ബെംഗളൂരു: കെംപെഗൗഡ അന്താരാഷ്ട്ര വിമാനത്താവളം വഴി 12.56 കോടി രൂപ വിലമതിക്കുന്ന 14.2 കിലോ സ്വര്‍ണം കടത്തിയതിന് അറസ്റ്റിലായ കന്നഡ നടി രന്യ റാവുവിന്റെ ബെംഗളൂരുവിലെ വസതിയില്‍ ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡിആര്‍ഐ) റെയ്ഡ് നടത്തി. ഇവരുടെ ലാവെല്ലെ റോഡിലെ വീട്ടില്‍ നടത്തിയ പരിശോധനയില്‍ 2.06 കോടിയുടെ സ്വര്‍ണാഭരണങ്ങളും 2.67 കോടി രൂപയും കണ്ടെടുത്തു. 

ഡിആര്‍ഐയുടെ കണക്കനുസരിച്ച് 17.29 കോടി രൂപ പിടിച്ചെടുത്തതോടെ ബെംഗളൂരു വിമാനത്താവളത്തില്‍ സമീപകാലത്ത് നടന്ന ഏറ്റവും വലിയ സ്വര്‍ണക്കടത്തു കേസുകളില്‍ ഒന്നായി ഇത് മാറി. 

ഇടയ്ക്കിടെ അന്താരാഷ്ട്ര യാത്രകള്‍ നടത്തിയ 32 കാരിയായ രന്യ ഡിആര്‍ഐയുടെ റഡാറില്‍ ആയിരുന്നു. 15 ദിവസത്തിനുള്ളില്‍ നടി നാലു തവണ ദുബായില്‍ എത്തിയതായി ഉദ്യോഗസ്ഥര്‍ കണ്ടെത്തി. ഇതിന്റെ അടിസ്ഥാനത്തില്‍, ഒരു ടാര്‍ഗെറ്റഡ് ഓപ്പറേഷന്‍ ആരംഭിച്ചു. മാര്‍ച്ച് 3 ന് ദുബായില്‍ നിന്ന് എമിറേറ്റ്‌സ് വിമാനം വഴി എത്തിയപ്പോള്‍ രന്യയെ തടഞ്ഞു.

വിശദമായ അന്വേഷണത്തില്‍ വസ്ത്രത്തില്‍ ഒളിപ്പിച്ച സ്വര്‍ണക്കട്ടികള്‍ കണ്ടെത്തി, തുടര്‍ന്ന് നടിയെ കസ്റ്റഡിയിലെടുത്തു. ഇവരുടെ ജാക്കറ്റിനുള്ളില്‍ വന്‍തോതില്‍ കള്ളക്കടത്ത് സ്വര്‍ണം ഒളിപ്പിച്ചിരുന്നതായി റിപ്പോര്‍ട്ടുകള്‍ സൂചിപ്പിക്കുന്നു.

കര്‍ണാടക സ്റ്റേറ്റ് പോലീസ് ഹൗസിംഗ് കോര്‍പ്പറേഷന്‍ ഡിജിപിയായി സേവനമനുഷ്ഠിക്കുന്ന മുതിര്‍ന്ന ഐപിഎസ് ഉദ്യോഗസ്ഥന്‍ രാമചന്ദ്ര റാവുവിന്റെ വളര്‍ത്തുമകളാണ് നടി. കസ്റ്റംസ് പരിശോധനയില്‍ നിന്ന് രക്ഷപ്പെടാന്‍ അവള്‍ തന്റെ ബന്ധങ്ങള്‍ പ്രയോജനപ്പെടുത്താന്‍ ശ്രമിച്ചിരുന്നു. 

2014ല്‍ സുദീപ് നിര്‍മ്മിച്ച് അഭിനയിച്ച മാണിക്യ എന്ന കന്നഡ ചിത്രത്തിലൂടെയാണ് രന്യയുടെ സിനിമ അരങ്ങേറ്റം.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്