ഭർത്താവിനൊപ്പം അവധിക്കാല യാത്രയ്ക്കായി മുസ്സൂറിയിലെത്തി; ഹോംസ്റ്റേ മുറിയിൽ ഐടി ജീവനക്കാരി ദുരൂഹ സാഹചര്യത്തിൽ മരിച്ച നിലയിൽ

JUNE 16, 2026, 5:50 AM

ഡൽഹി: ഭർത്താവിനൊപ്പം അവധിക്കാല യാത്രയ്ക്കായി മുസ്സൂറിയിലെത്തിയ 27 വയസ്സുകാരിയായ ഐടി ജീവനക്കാരിയെ ഹോംസ്റ്റേ മുറിയിൽ മരിച്ച നിലയിൽ കണ്ടെത്തി. ഡൽഹി കിദ്വായ് നഗർ ഈസ്റ്റിൽ താമസിക്കുന്ന പി. രാധാ ഗായത്രിയാണ് മരിച്ച നിലയിൽ കണ്ടെത്തിയത്. ഗുരുഗ്രാമിൽ ടെക് കമ്പനിയിൽ ജോലി ചെയ്തുവരികയായിരുന്നു.

പോലീസ് നൽകുന്ന വിവരങ്ങൾ പ്രകാരം, ഗായത്രിയും ഭർത്താവും പൂനെയിൽ ജോലി ചെയ്യുന്ന സൗമ്യ ശ്രീചരണം എന്ന വ്യക്തിയുമാണ് ജൂൺ 13-ന് ഡൽഹിയിൽ നിന്ന് ഋഷികേശിലേക്ക് യാത്ര ആരംഭിച്ചത്. തുടർന്ന് ജൂൺ 14-ന് രാത്രി 11.30ഓടെ മുസ്സൂറി–ധനോൾട്ടി റോഡിലെ ‘കിയാന ഹോംസ്റ്റേ’യിലെ ‘ബ്ലിസ്’ മുറിയിൽ ഇവർ താമസമാരംഭിച്ചു.

പിറ്റേന്ന് രാവിലെ യുവതിയെ മുറിയിൽ അബോധാവസ്ഥയിൽ കണ്ടെത്തുകയായിരുന്നു. വിവരം ലഭിച്ചതിനെ തുടർന്ന് പൊലീസ് സ്ഥലത്തെത്തി ആംബുലൻസ് വിളിച്ചെങ്കിലും യുവതി മരിച്ചതായി സ്ഥിരീകരിച്ചു.

സംഭവത്തെക്കുറിച്ച് ഭർത്താവ് പോലീസിനോട് നൽകിയ മൊഴിയിൽ, ഞായറാഴ്ച രാത്രി ഇരുവരും ഒരുമിച്ച് മദ്യപിച്ചതായും തുടർന്ന് പുലർച്ചെ 3.30ഓടെ ഉറങ്ങാൻ പോയതായും പറയുന്നു. രാവിലെ ഉണർന്നപ്പോൾ ഭാര്യ മൂക്കിൽ നിന്ന് രക്തസ്രാവത്തോടെ അബോധാവസ്ഥയിൽ കിടക്കുന്നതായി കണ്ടെത്തിയതായും ഇയാൾ വ്യക്തമാക്കി.

മുറിയിൽ നിന്ന് രണ്ട് ഒഴിഞ്ഞ മദ്യക്കുപ്പികളും ഭക്ഷണ സാധനങ്ങളും പൊലീസ് കണ്ടെടുത്തിട്ടുണ്ട്. കിടക്കവിരിയിൽ രക്തക്കറകളും കണ്ടെത്തിയതായി റിപ്പോർട്ടുണ്ട്. യുവതിയുടെ മൃതദേഹം പോസ്റ്റ്‌മോർട്ടത്തിനായി ഡെറാഡൂണിലെ ആശുപത്രിയിലേക്ക് മാറ്റി.

മരണകാരണം സംബന്ധിച്ച വ്യക്തത പോസ്റ്റ്‌മോർട്ടം റിപ്പോർട്ട് ലഭിച്ച ശേഷം മാത്രമേ വ്യക്തമാകൂവെന്ന് പൊലീസ് അറിയിച്ചു. 2025 നവംബർ 8-നായിരുന്നു ഇവരുടെ വിവാഹം. ഇരുവരും വിശാഖപട്ടണം സ്വദേശികളാണ്. സംഭവം ദുരൂഹമാണെന്ന നിലയിൽ പൊലീസ് അന്വേഷണം ആരംഭിച്ചിട്ടുണ്ട്.