കൊല്ലത്ത് യു.ഡി.എഫ് തരംഗമോ? 7 സീറ്റുകൾ വരെ പിടിച്ചെടുക്കുമെന്ന് ഡി.സി.സി

APRIL 13, 2026, 9:59 PM

കൊല്ലം: നിയമസഭാ തിരഞ്ഞെടുപ്പിൽ കൊല്ലം ജില്ലയിൽ വൻ മുന്നേറ്റം നടത്താൻ യു.ഡി.എഫിന് കഴിയുമെന്ന് ഡി.സി.സി.യുടെ പ്രാഥമിക വിലയിരുത്തൽ. ജില്ലയിലെ 11 മണ്ഡലങ്ങളിൽ അഞ്ച് മുതൽ ഏഴ് സീറ്റുകൾ വരെ യു.ഡി.എഫ് പക്ഷത്തേക്ക് വരുമെന്നാണ് കണക്കുകൂട്ടൽ.

ഇതിൽ അഞ്ച് സീറ്റുകളിൽ വിജയം ഉറപ്പാണെന്ന് ഡി.സി.സി പ്രസിഡന്റ് രാജേന്ദ്ര പ്രസാദ് വ്യക്തമാക്കി. യു.ഡി.എഫ് അനുകൂലമായ കാറ്റ് ശക്തമായി വീശിയാൽ ജില്ലയിൽ നിന്നുള്ള മൂന്ന് എൽ.ഡി.എഫ് മന്ത്രിമാർക്ക് പോലും കസേര നഷ്ടപ്പെട്ടേക്കാമെന്നും അദ്ദേഹം കൂട്ടിച്ചേർത്തു.

മുന്നണിക്ക് വലിയ ആത്മവിശ്വാസം നൽകുന്നത് പത്തനാപുരം, കൊട്ടാരക്കര മണ്ഡലങ്ങളിലെ അട്ടിമറി സാധ്യതകളാണ്. പതിറ്റാണ്ടുകളായി എൽ.ഡി.എഫ് കൈവശം വെച്ചിരിക്കുന്ന ഈ കോട്ടകൾ ഇത്തവണ തകരുമെന്നാണ് കോൺഗ്രസ് നേതൃത്വത്തിന്റെ പ്രതീക്ഷ.

കൂടാതെ ചടയമംഗലത്തും കടുത്ത പോരാട്ടത്തിലൂടെ വിജയം നേടാൻ കഴിയുമെന്ന് റിപ്പോർട്ടുകൾ സൂചിപ്പിക്കുന്നു. തദ്ദേശ സ്വയംഭരണ തിരഞ്ഞെടുപ്പിൽ കൊല്ലം കോർപ്പറേഷനിലടക്കം യു.ഡി.എഫ് ഉണ്ടാക്കിയ മുന്നേറ്റം നിയമസഭാ തിരഞ്ഞെടുപ്പിലും പ്രതിഫലിക്കുമെന്നാണ് പാർട്ടിയുടെ കണക്കുകൂട്ടൽ.

ഭരണവിരുദ്ധ വികാരവും വികസന മുരടിപ്പും ജനങ്ങൾക്കിടയിൽ ചർച്ചയായിട്ടുണ്ടെന്നും, ഇത് വോട്ടായി മാറുമെന്നും രാജേന്ദ്ര പ്രസാദ് പറഞ്ഞു. വോട്ടെണ്ണൽ പൂർത്തിയാകുമ്പോൾ കൊല്ലം ജില്ലയുടെ രാഷ്ട്രീയ ചിത്രം മാറുമെന്നും ജില്ലയിലെ പ്രമുഖരായ ഇടതു നേതാക്കൾക്ക് തിരിച്ചടി നേരിടുമെന്നും ഡി.സി.സി പ്രത്യാശ പ്രകടിപ്പിച്ചു.