ലോക ഒന്നാം നമ്പർ താരങ്ങളിലൊരാളായിരുന്ന ബ്രസീലിന്റെ നെയ്മർ ജൂനിയർ വീണ്ടും തന്റെ ബാല്യകാല ക്ലബ്ബിലേക്ക് എത്തുന്നുവെന്ന് റിപ്പോർട്ട്. ബ്രസീലിയൻ ക്ലബ്ബ് സാന്റോസിലേക്ക് താരം ചേക്കേറുന്നതായുള്ള നിരവധി റിപ്പോർട്ടുകളാണ് വരുന്നത്. നിലവിലെ ക്ലബ്ബ് അൽ ഹിലാൽ താരത്തിന്റെ കരാർ ഉടൻ അവസാനിപ്പിച്ചേക്കും. ജൂലായ് വരെയാണ് നെയ്മറിന്റെ അൽ ഹിലാലുമായുള്ള കരാർ. എന്നാൽ ജനുവരി ട്രാൻസ്ഫർ വിൻഡോയിൽ തന്നെ താരത്തെ റിലീസ് ചെയ്യാനാണ് അൽ ഹിലാൽ നീക്കം. തുടർച്ചയായ പരിക്കുകൾ കാരണം നെയ്മറിന് അൽ ഹിലാലിൽ വേണ്ടത്ര മികവ് പ്രകടിപ്പിക്കാൻ കഴിഞ്ഞിരുന്നില്ല.

ഒരു വർഷത്തെ ഇടവേളയ്ക്ക് ശേഷം എത്തിയ താരത്തിന് അടുത്തിടെ വീണ്ടും പരിക്കേറ്റിരുന്നു. ഇതോടെയാണ് അൽ ഹിലാൽ താരത്തെ റിലീസ് ചെയ്യാൻ ശ്രമിക്കുന്നത്. ഇതിനിടെ ബ്രസീലിയൻ ക്ലബ്ബ് പാൽമിറാസിലേക്ക് താരം വരുന്നെന്ന റിപ്പോർട്ടും ഉണ്ടായിരുന്നു. എന്നാൽ പാൽമിറാസ് ഇത് നിഷേധിച്ചു. അമേരിക്കൻ സോക്കർ ലീഗിൽ മെസ്സിയുടെ ഇന്റർമിയാമിയിലേക്ക് താരം ചേക്കേറുമെന്ന റിപ്പോർട്ടും പുറത്ത് വന്നിരുന്നു. എന്നാൽ ഇന്റർമിയാമിയും ഇത് നിഷേധിച്ചു.

നിലവിൽ ഒരു താരത്തെയും ക്ലബ്ബ് സൈൻ ചെയ്യുന്നില്ലെന്ന് അവർ അറിയിക്കുകയായിരുന്നു. കഴിവ് കൊണ്ട് മെസ്സിക്കും റൊണാൾഡോയ്ക്കും തുല്യനായ നെയ്മറിന്റെ കരിയറിലെ ഇടിവിന് കാരണം താരത്തിന്റെ പരിക്ക് തന്നെയായിരുന്നു. ഇടയ്ക്കിടെയുള്ള പരിക്ക് കാരണം താരത്തിന് നഷ്ടമായത് നിരവധി വർഷങ്ങളാണ്. 32 കാരനായ നെയ്മർ ബാഴ്‌സലോണയിലും പിഎസ്ജിയിലും തിളങ്ങിയത് ഒന്നാം നമ്പർ താരമായിട്ടായിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്