ഐപിഎസ് തലപ്പത്ത് അഴിച്ചുപണി സാധ്യത; ഡിജിപി റാങ്ക് ലക്ഷ്യമിട്ട് ഉന്നത ഉദ്യോഗസ്ഥരുടെ നീക്കങ്ങൾ സജീവം

JUNE 9, 2026, 3:50 AM

തിരുവനന്തപുരം: സംസ്ഥാന പൊലീസ് നേതൃത്വത്തിൽ അഴിച്ചുപണിക്ക് സാധ്യതകൾ ശക്തമാകുന്നതിനിടെ ഉന്നത ഐപിഎസ് ഉദ്യോഗസ്ഥർക്കിടയിൽ സ്ഥാനക്കയറ്റത്തിനും നിയമനങ്ങൾക്കുമായി നീക്കങ്ങൾ സജീവമാകുന്നു. ഡിജിപി നിതിൻ അഗർവാൾ വിരമിക്കുന്നതോടെ ഒരു ഡിജിപി റാങ്ക് ഒഴിവ് വരാനിരിക്കെയാണ് ചർച്ചകൾ ശക്തമായത്.

സീനിയോറിറ്റിയുടെ അടിസ്ഥാനത്തിൽ എം.ആർ. അജിത് കുമാറാണ് ഡിജിപി റാങ്കിലേക്കുള്ള പട്ടികയിൽ മുന്നിലുള്ളത്. എന്നാൽ സമീപകാലത്ത് ആലപ്പുഴയിലെ രക്ഷാപ്രവർത്തനവുമായി ബന്ധപ്പെട്ടുണ്ടായ വിവാദങ്ങളും വിമർശനങ്ങളും അദ്ദേഹത്തിന്റെ സാധ്യതകളെ ബാധിക്കുമോയെന്ന ചോദ്യവും ഉയരുന്നുണ്ട്.

അതേസമയം, തനിക്കെതിരെ ആസൂത്രിതമായ നീക്കങ്ങൾ നടക്കുന്നുവെന്നാണ് അജിത് കുമാറിന്റെ നിലപാട്. രക്ഷാപ്രവർത്തനവുമായി ബന്ധപ്പെട്ട വാർത്തകളും അതിന്റെ ഭാഗമാണെന്ന് അദ്ദേഹം നേരത്തെ പ്രതികരിച്ചിരുന്നു.

ക്രമസമാധാന ചുമതലയുള്ള എഡിജിപി സ്ഥാനത്ത് എച്ച്. വെങ്കിടേഷ് തുടരുന്നതിൽ സർക്കാരിന് താൽപര്യമില്ലെന്നാണ് സൂചന. പകരം ദിനേന്ദ്ര കശ്യപ്പോ പി. വിജയനോ ആ സ്ഥാനത്തേക്ക് പരിഗണിക്കപ്പെടുമോയെന്ന കാര്യത്തിൽ ഇപ്പോഴും വ്യക്തത വന്നിട്ടില്ല.

തിരുവനന്തപുരം ജില്ലാ പൊലീസ് മേധാവിയായി എസ്.പി. ഷൗക്കത്തലി നിയമിതനാകാൻ സാധ്യതയുണ്ടെന്നും റിപ്പോർട്ടുകളുണ്ട്. തിരുവനന്തപുരം, കൊച്ചി സിറ്റി പൊലീസ് കമ്മിഷണർമാരുടെ സ്ഥാനങ്ങളിലും മാറ്റമുണ്ടാകുമെന്നാണ് സൂചന.

ഐപിഎസ് തലത്തിലെ പുനഃസംഘടന സംബന്ധിച്ച് മുഖ്യമന്ത്രിയും ആഭ്യന്തര മന്ത്രിയും ഉടൻ ചർച്ച നടത്തുമെന്നാണ് വിവരം.

അതേസമയം, പുതിയ സർക്കാർ അധികാരത്തിലെത്തിയതിന് പിന്നാലെ ഐഎഎസ് തലത്തിലും സുപ്രധാന മാറ്റങ്ങൾ നടപ്പാക്കിയിരുന്നു. സസ്പെൻഷനിലായിരുന്ന ബി. അശോകിനെയും എൻ. പ്രശാന്തിനെയും വീണ്ടും നിയമിച്ചതാണ് പ്രധാന തീരുമാനം. ബി. അശോകിനെ ഉന്നത വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറിയായും എൻ. പ്രശാന്തിനെ കായിക-യുവജന ക്ഷേമ വകുപ്പിലെ സ്പെഷ്യൽ സെക്രട്ടറിയായും നിയമിച്ചു.

വിഴിഞ്ഞം തുറമുഖ എംഡി സ്ഥാനത്തുനിന്ന് ദിവ്യ എസ്. അയ്യരെ മാറ്റിയതും ശ്രദ്ധേയമായിരുന്നു. പിന്നീട് തദ്ദേശസ്വയംഭരണ വകുപ്പിന്റെ പ്രിൻസിപ്പൽ ഡയറക്ടറായാണ് ദിവ്യയെ നിയമിച്ചത്.