ന്യൂഡൽഹി: യു.എസ് സ്റ്റേറ്റ് സെക്രട്ടറി മാർക്കോ റൂബിയോ ഒക്ടോബറിൽ വീണ്ടും ഇന്ത്യ സന്ദർശിച്ചേക്കും. ഡിസംബറിൽ യു.എസിൽ വെച്ച് നടക്കുന്ന ക്വാഡ് ഉച്ചകോടിയുടെ മുന്നോടിയായാണ് സന്ദർശനം. ഇന്ത്യ, യു.എസ്, ജപ്പാൻ, ഓസ്ട്രേലിയ എന്നീ രാജ്യങ്ങൾ ഉൾപ്പെടുന്ന ക്വാഡ് ഉച്ചകോടി ഡിസംബർ 14, 15 തീയതികളിൽ ഫ്ലോറിഡയിലെ ട്രംപ് നാഷണൽ ഡോറൽ മിയാമിയിൽ നടക്കാനിരിക്കുന്ന ജി20 (G20) ഉച്ചകോടിയുടെ ഭാഗമായി നടന്നേക്കുമെന്നാണ് റിപ്പോർട്ടുകൾ.
ഉച്ചകോടിക്ക് മുന്നോടിയായി നാല് രാജ്യങ്ങളിലെയും ഉന്നത ഉദ്യോഗസ്ഥർ തമ്മിലുള്ള ചർച്ചകൾ സജീവമാക്കിയിട്ടുണ്ട്. കഴിഞ്ഞ ദിവസം ഡൽഹിയിൽ വിദേശകാര്യ സെക്രട്ടറി വിക്രം മിസ്രിയുടെ നേതൃത്വത്തിൽ ക്വാഡ് ഷെർപ്പമാരുടെ ഉന്നതതല യോഗം നടന്നു. യു.എസ് സ്ഥാനപതി സെർജിയോ ഗോർ, ഓസ്ട്രേലിയൻ ഡെപ്യൂട്ടി സെക്രട്ടറി എല്ലി ലോസൺ, ജപ്പാൻ വിദേശകാര്യ പ്രതിനിധി ഹിരോയുകി നമസു എന്നിവർ യോഗത്തിൽ പങ്കെടുത്തു.
സമുദ്ര സുരക്ഷ, സാമ്പത്തിക പുരോഗതി, നിർണ്ണായക സാങ്കേതികവിദ്യകൾ, ഇൻഡോ-പസഫിക് മേഖലയിലെ സുരക്ഷ എന്നിവ യോഗത്തിൽ പ്രധാന ചർച്ചാവിഷയമായി. മേയ് മാസത്തിൽ ന്യൂഡൽഹിയിൽ നടന്ന ക്വാഡ് വിദേശകാര്യ മന്ത്രിമാരുടെ യോഗത്തിലെ തീരുമാനങ്ങൾ വിലയിരുത്താനും അടുത്ത ഘട്ട നയതന്ത്ര നീക്കങ്ങൾ ആസൂത്രണം ചെയ്യാനുമാണ് കൂടിക്കാഴ്ച നടത്തിയത്.
പ്രസിഡന്റ് ഡൊണാൾഡ് ട്രംപിന്റെ ഇന്ത്യ-പാക് മധ്യസ്ഥതയെക്കുറിച്ചുള്ള മുൻ പ്രസ്താവനകളും വ്യാപാര തീരുവയിലെ തർക്കങ്ങളും കാരണം ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ നേരിയ തണുപ്പൻ മനോഭാവം നിലനിന്നിരുന്നെങ്കിലും, നിലവിലെ നയതന്ത്ര ചർച്ചകൾ ബന്ധം കൂടുതൽ ശക്തമാക്കാൻ സഹായിക്കുമെന്നാണ് വിലയിരുത്തൽ.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260904092419.jpg)
