ചങ്ങനാശേരിയിലെ കൂട്ട ആത്മഹത്യ, കൂടുതൽ വിവരങ്ങൾ പുറത്ത്

NOVEMBER 1, 2026, 6:45 PM

ചങ്ങനാശേരി : ചങ്ങനാശ്ശേരി എസ്ബി കോളേജിനടുത്ത് ഒരു കുടുംബത്തിലെ 3 പേരെ മരിച്ചനിലയിൽ കണ്ടെത്തിയ സംഭവത്തിൽ കൂടുതൽ വിവരങ്ങൾ പുറത്ത്. മകൻ ആത്മഹത്യ ചെയ്യാൻ സാധ്യതയുണ്ടെന്നും അതിനാൽ മകനെ നന്നായി നോക്കണമെന്നും ബന്ധുക്കൾക്ക് എഴുതിയ ആത്മഹത്യക്കുറിപ്പിൽ ദമ്പതികൾ പറയുന്നു.

ചങ്ങനാശേരി കരിങ്ങട വീട്ടിൽ സാജു ആന്റണി (64), ഭാര്യ അനു (59), മകൻ സവിൻ (33) എന്നിവരാണ് മരിച്ചത്. അച്ഛനും അമ്മയും മരിച്ചതു കൊണ്ട് സവിൻ ആത്മഹത്യ ചെയ്തതെന്നാണ് പൊലീസിന്റെ നിഗമനം. സാമ്പത്തിക പ്രതിസന്ധിയാണ് മരണ കാരണമെന്നാണ് പ്രാഥമിക നിഗമനം. തിങ്കളാഴ്ച ബാങ്ക് രേഖകളും ഫോണുകളും പരിശോധിക്കുമെന്ന് പൊലീസ് പറഞ്ഞു.

സാജുവും ഭാര്യ അനുവും കിടപ്പുമുറിയിൽ തൂങ്ങിമരിച്ച നിലയിലായിരുന്നു. സവിൻ അടുക്കളയുടെ സമീപത്തെ വർക്ക് ഏരിയയിലാണ് തൂങ്ങിമരിച്ചത്. മാതാപിതാക്കൾ മുറിക്കുള്ളിൽ തൂങ്ങിമരിച്ചു കിടക്കുന്നതു കണ്ട സവിൻ പിന്നീട് തൂങ്ങിമരിക്കുകയായിരുന്നുവെന്നു കരുതുന്നു. രണ്ടു വർഷം മുൻപാണ് സവിന്റെ വിവാഹം കഴിഞ്ഞത്. ഭാര്യ അനുമോൾ കുവൈത്തിൽ ജോലി ചെയ്യുകയാണ്. സവിൻ മുൻപ് ഐടി മേഖലയിലാണ് ജോലി ചെയ്തിരുന്നത്.

ഭാര്യയും ഭർത്താവും എഴുതിയ 2 ആത്മഹത്യ കുറിപ്പുകളാണ് പൊലീസ് കണ്ടെടുത്തത്. രണ്ടിലും മകനെക്കുറിച്ചുള്ള ആശങ്കകളാണ് പങ്കുവച്ചിരിക്കുന്നത്. ഭാര്യയും ഭർത്താവും നല്ല വസ്ത്രങ്ങൾ ധരിച്ചാണ് ആത്മഹത്യ ചെയ്തത്. മകന്റെ ശരീരത്തിൽ വീട്ടിൽ ധരിക്കുന്ന വസ്ത്രങ്ങളാണ് ഉണ്ടായിരുന്നത്. ചങ്ങനാശേരി എസ്ബി കോളജിന് എതിർവശത്ത് എംസി റോഡിനു സമീപത്താണ് വീട്. മുകൾനില കോളജ് വിദ്യാർഥികൾക്ക് ഹോംസ്റ്റേയായി നൽകിയിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്