ഇത്തവണ രണ്ടും കൽപിച്ച് പഞ്ചാബ്! ലേലത്തില്‍ നോട്ടം ഇവരെ

NOVEMBER 20, 2024, 3:12 PM

ഐപിഎൽ ആദ്യ സീസൺ മുതൽ കളിച്ചിട്ടും കിരീടം ഉയർത്താൻ ഭാഗ്യം ലഭിക്കാത്ത ഫ്രാഞ്ചൈസികളിലൊന്നാണ് പഞ്ചാബ് കിങ്‌സ്. പല സീസണുകളിലും മോശം ടീം കോമ്പിനേഷൻ അവർക്ക് തിരിച്ചടിയായിട്ടുണ്ട്. അത്ര സന്തുലിതമായ ഒരു ടീമിനെ ഇറക്കാൻ പഞ്ചാബിന് കഴിഞ്ഞിട്ടില്ല. എല്ലാ സീസണിലും അവർക്ക് ദൗർബല്യങ്ങൾ ഉണ്ടായിട്ടുണ്ട്.

ഈ പോരായ്മകളെല്ലാം നികത്തി ഐപിഎല്ലിൻ്റെ അടുത്ത സീസണിൽ ഉറച്ച ടീമിനെ ഇറക്കാമെന്ന പ്രതീക്ഷയിലാണ് പഞ്ചാബ്. അതുകൊണ്ട് തന്നെ വരാനിരിക്കുന്ന മെഗാ ലേലം പഞ്ചാബിന് ഏറെ നിർണായകമാണ്. അവർ ലേലത്തിൽ ഒരു മുഴുവൻ ടീമിനെ കണ്ടെത്തേണ്ടതുണ്ട്.

ആറ് കളിക്കാരെ വീതം നിലനിർത്താൻ ഫ്രാഞ്ചൈസികൾക്ക് അനുമതി നൽകിയപ്പോൾ പഞ്ചാബ് രണ്ടുപേരെ മാത്രം നിലനിർത്തി. അൺക്യാപ്ഡ് താരങ്ങളായ ശശാങ്ക് സിംഗ് (5.5 കോടി), പ്രഭ്‌സിമ്രാൻ സിംഗ് (4) എന്നിവർ മാത്രമാണ് ടീമിനൊപ്പമുള്ളത്. ഇക്കാരണത്താൽ, പഞ്ചാബിൻ്റെ പഴ്സിൽ 110.5 എന്ന വലിയ തുക അവശേഷിക്കുന്നു. ഈ തുകയ്ക്ക് എട്ട് വിദേശികളടക്കം 23 താരങ്ങളെ ലേലത്തിൽ വാങ്ങണം. പുതിയ കോച്ച് റിക്കി പോണ്ടിംഗിൻ്റെ കീഴിലാണ് പഞ്ചാബ് അടുത്ത സീസണിൽ ഇറങ്ങുന്നത്. മെഗാ ലേലത്തിൽ പഞ്ചാബ് കണ്ണുവെക്കാൻ സാധ്യതയുള്ള താരങ്ങൾ ആരൊക്കെയാണെന്ന് നോക്കാം.

ഇന്ത്യയുടെ മിന്നും താരങ്ങളായ ഋഷഭ് പന്തും ശ്രേയസ് അയ്യരും അടുത്ത സീസണിൽ പഞ്ചാബ് കിങ്‌സിനായി ഒരുമിച്ച് കളിക്കുന്നത് തള്ളിക്കളയാനാവില്ല. 2018ൽ ഐപിഎല്ലിൽ ശ്രേയസ് ആദ്യമായി ക്യാപ്റ്റനാകുമ്പോൾ റിക്കി പോണ്ടിംഗായിരുന്നു ഡൽഹി ക്യാപിറ്റൽസിൻ്റെ പരിശീലകൻ. ഇപ്പോൾ പഞ്ചാബിൻ്റെ പരിശീലകനായി ചുമതലയേറ്റതോടെ ലേലത്തിൽ ശ്രേയസിനെ വേട്ടയാടാൻ ശ്രമിച്ചാൽ അത്ഭുതപ്പെടാനില്ല.

