അനുമതിയില്ലാതെ പേരും ശബ്ദവും ഉപയോഗിക്കരുത്; വ്യക്തിത്വ അവകാശങ്ങൾ സംരക്ഷിക്കാൻ ഡൽഹി ഹൈക്കോടതിയെ സമീപിച്ച് വരുൺ ധവാൻ

MAY 29, 2026, 10:23 PM

ന്യൂഡൽഹി: തന്റെ പേരും ചിത്രവും ശബ്ദവും അനുമതിയില്ലാതെ ഇന്റർനെറ്റിൽ വാണിജ്യ ആവശ്യങ്ങൾക്കും വ്യാജ പ്രചാരണങ്ങൾക്കുമായി ഉപയോഗിക്കുന്നത് തടയണമെന്ന് ആവശ്യപ്പെട്ട് ബോളിവുഡ് താരം വരുൺ ധവാൻ ഡൽഹി ഹൈക്കോടതിയെ സമീപിച്ചു.

നടന്റെ പരാതിയിൽ അദ്ദേഹത്തിന്റെ വ്യക്തിത്വ അവകാശങ്ങൾ സംരക്ഷിച്ചുകൊണ്ട് ജസ്റ്റിസ് ജ്യോതി സിംഗ് ഇടക്കാല ഉത്തരവ് പുറപ്പെടുവിച്ചു. സമൂഹമാധ്യമങ്ങളിലും മറ്റ് ഡിജിറ്റൽ പ്ലാറ്റ്‌ഫോമുകളിലും വരുൺ ധവാന്റെ അനുമതിയില്ലാതെ പ്രചരിക്കുന്ന അപകീർത്തികരവും ചൂഷണം ലക്ഷ്യമിട്ടുള്ളതുമായ ഉള്ളടക്കങ്ങൾ അടിയന്തരമായി നീക്കം ചെയ്യാൻ കോടതി ഉത്തരവിട്ടു.

നടന്റെ പേര്, ചിത്രം, ശബ്ദം എന്നിവ ഒരു തരത്തിലും ദുരുപയോഗം ചെയ്യുന്നില്ലെന്ന് ഉറപ്പാക്കാൻ സമൂഹമാധ്യമ പ്ലാറ്റ്‌ഫോമുകൾക്ക് കോടതി കർശന നിർദേശം നൽകി. അദ്ദേഹത്തിന്റെ അനുമതിയില്ലാതെ എഐ (AI) സാങ്കേതികവിദ്യ ഉപയോഗിച്ച് നിർമിച്ച ഡീപ്പ് ഫേക്ക് ദൃശ്യങ്ങൾ, അശ്ലീല ലിങ്കുകൾ, മറ്റ് ആക്ഷേപകരമായ ഉള്ളടക്കങ്ങൾ എന്നിവയ്ക്കെല്ലാം ഈ സംരക്ഷണം ബാധകമായിരിക്കും.

ആർട്ടിഫിഷ്യൽ ഇന്റലിജൻസ് ടൂളുകളുടെയും ഡീപ്പ് ഫേക്ക് സാങ്കേതികവിദ്യയുടെയും വ്യാപനം സിനിമാ മേഖലയിലെ പ്രമുഖരുടെ സ്വകാര്യതയ്ക്കും പ്രതിച്ഛായയ്ക്കും വലിയ ഭീഷണിയാകുന്ന സാഹചര്യത്തിലാണ് വരുൺ ധവാന്റെ ഈ നിയമപോരാട്ടം. നേരത്തെ ബോളിവുഡ് ഇതിഹാസം അമിതാഭ് ബച്ചൻ, അജയ് ദേവ്ഗൺ, അർജുൻ കപൂർ, അഭിഷേക് ബച്ചൻ, ഐശ്വര്യ റായ്, ജാക്കി ഷ്രോഫ് തുടങ്ങിയ പ്രമുഖ താരങ്ങളും സമാനമായ രീതിയിൽ വ്യക്തിത്വ അവകാശ സംരക്ഷണത്തിനായി ഡൽഹി ഹൈക്കോടതിയെ സമീപിച്ച് അനുകൂല ഉത്തരവുകൾ നേടിയിരുന്നു.

വ്യാജ പരസ്യങ്ങൾ, തെറ്റിദ്ധരിപ്പിക്കുന്ന എൻഡോർസ്‌മെന്റുകൾ, മോർഫ് ചെയ്ത ദൃശ്യങ്ങൾ എന്നിവയിലൂടെ താരങ്ങളുടെ പേര് ദുരുപയോഗം ചെയ്യുന്നത് തടയാൻ ഇത്തരം കോടതി ഉത്തരവുകൾ വലിയ സഹായമാകുന്നുണ്ട്.