പി.എം ശ്രീ വിഷയത്തിൽ അന്തിമ തീരുമാനം മുഖ്യമന്ത്രിയുടേത്: വിദ്യാഭ്യാസമന്ത്രി എൻ. ഷംസുദ്ദീൻ

JUNE 16, 2026, 6:07 AM

തിരുവനന്തപുരം: പി.എം ശ്രീ പദ്ധതിയുമായി ബന്ധപ്പെട്ട വിഷയത്തിൽ അന്തിമ തീരുമാനമെടുക്കുന്നത് മുഖ്യമന്ത്രി ആയിരിക്കുമെന്ന് വ്യക്തമാക്കി വിദ്യാഭ്യാസമന്ത്രി എൻ. ഷംസുദ്ദീൻ. വിഷയത്തിൽ എല്ലാവരുമായി ചർച്ച ചെയ്ത് മുന്നോട്ട് പോകുമെന്നും അദ്ദേഹം വ്യക്തമാക്കി.

“മുഖ്യമന്ത്രിയാണ് പ്രധാന തീരുമാനം എടുക്കുന്നത്. എല്ലാവരുമായി ആലോചിച്ച് വിഷയത്തിൽ മുന്നോട്ട് പോകും. പി.എം ശ്രീയിൽ ഇപ്പോൾ ഉണ്ടായിരിക്കുന്ന പ്രശ്നങ്ങൾക്ക് തുടക്കം മുൻ സർക്കാരിന്റെ തീരുമാനങ്ങളിലാണ്,” എന്നും മന്ത്രി പറഞ്ഞു.

അതേസമയം, വിഷയത്തിൽ ലീഗ് നേതാവ് പി.കെ. കുഞ്ഞാലിക്കുട്ടി ഇതുവരെ വ്യക്തമായ നിലപാട് വ്യക്തമാക്കിയിട്ടില്ല. ആവശ്യമായ സമയത്ത് പ്രതികരിക്കാമെന്നാണ് അദ്ദേഹം പ്രതികരിച്ചതെന്ന് റിപ്പോർട്ടുണ്ട്. “ഇപ്പോൾ പ്രതികരിക്കാൻ താൽപര്യമില്ല, സമയമാകുമ്പോൾ പ്രതികരിക്കും” എന്നാണ് കുഞ്ഞാലിക്കുട്ടിയുടെ നിലപാട്.

ഇതിനിടെ, പി.എം ശ്രീ കരാറുമായി ബന്ധപ്പെട്ട വിഷയത്തിൽ യുഡിഎഫ് നിലപാട് വ്യക്തമാണെന്നും, കരാറിൽ നിന്ന് പിന്നോട്ടില്ലെന്നുമായിരുന്നു മന്ത്രി എൻ. ഷംസുദ്ദീൻ നേരത്തെ പറഞ്ഞിരുന്നത്.

മുൻ സർക്കാർ ഒപ്പിട്ട ധാരണാപത്രം മൂലം നിർത്തിവച്ച ഫണ്ടുകൾ ലഭിച്ചിരുന്നുവെന്നും, പിന്നീട് ഉണ്ടായ വിവാദങ്ങളെ തുടർന്ന് കരാറിൽ നിന്ന് പിന്മാറുന്നതായി അറിയിച്ച് കത്ത് നൽകിയിരുന്നുവെന്നും മന്ത്രി പറഞ്ഞു. നിലവിലെ ധാരണാപത്രത്തിന്റെ ഭാവി പരിശോധിക്കേണ്ടതുണ്ടെന്നും അദ്ദേഹം വ്യക്തമാക്കി.

വിഷയത്തിൽ പൊതുവിദ്യാഭ്യാസ സെക്രട്ടറിയുടെ റിപ്പോർട്ട് ലഭിച്ചിട്ടുണ്ടെന്നും, അത് പരിശോധിച്ച ശേഷം അന്തിമ തീരുമാനം എടുക്കുമെന്നും മന്ത്രി അറിയിച്ചു.