രണ്ടാമത് കറി ചോദിച്ചത് ഇഷ്ടപ്പെട്ടില്ല; പിന്നാലെ ഹോട്ടലിൽ ജീവനക്കാരും കഴിക്കാനെത്തിയവരും തമ്മിൽ കൂട്ടത്തല്ല്

MAY 21, 2025, 2:52 AM

കട്ടപ്പനയിൽ ഹോട്ടലിൽ കറിയെ ചൊല്ലി തുടങ്ങിയ തർക്കം കൂട്ടത്തല്ലിൽ അവസാനിച്ചതായി റിപ്പോർട്ട്. ഹോട്ടൽ ജീവനക്കാർക്കും കഴിക്കാനെത്തിയവർക്കും തല്ലിൽ പരിക്കേറ്റു. പുളിയൻമല റോഡിലെ അമ്പാടി ഹോട്ടലിലാണ് സംഭവം ഉണ്ടായത്.

ഹോട്ടലിന് സമീപത്തെ തുണിക്കടയിൽ വിവാഹ വസ്ത്രം വാങ്ങാനെത്തിയ വണ്ടിപ്പെരിയാർ മ്ലാമല സ്വദേശികളും ഹോട്ടൽ ജീവനക്കാരും തമ്മിലാണ് തർക്കവും തല്ലും ഉണ്ടായത് എന്നാണ് ലഭിക്കുന്ന വിവരം. ഭക്ഷണം കഴിക്കുന്നതിനിടെ രണ്ടാം തവണയും കറി ചോദിച്ചപ്പോൾ ഹോട്ടൽ ജീവനക്കാരൻ അപമര്യാദയായി പെരുമാറിയതാണ് പ്രശ്‌നങ്ങളുടെ തുടക്കമെന്നാണ് പോലീസ് വ്യക്തമാക്കുന്നത്.

തുടർന്ന് ഇരുകൂട്ടരും തമ്മിൽ വാക്കേറ്റമുണ്ടാകുകയും ഇത് കൂട്ടത്തല്ലിൽ കലാശിക്കുകയുമായിരുന്നു. ജഗ്ഗ് കൊണ്ടുള്ള ആക്രമണത്തിലാണ് രണ്ടു പേർക്ക് പരിക്കേറ്റത്.