മേജർ രവിയുടെ പരാമർശം വസ്തുതാവിരുദ്ധമെന്ന് പിണറായി വിജയൻ; നിയമനടപടി സ്വീകരിക്കുമെന്ന് മുന്നറിയിപ്പ്

JUNE 9, 2026, 4:37 AM

തിരുവനന്തപുരം: ബിജെപി നേതാവ് മേജർ രവി നടത്തിയ പരാമർശങ്ങൾ വസ്തുതാവിരുദ്ധമാണെന്ന് വ്യക്തമാക്കി പ്രതിപക്ഷ നേതാവ് പിണറായി വിജയൻ.

ഇത്തരത്തിലുള്ള തെറ്റായ പ്രചാരണങ്ങൾ അപലപനീയമാണെന്നും, സാമൂഹിക മാധ്യമങ്ങളിലൂടെ പ്രചരിക്കുന്ന വ്യാജ വിവരങ്ങൾക്കെതിരെ ആവശ്യമായ നിയമനടപടികൾ സ്വീകരിക്കുമെന്നും അദ്ദേഹം വ്യക്തമാക്കി.

നടൻ സലിം കുമാറിന്റെ സംസ്കാരച്ചടങ്ങിൽ മുഖ്യമന്ത്രി വി.ഡി. സതീശൻ പങ്കെടുത്തതിനെ പ്രശംസിക്കുകയും, മുൻപ് നടൻ ഇന്നസെന്റിന്റെ നിര്യാണവേളയിൽ പിണറായി വിജയൻ എത്തിയ സാഹചര്യത്തെ വിമർശിക്കുകയും ചെയ്തായിരുന്നു മേജർ രവിയുടെ പ്രതികരണം.

രണ്ട് മുഖ്യമന്ത്രിമാരുടെ സമീപനങ്ങൾ തമ്മിലുള്ള വ്യത്യാസമാണ് കേരളം ഇപ്പോൾ കാണുന്നതെന്ന് മേജർ രവി അഭിപ്രായപ്പെട്ടിരുന്നു. ഇന്നസെന്റിന്റെ നിര്യാണസമയത്ത് വലിയ വാഹനവ്യൂഹത്തോടെയും സുരക്ഷാസംവിധാനങ്ങളോടെയും മുൻ മുഖ്യമന്ത്രി എത്തിയെന്നായിരുന്നു അദ്ദേഹത്തിന്റെ വിമർശനം. “കാരണഭൂതൻ” എന്ന പാട്ടും പാടിച്ച് താനാണ് വലിയവനെന്ന ചിന്തയോടെ നടക്കുന്ന മുൻ മുഖ്യമന്ത്രിയാണ് പിണറായി വിജയനെന്ന തരത്തിലുമായിരുന്നു മേജർ രവിയുടെ പരാമർശം.

അതേസമയം, സലിം കുമാറിന്റെ സംസ്കാരച്ചടങ്ങിൽ വി.ഡി. സതീശൻ ലളിതമായി എത്തി പങ്കെടുത്തത് മാതൃകാപരമായ നടപടിയാണെന്നും മേജർ രവി പറഞ്ഞിരുന്നു. ചടങ്ങിനിടെ ഷാൾ അണിയിക്കാനുള്ള ശ്രമം തടഞ്ഞതും, ഓൺലൈൻ മാധ്യമപ്രവർത്തകരുടെ തിരക്ക് നിയന്ത്രിക്കാൻ ഇടപെട്ടതും വി.ഡി. സതീശന്റെ നല്ല പൊതുപ്രവർത്തന ശൈലിയുടെ ഉദാഹരണമാണെന്നും അദ്ദേഹം അഭിപ്രായപ്പെട്ടു.

ഈ പരാമർശങ്ങൾക്ക് പിന്നാലെയാണ് മേജർ രവി ഉന്നയിച്ച ആരോപണങ്ങൾ വസ്തുതകൾക്ക് നിരക്കുന്നതല്ലെന്ന് ചൂണ്ടിക്കാട്ടി പിണറായി വിജയൻ രംഗത്തെത്തിയത്. വസ്തുതാവിരുദ്ധമായ പ്രചാരണങ്ങൾ നവമാധ്യമങ്ങളിലൂടെ പ്രചരിപ്പിക്കുന്നതിനെതിരെ നിയമപരമായ നടപടികൾ സ്വീകരിക്കുമെന്നും അദ്ദേഹം മുന്നറിയിപ്പ് നൽകി.