സിജെപി സ്ഥാപകൻ അഭിജീത് ദീപ്കെയ്ക്കെതിരെ ഗുരുതര ആരോപണവുമായി ഇൻഫ്ലുവൻസർ; അറസ്റ്റാവശ്യപ്പെട്ട് ഫൈസാൻ അൻസാരി

AUGUST 3, 2026, 10:59 PM

ഡൽഹി: കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദീപ്കെയ്ക്കും അദ്ദേഹത്തിന്റെ അനുയായികൾക്കുമെതിരെ ഗുരുതര ആരോപണങ്ങളുമായി സോഷ്യൽ മീഡിയ ഇൻഫ്ലുവൻസർ ഫൈസാൻ അൻസാരി. മഹാരാഷ്ട്രയിൽ വെച്ച് അഭിജീത് ദീപ്കെയുടെ ആളുകൾ തന്നെ ക്രൂരമായി മർദിച്ചതായി ആരോപിച്ച് ഡൽഹി പോലീസിൽ രേഖാമൂലം പരാതി നൽകിയതായി അൻസാരി അറിയിച്ചു.

മഹാരാഷ്ട്രയിലെ പുണെയിലും ഔറംഗാബാദിലുമായി തനിക്ക് നേരെ ആക്രമണമുണ്ടായെന്നും, സംഭവങ്ങളുമായി ബന്ധപ്പെട്ട് രണ്ട് കേസുകൾ നിലവിലുണ്ടെന്നും പരാതിയിൽ പറയുന്നു. ആക്രമണത്തിന് പിന്നിൽ അഭിജീത് ദീപ്കെയാണെന്നതിന് വ്യക്തമായ തെളിവുകളുണ്ടെന്നും, അദ്ദേഹത്തെ ഉടൻ അറസ്റ്റ് ചെയ്യണമെന്നും അൻസാരി ഡൽഹി പോലീസിനോട് ആവശ്യപ്പെട്ടു. വ്യക്തിപരമായ നേട്ടങ്ങൾക്കായാണ് ദീപ്കെ പ്രവർത്തിക്കുന്നതെന്നും അദ്ദേഹം ആരോപിച്ചു.

സമീപകാലത്ത് ഡൽഹിയിൽ പ്രതിഷേധം നടത്തിയ ആക്ടിവിസ്റ്റ് സോനം വാങ്ചുക്കിനെ കരുതൽ തടങ്കലിലാക്കിയ ഡൽഹി സർക്കാരിന്റെയും പോലീസിന്റെയും നടപടിയെ അൻസാരി പ്രശംസിച്ചു. കൃത്യസമയത്ത് നടത്തിയ ഇടപെടലാണ് തലസ്ഥാനത്തെ ക്രമസമാധാന നില വഷളാകാതെ സംരക്ഷിച്ചതെന്നും അദ്ദേഹം അഭിപ്രായപ്പെട്ടു.

അതേസമയം, രാജ്യത്തെ പരീക്ഷാ ക്രമക്കേടുകൾക്കെതിരെ സിജെപി നടത്തുന്ന പ്രതിഷേധങ്ങളെ ബംഗ്ലാദേശിലെയും നേപ്പാളിലെയും ഭരണവിരുദ്ധ സമരങ്ങളുമായി താരതമ്യം ചെയ്യുന്നതിനെ അഭിജീത് ദീപ്കെ തള്ളി. തങ്ങളുടെ പ്രതിഷേധം മഹാത്മാ ഗാന്ധിയുടെ അഹിംസാ മാർഗ്ഗം പിന്തുടരുന്നതാണെന്നും, പോലീസിന്റെ മർദനമേറ്റിട്ടും വിദ്യാർത്ഥികൾ സമാധാനപരമായാണ് ജന്തർ മന്തറിൽ പ്രതിഷേധിച്ചതെന്നും അദ്ദേഹം വ്യക്തമാക്കി.

സിജെപിയുടെ പ്രതിച്ഛായ തകർക്കാനുള്ള ശ്രമത്തിന്റെ ഭാഗമായാണ് ഇത്തരം ആരോപണങ്ങളും താരതമ്യങ്ങളും ഉയരുന്നതെന്നും ദീപ്കെ ആരോപിച്ചു.

അതേസമയം, ഫൈസാൻ അൻസാരി ഉന്നയിച്ച ആരോപണങ്ങളുമായി ബന്ധപ്പെട്ട് അഭിജീത് ദീപ്കെയുടെയോ സിജെപിയുടെയോ ഭാഗത്ത് നിന്ന് ഔദ്യോഗിക പ്രതികരണം ലഭ്യമായിട്ടില്ല.