ചെൽസി നായിക മില്ലി ബ്രൈറ്റ് ഫുട്ബോളിൽ നിന്ന് വിരമിച്ചു

APRIL 29, 2026, 4:52 AM

ചെൽസി വനിതാ ടീമിന്റെ നായികയും ഇംഗ്ലീഷ് ഫുട്ബോളിലെ കരുത്തുറ്റ പ്രതിരോധ താരവുമായ മില്ലി ബ്രൈറ്റ് അന്താരാഷ്ട്ര-ക്ലബ് ഫുട്ബോളിൽ നിന്ന് വിരമിക്കൽ പ്രഖ്യാപിച്ചു.

32-ാം വയസ്സിൽ ഉടനടി പ്രാബല്യത്തോടെയാണ് താരം കളിമൈതാനത്തോടു വിടപറഞ്ഞത്. കഴിഞ്ഞ ഫെബ്രുവരി മുതൽ അലട്ടുന്ന കണങ്കാലിലെ പരിക്ക് മൂലമാണ് കരിയർ അവസാനിപ്പിക്കാൻ താരം തീരുമാനിച്ചത്. ചെൽസിക്കും ഇംഗ്ലണ്ട് ദേശീയ ടീമിനും വേണ്ടി സമാനതകളില്ലാത്ത നേട്ടങ്ങൾ കൊയ്ത ശേഷമാണ് ബ്രൈറ്റിന്റെ പടിയിറക്കം.

2015-ൽ ഡോൺകാസ്റ്റർ ബെല്ലസിൽ നിന്ന് ചെൽസിയിലെത്തിയ മില്ലി ബ്രൈറ്റ് ക്ലബിനായി 294 മത്സരങ്ങളിൽ ജഴ്സിയണിഞ്ഞു. എട്ട് വുമൺസ് സൂപ്പർ ലീഗ് (WSL) കിരീടങ്ങൾ നേടിയ താരം, 2020 മുതൽ 2025 വരെയുള്ള ചെൽസിയുടെ തുടർച്ചയായ ആറ് കിരീട നേട്ടങ്ങളിലും നിർണ്ണായക പങ്കുവഹിച്ചു. ഇതിനുപുറമെ ആറ് എഫ്എ കപ്പുകളും നാല് ലീഗ് കപ്പുകളും ബ്രൈറ്റ് ക്ലബിന് നേടിക്കൊടുത്തു. ഇംഗ്ലണ്ട് ദേശീയ ടീമിനായി 88 മത്സരങ്ങളിൽ ബൂട്ട് കെട്ടിയ താരം രാജ്യത്തിന്റെ പ്രതിരോധ നിരയിലെ വിശ്വസ്തയായിരുന്നു.

"കഴിഞ്ഞ 12 വർഷം ചെൽസിയെ പ്രതിനിധീകരിക്കുക എന്നത് എനിക്ക് എല്ലാമായിരുന്നു, എന്നാൽ ഇപ്പോൾ കളി അവസാനിപ്പിക്കാൻ ഞാൻ തയ്യാറായിരിക്കുന്നു," വിരമിക്കൽ പ്രഖ്യാപിച്ചുകൊണ്ട് ബ്രൈറ്റ് പറഞ്ഞു.

മറ്റൊരു ക്ലബിന് വേണ്ടിയും പോരാടാൻ താൻ ആഗ്രഹിക്കുന്നില്ലെന്നും ഇനി ഒരു പുതിയ കാലഘട്ടത്തിലേക്ക് ചുവടുവെക്കുകയാണെന്നും താരം കൂട്ടിച്ചേർത്തു. പരിക്കിനോട് പൊരുതി വീണ്ടും കളിക്കളത്തിൽ തിരിച്ചെത്താൻ കഴിയാത്ത സാഹചര്യത്തിലാണ് കടുത്ത തീരുമാനത്തിലേക്ക് നീങ്ങിയതെങ്കിലും, താൻ എന്നും ഒരു ചെൽസി ആരാധികയായി തുടരുമെന്നും അവർ വ്യക്തമാക്കി.