ഡീന്‍ കുര്യാക്കോസ് മൂക്കാതെ പഴുത്ത നേതാവെന്ന് ഇടുക്കി ജില്ലാ കോണ്‍ഗ്രസ് പ്രസിഡന്‍റ് സി.പി.മാത്യു

MAY 15, 2026, 3:24 AM

ഇടുക്കി എംപി ഡീൻ കുര്യാക്കോസിനെതിരെ രൂക്ഷവിമർശനവുമായി ഇടുക്കി ജില്ലാ കോൺഗ്രസ് അധ്യക്ഷൻ സി.പി. മാത്യു രംഗത്ത്. ഡീൻ കുര്യാക്കോസ് 'മൂക്കാതെ പഴുത്ത നേതാവാണെന്നും' എംപിയെക്കൊണ്ട് പാർട്ടിക്ക് യാതൊരു പ്രയോജനവുമില്ലെന്നും അദ്ദേഹം തുറന്നടിച്ചു. സംഘടനയെ നയിക്കാൻ ആവശ്യമായ ഒരു സഹായവും എംപിയുടെ ഭാഗത്തുനിന്നുണ്ടാകുന്നില്ലെന്ന് മാത്യു മാധ്യമങ്ങളോട് പറഞ്ഞു.

മുൻ നേതാവ് പി.ടി. തോമസിന്റെ കഠിനാധ്വാനം കൊണ്ടാണ് ഡീൻ കുര്യാക്കോസ് എംപി സ്ഥാനത്തെത്തിയതെന്ന് സി.പി. മാത്യു ഓർമ്മിപ്പിച്ചു. 'എംപി എന്നാൽ മെമ്പർ ഓഫ് പാർലമെന്റ് ആണ്, അത് മെമ്പർ ഓഫ് പഞ്ചായത്ത് ആകരുത്' എന്നും അദ്ദേഹം പരിഹസിച്ചു.

വി.ഡി. സതീശനെ അനുകൂലിച്ച് പ്രകടനം നടത്തിയ പ്രവർത്തകർക്കെതിരെ ഡിസിസി എടുത്ത നടപടിയെ ഡീൻ കുര്യാക്കോസ് പരസ്യമായി ചോദ്യം ചെയ്തതാണ് ഈ വാക്പോരിലേക്ക് നയിച്ചത്.