6.69 കോടി രൂപയുടെ സ്വത്ത്; മുഖ്യമന്ത്രിയാകുന്ന വി ഡി സതീശന്റെ ആസ്തിയും ബാധ്യതകളും ഇങ്ങനെ

MAY 14, 2026, 4:41 AM

തിരുവനന്തപുരം: 11 ദിവസത്തെ നീണ്ട കാത്തിരിപ്പിനും ചർച്ചകൾക്കും ഒടുവിൽ വി ഡി സതീശനെ കേരളത്തിന്റെ മുഖ്യമന്ത്രിയായി കോൺഗ്രസ് ഹൈക്കമാൻഡ് പ്രഖ്യാപിച്ചിരിക്കുകയാണ്. കെ സി വേണുഗോപാൽ, രമേശ് ചെന്നിത്തല എന്നിവരുടെ പേരുകളും അവസാനഘട്ട ചർച്ചകളിൽ സജീവമായിരുന്നെങ്കിലും യുഡിഎഫിന്റെ മുഖമായി തെരഞ്ഞെടുപ്പിനെ നയിച്ചതും എൽഡിഎഫിനെതിരെ ശക്തമായ പ്രചാരണം നടത്തിയതുമാണ് വി ഡി സതീശന് അനുകൂലമായ പ്രധാന ഘടകങ്ങളായി വിലയിരുത്തപ്പെട്ടത്.

മുഖ്യമന്ത്രിമാരുടെ ആസ്തിയും ബാധ്യതകളും പൊതുജന ശ്രദ്ധ നേടുന്ന വിഷയങ്ങളിലൊന്നാണ്. നിയുക്ത മുഖ്യമന്ത്രിയായ വി ഡി സതീശൻ തെരഞ്ഞെടുപ്പ് സത്യവാങ്മൂലത്തിൽ നൽകിയ വിവരങ്ങൾ പ്രകാരം, അദ്ദേഹത്തിനും ഭാര്യ ലക്ഷ്മിപ്രിയക്കും ചേർന്ന് ഏകദേശം 6.69 കോടി രൂപയുടെ സ്ഥാവര-ജംഗമ സ്വത്തുക്കളുണ്ട് എന്നാണ് റിപ്പോർട്ടുകൾ വ്യക്തമാക്കുന്നത്.

വി ഡി സതീശന്റെ പേരിൽ 53,82,286 രൂപയുടെ ബാങ്ക് നിക്ഷേപമുണ്ട്. ഭാര്യ ലക്ഷ്മിപ്രിയയുടെ പേരിൽ 68,45,474 രൂപയുടെ ബാങ്ക് നിക്ഷേപവും രേഖപ്പെടുത്തിയിട്ടുണ്ട്. സതീശന്റെ കൈവശം 64,000 രൂപ പണമായും 25,000 രൂപയുടെ ബാങ്ക് ഓഹരികളും 35 ഗ്രാം സ്വർണവും ഉണ്ടെന്ന് സത്യവാങ്മൂലത്തിൽ പറയുന്നു.

അതേസമയം, ഭാര്യ ലക്ഷ്മിപ്രിയയുടെ പേരിൽ 1128 ഗ്രാം സ്വർണമുണ്ട്. നിലവിലെ വിപണി വില പ്രകാരം ഇതിന്റെ മൂല്യം ഏകദേശം 1,70,82,074 രൂപ വരും. വീടും സ്ഥലവും ഉൾപ്പെടെ വി ഡി സതീശന്റെ പേരിലുള്ള സ്ഥാവര സ്വത്തുക്കളുടെ ആകെ മൂല്യം 2,42,63,816 രൂപയാണ്.

ബാധ്യതകളുടെ കാര്യത്തിൽ, വി ഡി സതീശന് സ്വന്തം പേരിൽ 24,00,635 രൂപയുടെ കടബാധ്യതയുണ്ട്. കാർ ലോൺ ഉൾപ്പെടെയുള്ള ബാങ്ക് വായ്പകളാണ് ഇതിൽ ഉൾപ്പെടുന്നത്. ഭാര്യ ലക്ഷ്മിപ്രിയയുടെ പേരിൽ 17,45,000 രൂപയുടെ ബാധ്യതയും രേഖപ്പെടുത്തിയിട്ടുണ്ട്.

വി ഡി സതീശന്റെ പ്രധാന വരുമാന സ്രോതസ്സായി രേഖപ്പെടുത്തിയിരിക്കുന്നത് കേരളത്തിലെ പ്രതിപക്ഷ നേതാവെന്ന നിലയിൽ ലഭിച്ച ശമ്പളവും അലവൻസുകളുമാണ്. കൂടാതെ അഭിഭാഷകനായും അദ്ദേഹം മുൻപ് വരുമാനം നേടിയിരുന്നു.