തിരുവനന്തപുരം: സംസ്ഥാനത്തെ പൊതുജനാരോഗ്യ മേഖലയില് വിപ്ലവകരമായ മാറ്റങ്ങള് ലക്ഷ്യമിട്ട് ആരോഗ്യവകുപ്പ് സമഗ്ര പരിഷ്കാരങ്ങള് പ്രഖ്യാപിച്ചു. സംസ്ഥാനത്തെ ജില്ലാ, ജനറല് ആശുപത്രികളില് ഇനിമുതല് 24 മണിക്കൂറും വിദഗ്ധ ഡോക്ടര്മാരുടെ സേവനം ലഭ്യമാക്കാനാണ് സര്ക്കാര് തീരുമാനം. സാധാരണ ഒപി സമയത്തിന് ശേഷവും രാത്രികാലങ്ങളിലും ഒന്പത് മണിക്ക് ശേഷമുള്ള അടിയന്തര ഘട്ടങ്ങളിലും സ്പെഷ്യലിസ്റ്റ് സാന്നിധ്യം ഉറപ്പാക്കുന്നതോടെ രോഗികള്ക്കുണ്ടാകുന്ന വലിയ സാമ്പത്തിക ബാധ്യതകള്ക്കും ദീര്ഘദൂര യാത്രകള്ക്കും ശാശ്വത പരിഹാരമാകും.
സര്ജറി, ഓര്ത്തോ, ജനറല് മെഡിസിന്, ഗൈനക്കോളജി, പീഡിയാട്രിക്സ് എന്നീ അഞ്ച് പ്രധാന വിഭാഗങ്ങളിലാണ് ആദ്യഘട്ടത്തില് വിദഗ്ധരുടെ മുഴുവന് സമയ സേവനം ലഭ്യമാക്കുന്നത്. സാധാരണയായി താലൂക്ക്, ജില്ലാ ആശുപത്രികളില് നിന്നു ചെറിയ അസുഖങ്ങള്ക്ക് പോലും രോഗികളെ മെഡിക്കല് കോളജുകളിലേക്ക് റഫര് ചെയ്യുന്നത് വലിയ പ്രതിസന്ധി സൃഷ്ടിച്ചിരുന്നു. പുതിയ സംവിധാനം വരുന്നതോടെ അനാവശ്യ റഫറലുകള് പൂര്ണമായി ഒഴിവാക്കാനും മെഡിക്കല് കോളജുകളിലെ അമിത തിരക്ക് കുറയ്ക്കാനും സാധിക്കും. പദ്ധതിയുടെ സ്പെഷ്യല് ഓഫീസറായി ഡോ. ഷിനു കെ.എസിനെ ചുമതലപ്പെടുത്തി.
കൊല്ലം ജില്ലയിലെ പുനലൂര് താലൂക്ക് ആശുപത്രിയിലാണ് പദ്ധതിയുടെ ആദ്യഘട്ടം നടപ്പിലാക്കുന്നത്. ഇതിന്റെ ഭാഗമായി തിരുവനന്തപുരം ജനറല് ആശുപത്രിയിലും കൊല്ലം ജില്ലാ ആശുപത്രിയിലും 24 മണിക്കൂറും പ്രവര്ത്തിക്കുന്ന കാത്ത് ലാബ് സൗകര്യവും ഉടന് സജ്ജമാക്കും. അടുത്ത ആറുമാസത്തിനകം സംസ്ഥാനത്തുടനീളം ഈ പദ്ധതി പൂര്ണ തോതില് നിലവില് വരും. ചികിത്സാ സൗകര്യങ്ങള് വിപുലീകരിക്കുന്നതിനൊപ്പം ആശുപത്രികളുടെ പ്രവര്ത്തനം കൂടുതല് സുതാര്യവും രോഗീസൗഹൃദവുമാക്കാനും നിര്ദേശമുണ്ട്. പ്രാഥമികാരോഗ്യ കേന്ദ്രങ്ങള് മുതല് താലൂക്ക് ആശുപത്രികള് വരെയുള്ള എല്ലാ സര്ക്കാര് ആരോഗ്യ കേന്ദ്രങ്ങളിലും ഡോക്ടര്മാരുടെ പേരുവിവരങ്ങളും സേവന സമയവും പൊതുജനങ്ങള്ക്ക് കാണാവുന്ന രീതിയില് പരസ്യമായി പ്രദര്ശിപ്പിക്കണമെന്ന് ആരോഗ്യ മന്ത്രി കെ. മുരളീധരന് നിര്ദേശിച്ചു.
ആശുപത്രികളില് അനുവദിച്ച തസ്തികകള്, നിലവിലുള്ള ഒഴിവുകള്, ഓരോ ഡോക്ടറുടെയും ഒപി ദിവസങ്ങള് എന്നിവ വ്യക്തമാക്കുന്ന ബോര്ഡുകള് അടിയന്തരമായി സ്ഥാപിക്കാനാണ് പ്രിന്സിപ്പല് സെക്രട്ടറിക്ക് നിര്ദേശം നല്കിയിട്ടുള്ളത്. ഡോക്ടര്മാരുടെ അഭാവത്തെക്കുറിച്ച് പൊതുജനങ്ങളില് നിന്ന് വ്യാപക പരാതികള് ഉയര്ന്ന പശ്ചാത്തലത്തിലാണ് ഈ കര്ശന നടപടി. ഇതിലൂടെ സാധാരണക്കാര്ക്ക് സ്വകാര്യ ആശുപത്രികളിലെ ഭീമമായ ചെലവുകള് ഒഴിവാക്കി മികച്ച ചികിത്സ തങ്ങളുടെ തൊട്ടടുത്തുള്ള സര്ക്കാര് കേന്ദ്രങ്ങളില് നിന്നുതന്നെ ഉറപ്പാക്കാനാകും.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260119112532.webp)
-20260130064601.jpg)
-20260822045239.jpg)
