ലഹരിക്കായി നിരോധിത മരുന്നുകൾ വാങ്ങിയത് കൊറിയർ വഴി

JULY 3, 2026, 6:38 PM

കോട്ടയം: ഓപ്പറേഷൻ തൂഫാൻ വീശിയടിച്ചതോടെ ലഹരി സംഘങ്ങൾ ഒന്നൊതുങ്ങിയിട്ടുണ്ട്.

മറ്റ് ലഹരി മരുന്നുകൾ കിട്ടാതായതോടെ ലഹരിക്കായി നിരോധിത മരുന്നുകൾ കൊറിയർ വഴി വാങ്ങിയ ഒരാൾ പിടിയിലായിരിക്കുകയാണ്.

കോട്ടയം പൊൻകുന്നം സ്വദേശി അമീർഖാൻ (27) ആണ് പിടിയിലായത്. ഡോക്ടറുടെ കുറിപ്പടിയില്ലാതെയായിരുന്നു പ്രതി ഡൽഹിയിൽ നിന്ന് കൊറിയർ വഴി നിരോധിത മരുന്നുകൾ എത്തിച്ചിരുന്നത്.

മൂന്നിരട്ടി ലാഭത്തിനാണ് ഇയാൾ കേരളത്തിൽ മരുന്ന് വിൽക്കുന്നത്. ഓപ്പറേഷൻ തൂഫാന്റെ ഭാഗമായ പരിശോധനയിലാണ് ഇയാളെ പിടികൂടിയത്.

ജിമ്മുകളും വടംവലി മത്സരങ്ങളും കേന്ദ്രീകരിച്ചായിരുന്നു പ്രതി മരുന്ന് വിൽപ്പന നടത്തിയിരുന്നത്. ഷെഡ്യുൾ എച്ച് പ്രകാരം വരുന്ന മരുന്നുകളാണ് ഇയാൾ വിതരണം നടത്തിയിരുന്നത്.

കഴിഞ്ഞ മൂന്ന് മാസത്തിനിടയിൽ ഒന്നേമുക്കാൽ ലക്ഷം രൂപയ്ക്ക് സമാനമായ മരുന്ന് ഇയാൾ ഡൽഹിയിൽ നിന്ന് വാങ്ങിയിട്ടുണ്ടെന്നും പൊലീസ് പറഞ്ഞു.