കുപ്രസിദ്ധ ഗുണ്ട, നിരവധി ക്രിമിനൽ കേസുകളിലെ പ്രതി ഭായ് നസീർ മരിച്ചു

JUNE 6, 2026, 6:05 AM

കൊച്ചി: നിരവധി ക്രിമിനൽ കേസുകളിലെ പ്രതിയും കുപ്രസിദ്ധ ഗുണ്ടയുമായ ഭായ് നസീർ അന്തരിച്ചു. വൃക്ക സംബന്ധമായ അസുഖത്തെ തുടർന്ന് ചികിത്സയിലിരിക്കെയായിരുന്നു മരണം. കൊച്ചിയിലെ സ്വകാര്യ ആശുപത്രിയിൽ വെന്റിലേറ്റർ സഹായത്തോടെ ചികിത്സയിൽ കഴിയുന്നതിനിടെയാണ് ഭായ് നസീറിന്റെ അന്ത്യം. ആരോഗ്യനില ഗുരുതരമായതിനെ തുടർന്ന് ദിവസങ്ങളായി ആശുപത്രിയിൽ പ്രവേശിപ്പിച്ചിരുന്നതായാണ് വിവരം.

കൊലപാതകശ്രമം, തട്ടിക്കൊണ്ടുപോകൽ, പിടിച്ചുപറി, ക്വട്ടേഷൻ പ്രവർത്തനങ്ങൾ ഉൾപ്പെടെ നിരവധി ക്രിമിനൽ കേസുകളിൽ ഭായ് നസീർ പ്രതിയായിരുന്നു. കൊച്ചി കേന്ദ്രീകരിച്ചുള്ള അധോലോക പ്രവർത്തനങ്ങളുമായി ബന്ധപ്പെട്ട് വർഷങ്ങളായി ഇയാളുടെ പേര് വാർത്തകളിൽ ഇടംപിടിച്ചിരുന്നു.

അടുത്തിടെ പുറത്തുവന്ന ചില വിവാദ കേസുകളുടെയും അന്വേഷണങ്ങളുടെയും പശ്ചാത്തലത്തിലും ഭായ് നസീറിന്റെ പേര് വീണ്ടും ചർച്ചയായിരുന്നു. വിവിധ കേസുകളിൽ പ്രതിയായിരുന്ന ഇയാൾ നിയമനടപടികൾ നേരിട്ടുവരികയായിരുന്നു.