ഋഷഭ് പന്തിലും പഞ്ചാബ് തീർച്ചയായും കണ്ണുവെക്കും. ഡിസിക്കൊപ്പം കഴിഞ്ഞ സീസൺ വരെ പോണ്ടിങ്ങിനൊപ്പം പ്രവർത്തിച്ച താരമാണ് അദ്ദേഹം. പോണ്ടിങ്ങുമായി നല്ല സൗഹൃദം പുലർത്തുന്നതിനാൽ ലേലത്തിൽ ഋഷഭ് പന്തിന് വലിയ വില നൽകാനും പഞ്ചാബ് തയ്യാറായേക്കും.

ലേലത്തിൽ രണ്ട് സെറ്റ് മാർക്വീ താരങ്ങളുണ്ടാകും. രണ്ടിലും പഞ്ചാബ് വളരെ സജീവമാകുമെന്ന് നമുക്ക് പ്രതീക്ഷിക്കാം. 12 കളിക്കാരുടെ മാർക്വീ സെറ്റിൽ നിന്ന് കുറഞ്ഞത് മൂന്ന് നാല് കളിക്കാരെയെങ്കിലും പഞ്ചാബ് വാങ്ങിയേക്കും. ഇവരിൽ നിന്ന് പുതിയ സീസണിലേക്ക് ഒരു ക്യാപ്റ്റനെയും കണ്ടെത്തേണ്ടിവരും. ഋഷഭ്, ശ്രേയസ് എന്നിവരെ കൂടാതെ ജോസ് ബട്ട്‌ലറും മിച്ചൽ സ്റ്റാർക്കുമാണ് മാർക്വീ സെറ്റിൽ പഞ്ചാബ് ഉറ്റുനോക്കുന്നത്.

കഴിഞ്ഞ ഐപിഎൽ സീസണിൽ ഒപ്പമുണ്ടായിരുന്ന നാല് ക്യാപ്റ്റൻ താരങ്ങളെ ആർടിഎം കാർഡ് വഴി ലേലത്തിൽ തിരിച്ച് വാങ്ങാൻ പഞ്ചാബ് കിങ്‌സിന് സാധിക്കും. അവർ തീർച്ചയായും ഇത് ഉപയോഗിക്കുമെന്ന് പ്രതീക്ഷിക്കുന്നു.ജോണി ബെയർസ്റ്റോ, കാഗിസോ റബാഡ, സാം കുറാൻ, ജിതേഷ് ശർമ്മ, ലിയാം ലിവിംഗ്സ്റ്റൺ, നഥാൻ എല്ലിസ്, രാഹുൽ ചാഹർ, ഹർഷൽ പട്ടേൽ, അർഷ്ദീപ് സിംഗ് എന്നിവരെല്ലാം ആർടിഎം ഓപ്ഷനുകളായി ലഭ്യമാണ്. ഇതിൽ റബാഡ, ലിവിംഗ്സ്റ്റൺ, ബെയർസ്റ്റോ/കുറാൻ, അർഷ്ദീപ് എന്നിവരെ പഞ്ചാബ് ആർടിഎം ഓപ്ഷനുകളിലൂടെ തിരികെ കൊണ്ടുവന്നേക്കാം.

ഓസ്ട്രേലിയൻ സ്റ്റാർ ബാറ്റ്സ്മാൻ സ്റ്റീവ് സ്മിത്താണ് പഞ്ചാബ് ലേലത്തിൽ വാങ്ങിയേക്കാവുന്ന മറ്റൊരു താരം. അമേരിക്കയിൽ നടന്ന മേജർ ലീഗ് ക്രിക്കറ്റിൽ (എംഎൽസി) വാഷിംഗ്ടൺ ഫ്രീഡം ചാമ്പ്യന്മാരാകാൻ സ്മിത്ത് നേതൃത്വം നൽകിയപ്പോൾ പോണ്ടിംഗ് ആയിരുന്നു അവരുടെ പരിശീലകൻ. ഇക്കാരണത്താൽ സ്മിത്തിനെ പഞ്ചാബിലെത്തിക്കാനുള്ള നീക്കവും പോണ്ടിംഗ് നടത്തിയേക്കും. അൺക്യാപ്പ്ഡ് താരങ്ങളിൽ നേരത്തെ ഒപ്പമുണ്ടായിരുന്ന ഹർപ്രീത് ബ്രാർ, അശുതോഷ് ശർമ എന്നിവരെയും പഞ്ചാബ് ഉറ്റുനോക്കാൻ സാധ്യതയുണ്ട്.