ഗായിക ഷക്കീറ വീണ്ടും പ്രണയത്തിൽ? ഹോളിവുഡ് താരത്തിനൊപ്പമുള്ള ദൃശ്യങ്ങൾ പുറത്ത്

JUNE 16, 2026, 11:21 PM

മുൻ സ്പാനിഷ് ഫുട്ബോൾ താരം ജെറാർഡ് പിക്വെയുമായുള്ള വിവാഹമോചനത്തിന് ശേഷം പ്രശസ്ത പോപ്പ് ഗായിക ഷക്കീറ വീണ്ടും പ്രണയത്തിലായെന്ന് റിപ്പോർട്ടുകൾ. മെക്സിക്കോയിൽ നടന്ന ലോകകപ്പ് ഫുട്ബോൾ ഉദ്ഘാടന ചടങ്ങിൽ തകർപ്പൻ പ്രകടനം കാഴ്ചവെച്ച ഷക്കീറയെ, പ്രശസ്ത ഹോളിവുഡ് നടൻ മാനുവൽ ഗാർസിയ റുൾഫോയ്ക്കൊപ്പം ലോസ് ആഞ്ചലസിലെ ഒരു പ്രമുഖ ഹോട്ടലിൽ വെച്ച് കണ്ടെത്തിയതോടെയാണ് പുതിയ ചർച്ചകൾക്ക് തുടക്കമായത്.

ലോസ് ആഞ്ചലസിലെ സൺസെറ്റ് ടവർ ഹോട്ടലിൽ നിന്ന് ഇരുവരും ഒരുമിച്ച് ചിരിച്ചുസംസാരിച്ച് പുറത്തേക്ക് വരുന്ന ചിത്രങ്ങൾ പ്രമുഖ സെലിബ്രിറ്റി ഗോസിപ്പ് പ്ലാറ്റ്‌ഫോമായ 'ഡ്യൂമോയ്' ആണ് പുറത്തുവിട്ടത്. കറുത്ത വസ്ത്രങ്ങൾ ധരിച്ചെത്തിയ ഇരുവരും ഒരേ കാറിലാണ് ഹോട്ടലിൽ നിന്നും മടങ്ങിയത്. മാനുവൽ ഗാർസിയ കാറോടിച്ചപ്പോൾ മുൻസീറ്റിൽ ഷക്കീറയുമുണ്ടായിരുന്നു. അതീവ സന്തോഷത്തോടെ പരസ്പരം തമാശകൾ പറഞ്ഞു ചിരിക്കുന്ന ഇവരുടെ ചിത്രങ്ങൾ ആരാധകർക്കിടയിൽ വലിയ തോതിൽ പ്രചരിക്കുന്നുണ്ട്. തന്റെ ലോകപര്യടനത്തിന്റെ ഭാഗമായി ലോസ് ആഞ്ചലസിൽ നടന്ന സംഗീത പരിപാടികൾക്ക് ശേഷമാണ് ഷക്കീറ നടനൊപ്പം സമയം ചിലവഴിച്ചത്.

തന്റെ പങ്കാളിയായിരുന്ന ഫുട്ബോൾ താരം ജെറാർഡ് പിക്വെ തന്നെ വഞ്ചിച്ചതിനെ തുടർന്നുണ്ടായ വിവാദങ്ങൾക്കും വേർപിരിയലിനും ശേഷം ഷക്കീറയുടെ പ്രണയജീവിതത്തെക്കുറിച്ച് വലിയ രീതിയിലുള്ള ചർച്ചകൾ നടന്നിരുന്നു. എന്നാൽ അടുത്തിടെ 'പീപ്പിൾ' മാധ്യമത്തിന് നൽകിയ അഭിമുഖത്തിൽ പ്രണയത്തെക്കുറിച്ച് ഷക്കീറ പറഞ്ഞത് ഇങ്ങനെയായിരുന്നു: "നിലവിൽ എന്റെ കുട്ടികളെ വളർത്തുന്നതിനെക്കുറിച്ച് മാത്രമാണ് ഞാൻ ചിന്തിക്കുന്നത്. മറ്റൊരു പ്രണയം ഇപ്പോൾ എന്റെ ചിന്തകളിലില്ല. ഒരുപക്ഷേ കുട്ടികൾ വലുതാകുമ്പോൾ അതിനെക്കുറിച്ച് ആലോചിക്കാം. ജീവിതത്തിലെ കഠിനമായ പ്രതിസന്ധികളിൽ നിന്ന് നമ്മൾ എത്രത്തോളം കരുത്തരാണെന്ന് ഞാൻ മനസ്സിലാക്കി."

പ്രശസ്ത നെറ്റ്ഫ്ലിക്സ് പരമ്പരയായ 'ദി ലിങ്കൺ ലോയർ', ഹോളിവുഡ് ചിത്രങ്ങളായ 'ജുറാസിക് വേൾഡ് റീബർത്ത്', 'എ മാൻ കോൾഡ് ഓട്ടോ' എന്നിവയിലൂടെ ശ്രദ്ധേയനായ മെക്സിക്കൻ നടനാണ് മാനുവൽ ഗാർസിയ-റുൾഫോ. പ്രശസ്ത കൺട്രി മ്യൂസിക് താരങ്ങളായ ടിം മക്ഗ്രോയുടെയും ഫെയ്ത്ത് ഹില്ലിന്റെയും മകൾ ഓഡ്രി മക്ഗ്രോയുമായി മാനുവൽ പ്രണയത്തിലായിരുന്നു. എന്നാൽ ഈ വർഷം ആദ്യം ഇരുവരും സമൂഹമാധ്യമങ്ങളിൽ പരസ്പരം അൺഫോളോ ചെയ്തതോടെ ഇവർ വേർപിരിഞ്ഞതായി വാർത്തകൾ വന്നിരുന്നു. ഇതിന് പിന്നാലെയാണ് ഇപ്പോൾ ഷക്കീറയ്ക്കൊപ്പം താരം ക്യാമറക്കണ്ണുകളിൽ പെട്ടിരിക്കുന്നത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്