കാസർകോട് കേന്ദ്ര സർവ്വകലാശാലയിൽ വന്ദേമാതരം സെമിനാറിനെതിരെ പ്രതിഷേധം

OCTOBER 6, 2026, 12:19 AM

കാസർകോട്: കാസർകോട് കേന്ദ്ര സർവ്വകലാശാലയിൽ വിദ്യാർത്ഥി പ്രതിഷേധം ശക്തം. വന്ദേമാതരവുമായി ബന്ധപ്പെട്ട ദേശീയ സെമിനാറിൽ ആർഎസ്എസ് നേതാക്കൾ പങ്കെടുക്കുന്നതിലാണ് പ്രതിഷേധം. പൊലീസും വിദ്യാർത്ഥികളുമായി ഉന്തും തള്ളുമുണ്ടായി.

എസ്.എഫ്.ഐ, എം.എസ്.എഫ്, എൻ.എസ്.യു.ഐ സംഘടനകൾ പ്രതിഷേധവുമായി രംഗത്തുണ്ട്. പരിപാടിയിൽ പങ്കെടുക്കുന്ന മുഖ്യ പ്രഭാഷകൻ പ്രജ്ജാ പ്രവാഹ് ദേശീയ കൺവീനർ ജെ നന്ദകുമാറിനെ തടയുമെന്നാണ് പ്രഖ്യാപനം. ഇതോടെ നിയമ നടപടി ഉണ്ടാകുമെന്ന മുന്നറിയിപ്പ് നൽകി സർവകലാശാല അധികൃതർ രംഗത്തെത്തി.

വന്ദേമാതരത്തിന്റെ 150-ാം വാർഷികത്തോടനുബന്ധിച്ചാണ് കാസർഗോഡ് പെരിയയിലെ കേരള കേന്ദ്ര സർവകലാശാലയിൽ ദ്വിദിന ദേശീയ സെമിനാർ നടത്തുന്നത്. നന്ദകുമാർ ക്യാംപസിൽ എത്തിയാൽ തടയുമെന്നും മതനിരപേക്ഷവും ജനാധിപത്യപരവുമായ ക്യാംപസ് സംരക്ഷിക്കാൻ ശക്തമായ ഇടപെടൽ നടത്തുമെന്നുമാണ് എസ്എഫ്‌ഐ നിലപാട്.

ആർഎസ്എസ് നേതാക്കൾ മുഖ്യപ്രഭാഷകരായി നടത്തുന്ന സെമിനാർ അക്കാദമിക പ്രാധാന്യമുള്ളതല്ല എന്നും കാവിവത്കരണ അജണ്ട ആണെന്നുമാണ് വിദ്യാർത്ഥി സംഘടനകൾ ആരോപിക്കുന്നത്. ഇന്നും നാളെയും സർവകലാശാലയിലെ ലൈബ്രറി സെമിനാർ ഹാളിലാണ് പരിപാടി. ആർഎസ്‌എസ് ആഭിമുഖ്യമുള്ള അഖില ഭാരതീയ സാഹിത്യ പരിഷത്ത് സഹസംഘാടകരായതിലും പ്രതിഷേധമുണ്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്