'ആരുടെയും തടവിലല്ല'; നിമിഷപ്രിയയുടെ അമ്മയുടെ വീഡിയോ സന്ദേശം പുറത്ത്

JULY 24, 2025, 11:42 AM

യെമനിലെ ജയിലിൽ കഴിയുന്ന മലയാളി നഴ്സ് നിമിഷ പ്രിയയുടെ വധശിക്ഷ ഒഴിവാക്കാൻ ശ്രമങ്ങൾ തുടരുകയാണ്. എന്നാൽ ഇതിനിടെ നിമിഷ പ്രിയയുടെ 'അമ്മ യമനിൽ വീട്ടുതടങ്കലിലാണ് എന്ന തരത്തിലുള്ള വാർത്തകൾ പുറത്തു വന്നിരുന്നു. ഇതിന് പ്രതികരണവുമായി എത്തിയിരിക്കുകയാണ് അമ്മയിപ്പോൾ.

താൻ യെമനില്‍ ആരുടെയും തടവിലല്ലെന്നാണ് നിമിഷ പ്രിയയുടെ അമ്മ വ്യക്തമാക്കുന്നത്. മകളെ യെമനിൽ വിട്ടിട്ട് നാട്ടിലേക്ക് വരാൻ കഴിയില്ല. ആരും നിർബന്ധിച്ച് യെമനിൽ പിടിച്ച് വെച്ചിട്ടില്ലെന്നും, അനാവശ്യ പ്രചാരണങ്ങൾ നടത്തരുതെന്നും ഫേസ്ബുക്ക് വീഡിയോയിലൂടെ അമ്മ പ്രേമകുമാരി ആവശ്യപ്പെട്ടു.

അതേസമയം നിമിഷ പ്രിയയുടെ ശിക്ഷാ ഇളവ് തേടിയുള്ള ശ്രമങ്ങൾക്കായി ഒരു വർഷത്തോളമായി പ്രേമകുമാരി യെമനിലാണ്. മകളുമായി തിരികെ നാട്ടിലെത്തണമെന്നാണ് ആഗ്രഹമെന്നും ഇവര്‍ കൂട്ടിച്ചേര്‍ത്തു. 2024 ഏപ്രിൽ 20 മുതൽ യെമനില്‍ കഴിയുകയാണ് നിമിഷ പ്രിയയുടെ അമ്മ.