'ഡെമോക്രാറ്റുകള്‍ ജയിച്ചാല്‍ 1929 മോഡല്‍ മാന്ദ്യം; ഞങ്ങള്‍ ജയിച്ചാല്‍ മുതിര്‍ന്ന പൗരന്മാര്‍ക്ക് 5,000 ഡോളര്‍': പ്രഖ്യാപനവുമായി ട്രംപ്

OCTOBER 4, 2026, 3:31 AM

ഒഹായോ: വരാനിരിക്കുന്ന മിഡ് ടേം തിരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിക്ക് വിജയിക്കാനായില്ലെങ്കില്‍ അമേരിക്ക 1929-ലേതിന് സമാനമായ വലിയ സാമ്പത്തിക മാന്ദ്യത്തിലേക്ക് കൂപ്പുകുത്തുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. ഒഹായോയില്‍ നടന്ന പ്രചാരണ റാലിയില്‍ സംസാരിക്കവേയായിരുന്നു ട്രംപിന്റെ ഈ മുന്നറിയിപ്പ്. തിരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടി ജനപ്രതിനിധി സഭയിലും യു.എസ് സെനറ്റിലും ഭൂരിപക്ഷം നേടുകയാണെങ്കില്‍ രാജ്യത്തെ എല്ലാ മുതിര്‍ന്ന പൗരന്മാര്‍ക്കും 5,000 ഡോളര്‍ വീതം നല്‍കുമെന്നും ട്രംപ് പ്രഖ്യാപിച്ചു.

താരിഫുകളില്‍ നിന്നും മറ്റ് സാമ്പത്തിക സ്രോതസ്സുകളില്‍ നിന്നും രാജ്യത്തിന് വന്‍ തുക വരുമാനമായി ലഭിക്കുന്നുണ്ടെന്നും, അതിനാല്‍ വിജയിച്ചാല്‍ മുതിര്‍ന്ന പൗരന്മാര്‍ക്ക് ഈ തുക നല്‍കാന്‍ സാധിക്കുമെന്നും അദ്ദേഹം അവകാശപ്പെട്ടു. അതേസമയം, ഡെമോക്രാറ്റുകള്‍ അധികാരത്തില്‍ വന്നാല്‍ രാജ്യത്തിന്റെ സാമ്പത്തിക അടിത്തറ തകരുമെന്ന് അദ്ദേഹം കുറ്റപ്പെടുത്തി.

കഴിഞ്ഞ ഭരണകൂടത്തിന്റെ കാലത്ത് ഒബാമകെയര്‍ വഴി ഏകദേശം 10 ലക്ഷത്തോളം കുടുംബങ്ങളില്‍ നിന്ന് ഡെമോക്രാറ്റുകള്‍ അധിക തുക ഈടാക്കിയെന്ന് ട്രംപ് ആരോപിച്ചു. ഈ തുക തിരികെ നല്‍കുന്നതിന്റെ ഭാഗമായി 500 ഡോളറിന്റെ റീഫണ്ട് ചെക്കുകള്‍ അയച്ചിട്ടുണ്ടെന്നും, ഒഹായോയിലെ 70,000 കുടുംബങ്ങള്‍ക്ക് ഇതിന്റെ പ്രയോജനം ലഭിക്കുമെന്നും അദ്ദേഹം പറഞ്ഞു. ഇതിനുപുറമേ യു.എസ് സൈനികര്‍ക്ക് 1,776 ഡോളര്‍ വീതം നല്‍കിയ കാര്യവും അദ്ദേഹം ചൂണ്ടിക്കാട്ടി.

ഡാറ്റാ സെന്ററുകള്‍ കാരണം സാധാരണക്കാരുടെ വൈദ്യുതി നിരക്ക് ഉയരുന്നത് തടയുന്നതിനായി സെനറ്റര്‍ ജോണ്‍ ഹൂസ്റ്റണ്‍ അവതരിപ്പിച്ച റേറ്റ് പേയര്‍ പ്രൊട്ടക്ഷന്‍ ആക്ട് ബില്ലിനെ ഡെമോക്രാറ്റുകള്‍ തടഞ്ഞതിനെ ട്രംപ് വിമര്‍ശിച്ചു. റിപ്പബ്ലിക്കന്‍മാര്‍ വിജയിച്ച് അധികാരത്തില്‍ വന്നാല്‍ 24 മണിക്കൂറിനുള്ളില്‍ ഈ ബില്ലില്‍ ഒപ്പുവെക്കുമെന്ന് ട്രംപ് ഉറപ്പുനല്‍കി.

ആഗോളതാപനം എന്നത് തെറ്റായ പ്രചാരണമാണെന്ന് വാദിച്ച ട്രംപ്, വാദങ്ങള്‍ പൊളിഞ്ഞപ്പോഴാണ് ഡെമോക്രാറ്റുകള്‍ കാലാവസ്ഥാ വ്യതിയാനം എന്ന പദം ഉപയോഗിക്കാന്‍ തുടങ്ങിയതെന്ന് പരിഹസിച്ചു. ഡെമോക്രാറ്റുകള്‍ നികുതികള്‍ 5 ട്രില്യണ്‍ ഡോളര്‍ വരെ വര്‍ദ്ധിപ്പിക്കാനും, അതിര്‍ത്തികള്‍ തുറന്നുകൊടുക്കാനും, നിയമവിരുദ്ധ കുടിയേറ്റക്കാര്‍ക്ക് വോട്ടവകാശം നല്‍കി തിരഞ്ഞെടുപ്പ് അട്ടിമറിക്കാനും ശ്രമിക്കുകയാണെന്നും ട്രംപ് ആരോപിച്ചു.