ക്യൂബയിൽ വൻ ആരോഗ്യ പ്രതിസന്ധി; വയറിളക്ക രോഗങ്ങൾ പടരുന്നതായി യു.എസ് എംബസിയുടെ മുന്നറിയിപ്പ്

SEPTEMBER 5, 2026, 2:44 AM

ഹവാന: കുടിവെള്ള വിതരണത്തിലും വൈദ്യുതി ഉൽപ്പാദനത്തിലുമുണ്ടായ കടുത്ത പ്രതിസന്ധിയെത്തുടർന്ന് ക്യൂബയിൽ വയറിളക്കവും അനുബന്ധ ഉദരരോഗങ്ങളും പടർന്നുപിടിക്കുന്നതായി യു.എസ് എംബസിയുടെ കടുത്ത മുന്നറിയിപ്പ്. ഹവാനയിലെ അമേരിക്കൻ എംബസിയാണ് ക്യൂബയിലുള്ള അമേരിക്കൻ പൗരന്മാർക്കും സഞ്ചാരികൾക്കുമായി ആരോഗ്യ ജാഗ്രതാനിർദ്ദേശം പുറപ്പെടുവിച്ചത്.

അടിസ്ഥാന സൗകര്യങ്ങളുടെ തകർച്ച മൂലം ക്യൂബയിൽ ശുദ്ധജല വിതരണം തടസ്സപ്പെടുകയും ഭക്ഷണസാധനങ്ങൾ ശരിയായ താപനിലയിൽ സൂക്ഷിക്കാൻ സാധിക്കാതെ വരികയും ചെയ്തതാണ് രോഗവ്യാപനത്തിന് കാരണം.

ക്യൂബയിലേക്കുള്ള ഇന്ധനക്കപ്പലുകൾ തടഞ്ഞുകൊണ്ട് ട്രംപ് ഭരണകൂടം ഉപരോധം ഏർപ്പെടുത്തിയതാണ് പ്രതിസന്ധി രൂക്ഷമാക്കിയത്. ഒൻപത് മാസമായി തുടരുന്ന ഇന്ധന ഉപരോധം കാരണം ദ്വീപിൽ മണിക്കൂറുകളോളം വൈദ്യുതിബന്ധം വിച്ഛേദിക്കപ്പെടുകയാണ്.

യു.എസിന്റെ ഇന്ധന ഉപരോധം അന്താരാഷ്ട്ര നിയമങ്ങളുടെ ലംഘനമാണെന്ന് ഐക്യരാഷ്ട്രസഭയുടെ (UN) മനുഷ്യാവകാശ വിദഗ്ദ്ധർ ചൂണ്ടിക്കാട്ടി. ഉപരോധം ശക്തമാക്കിയത് മൂലം ക്യൂബയിൽ വൻതോതിൽ രോഗങ്ങൾ പടർന്നുപിടിക്കാൻ സാധ്യതയുണ്ടെന്ന് ഓഗസ്റ്റിൽ യു.എൻ മുന്നറിയിപ്പ് നൽകിയിരുന്നു.

സാമ്പത്തിക-ആരോഗ്യ മേഖലകളെ തളർത്തുന്ന ഈ ഉപരോധം ജനങ്ങളുടെ ആരോഗ്യകരമായ ജീവിതത്തിനും ഭക്ഷണത്തിനുമുള്ള അവകാശത്തിന്റെ ലംഘനമാണെന്ന് മനുഷ്യാവകാശ പ്രവർത്തകർ ചൂണ്ടിക്കാണിക്കുന്നു.