അഭ്യൂഹങ്ങൾക്ക് വിരാമം; ഒടുവിൽ രാജി പ്രഖ്യാപിച്ചു അണ്ണാമലൈ

JUNE 5, 2026, 12:36 AM

ചെന്നൈ: തമിഴ്‌നാട് ബിജെപിയിൽ നിർണായക രാഷ്ട്രീയ നീക്കമായി സംസ്ഥാന അധ്യക്ഷൻ കെ. അണ്ണാമലൈ പാർട്ടിയുടെ പ്രാഥമിക അംഗത്വത്തിൽ നിന്ന് രാജിവെച്ചു. അണ്ണാമലൈയുടെ രാജി ദേശീയ നേതൃത്വം അംഗീകരിച്ചതായും ബിജെപി ദേശീയ അധ്യക്ഷൻ നിതിൻ നവീൻ അറിയിച്ചതായും റിപ്പോർട്ടുകളുണ്ട്.

കഴിഞ്ഞ കുറച്ച് ദിവസങ്ങളായി അണ്ണാമലൈ പാർട്ടി വിടുമെന്ന തരത്തിലുള്ള അഭ്യൂഹങ്ങൾ രാഷ്ട്രീയ വൃത്തങ്ങളിൽ ശക്തമായിരുന്നു. ഇന്നത്തെ പ്രഖ്യാപനത്തോടെ ആ ചർച്ചകൾക്ക് വിരാമമായിരിക്കുകയാണ്.

ജന്മദിനാശംസകൾക്ക് നന്ദി അറിയിച്ച് കഴിഞ്ഞ ദിവസം അണ്ണാമലൈ സമൂഹമാധ്യമങ്ങളിൽ പങ്കുവെച്ച കുറിപ്പും ശ്രദ്ധ നേടിയിരുന്നു. തന്റെ സന്ദേശത്തിൽ ബിജെപിയെയോ പാർട്ടി നേതൃത്വത്തെയോ കുറിച്ച് പരാമർശിക്കാതിരുന്നത് രാഷ്ട്രീയ നിരീക്ഷകരുടെ ശ്രദ്ധ ആകർഷിച്ചിരുന്നു. തമിഴ്‌നാടിന്റെ ഭാവിക്കായി പ്രവർത്തിക്കാനുള്ള പ്രതിബദ്ധത അദ്ദേഹം കുറിപ്പിൽ ആവർത്തിക്കുകയും ജനങ്ങളുടെ പിന്തുണയ്ക്ക് നന്ദി അറിയിക്കുകയും ചെയ്തിരുന്നു.

മുൻ ഐപിഎസ് ഉദ്യോഗസ്ഥനായ അണ്ണാമലൈ, രാജി പ്രഖ്യാപനത്തിന് മുമ്പ് ദില്ലിയിൽ കേന്ദ്ര ആഭ്യന്തരമന്ത്രി അമിത് ഷാ, ബിജെപി ദേശീയ അധ്യക്ഷൻ നിതിൻ നവീൻ, ബി.എൽ. സന്തോഷ് എന്നിവരുമായി കൂടിക്കാഴ്ച നടത്തിയതായും റിപ്പോർട്ടുകളുണ്ട്. തമിഴ്‌നാട്ടിലെ രാഷ്ട്രീയ സാഹചര്യം ഉൾപ്പെടെയുള്ള വിഷയങ്ങൾ അദ്ദേഹം കേന്ദ്ര നേതൃത്വവുമായി ചർച്ച ചെയ്തതായാണ് വിവരം.

തമിഴ്‌നാട്ടിലെ ബിജെപിയുടെ രാഷ്ട്രീയ ഭാവിയെ സ്വാധീനിക്കാവുന്ന സംഭവവികാസമായാണ് അണ്ണാമലൈയുടെ രാജിയെ രാഷ്ട്രീയ നിരീക്ഷകർ വിലയിരുത്തുന്നത്.