ തീരുമാനമെടുത്തതെന്നും താരം വ്യക്തമാക്കി.

പരമ്പരാഗതമായി ഗോൾലൈനിൽ മാത്രം ഒതുങ്ങിനിന്നിരുന്ന ഗോൾകീപ്പിങ് ശൈലിയെ പെനാൽറ്റി ബോക്‌സിന് പുറത്തേക്ക് വ്യാപിപ്പിച്ച 'സ്വീപ്പർകീപ്പർ' ശൈലി ഫുട്‌ബോളിൽ ജനപ്രിയമാക്കിയത് മാനുവൽ ന്യൂയറാണ്. പ്രതിരോധ നിരക്കാരെപ്പോലെ പന്ത് ഡ്രിബിൾ ചെയ്യാനും കൃത്യതയാർന്ന പാസുകൾ നൽകാനുമുള്ള അദ്ദേഹത്തിന്റെ മികവ് ജർമൻ ടീമിന്റെ കളിശൈലിയെത്തന്നെ മാറ്റിമറിച്ചു.

ടീമിനായി 124 അന്താരാഷ്ട്ര മത്സരങ്ങളിൽ ഗ്ലൗസണിഞ്ഞ ന്യൂയർ, 2014ൽ ബ്രസീലിൽ നടന്ന ഫിഫ ലോകകപ്പിൽ ജർമനിയെ ലോകകിരീടത്തിലേക്ക് നയിക്കുന്നതിൽ നിർണായക പങ്കുവഹിച്ചു. ആ ടൂർണമെന്റിലെ മികച്ച ഗോൾകീപ്പർക്കുള്ള 'ഗോൾഡൻ ഗ്ലൗ' പുരസ്‌കാരവും അദ്ദേഹം സ്വന്തമാക്കിയിരുന്നു. ബാസ്റ്റ്യൻ ഷൈ്വൻസ്റ്റീഗറിന് ശേഷം 2016 മുതൽ 2022 വരെ ജർമൻ ദേശീയ ടീമിന്റെ നായകസ്ഥാനവും നോയർ അലങ്കരിച്ചു.

ഒരു ഘട്ടത്തിൽ ഈ തീരുമാനം എടുത്തേ മതിയാകൂവെന്നും ജർമൻ ദേശീയ ടീമിനൊപ്പമുള്ള തന്റെ യാത്ര ഇവിടെ അവസാനിക്കുകയാണെന്നും വിരമിക്കൽ സന്ദേശത്തിൽ ന്യൂയർ പറഞ്ഞു. സ്വന്തം രാജ്യത്തിനായി കളത്തിലിറങ്ങാൻ കഴിഞ്ഞത് വലിയ ബഹുമതിയായി കാണുന്നുവെന്നും 2014ലെ ലോകകപ്പ് വിജയവും ഹോം ഗ്രൗണ്ടിൽ നടന്ന യൂറോ കപ്പും കരിയറിലെ സുവർണ്ണ നിമിഷങ്ങളാണെന്നും അദ്ദേഹം കൂട്ടിച്ചേർത്തു. ദേശീയ ജേഴ്‌സി അഴിച്ചുവെച്ചെങ്കിലും ക്ലബ്ബ് ഫുട്‌ബോളിൽ ജർമൻ ഭീമന്മാരായ ബയേൺ മ്യൂണിക്കിനായി ന്യൂയർ കളി തുടരും. ഒരു ലോകകപ്പ് കിരീടവും ഒട്ടനവധി ചരിത്ര നിമിഷങ്ങളും ജർമനിക്ക് സമ്മാനിച്ചാണ് ഈ വിശ്വസ്തനായ കാവൽക്കാരൻ പടിയിറങ്ങുന്നത്.