ഫോൺ വിളിയും മെസ്സേജിംഗും ഇനി എ.ഐ നോക്കും; വിപ്ലവകരമായ മാറ്റങ്ങളുമായി മനുസ് 2.0

SEPTEMBER 29, 2026, 9:51 AM

സിംഗപ്പൂർ ആസ്ഥാനമായി പ്രവർത്തിക്കുന്ന പ്രമുഖ ആർട്ടിഫിഷ്യൽ ഇന്റലിജൻസ് സ്റ്റാർട്ടപ്പായ 'മനുസ്' (Manus) തങ്ങളുടെ പുതിയ എ.ഐ ഏജന്റ് പ്ലാറ്റ്‌ഫോമായ 'മനുസ് 2.0' (Manus 2.0) പുറത്തിറക്കി. ഇതിനൊപ്പം ഉപയോക്താക്കൾക്ക് ദൈനംദിന കാര്യങ്ങൾ എ.ഐ ഏജന്റുകളെ ഏൽപ്പിക്കാൻ സഹായിക്കുന്ന 'ക്യൂ' (Cue) എന്ന പുതിയ ആപ്പും കമ്പനി അവതരിപ്പിച്ചിട്ടുണ്ട്.

സന്ദേശങ്ങൾ അയക്കുക, ഫോൺ വിളിക്കുക തുടങ്ങിയ ദൈനംദിന ചുമതലകൾ ഉപയോക്താവിന് വേണ്ടി സ്വയം നിർവ്വഹിക്കാൻ 'ക്യൂ' ആപ്പിലെ എ.ഐ ഏജന്റുകൾക്ക് സാധിക്കും. എ.ഐ ഏജന്റുകളുടെ കാര്യക്ഷമത വർദ്ധിപ്പിക്കാനും ചെലവും സമയവും കുറയ്ക്കാനും സഹായിക്കുന്ന പുതിയ ആർക്കിടെക്ചറാണ് മനുസ് 2.0-ൽ ഉൾപ്പെടുത്തിയിരിക്കുന്നത്.

പ്രൊജക്റ്റുകൾ നിർമ്മിക്കാനും, തൊഴിൽ പ്രക്രിയകൾ യാന്ത്രികമാക്കാനും കമ്പ്യൂട്ടറിന്റെ പശ്ചാത്തലത്തിൽ ടാസ്കുകൾ പ്രവർത്തിപ്പിക്കാനുമുള്ള സൗകര്യങ്ങൾ ഇതിലുണ്ട്. കമ്പനിയുടെ ഏറ്റവും പുതിയ ഏജന്റ് സിസ്റ്റമായ 'കാസ്‌കേഡ്' അടിസ്ഥാനമാക്കിയാണ് മനുസ് 2.0 പ്രവർത്തിക്കുന്നത്. ആവശ്യമുള്ളപ്പോൾ മാത്രം ആവശ്യമായ ടൂളുകൾ ഉപയോഗിക്കുകയും ഒരേസമയം ഒന്നിലധികം ജോലികൾ പൂർത്തിയാക്കുകയും ചെയ്യുന്നതിനാൽ ഇത് സമയലാഭം നൽകുന്നു. മുൻ സിസ്റ്റത്തെ അപേക്ഷിച്ച് കാസ്‌കേഡ് 28.2 ശതമാനം വേഗത്തിൽ ജോലികൾ പൂർത്തിയാക്കുകയും 32 ശതമാനം ചെലവ് കുറയ്ക്കുകയും ചെയ്യുന്നതായി കമ്പനി അവകാശപ്പെടുന്നു.

ക്ലൗഡ് കമ്പ്യൂട്ടർ : ഉപയോക്താക്കൾ ലാപ്ടോപ്പ് ഓഫാക്കിയാലും അവർ ആരംഭിച്ച പ്രൊജക്റ്റുകളും ഓട്ടോമേഷനുകളും പശ്ചാത്തലത്തിൽ തടസ്സമില്ലാതെ പ്രവർത്തിക്കാൻ ക്ലൗഡ് കമ്പ്യൂട്ടർ സൗകര്യം സഹായിക്കും. (ഉദാഹരണത്തിന് മൾട്ടിപ്ലെയർ ഗെയിം സെർവറുകൾ ലൈവായി നിലനിർത്താം).

ഇവന്റ് ട്രിഗർ ഓട്ടോമേഷൻ: ഇമെയിൽ, കലണ്ടർ ഈവന്റുകൾ, സ്ലാക്ക് (Slack), നോഷൻ (Notion) എന്നിവയിൽ വരുന്ന മാറ്റങ്ങൾക്കനുസരിച്ച് സ്വയം പ്രവർത്തിക്കുന്ന ഓട്ടോമേഷൻ സിസ്റ്റം.

മനുസ് സ്റ്റുഡിയോ: ഡോക്യുമെന്റുകൾ, സ്പ്രെഡ്ഷീറ്റുകൾ, പ്രസന്റേഷനുകൾ, കോഡിംഗ്, വെബ്‌സൈറ്റ് നിർമ്മാണം എന്നിവയ്ക്ക് പുറമെ വീഡിയോ എഡിറ്റിംഗിനും ഗെയിം വികസനത്തിനുമുള്ള പ്രത്യേക ടൂളുകൾ ഉൾപ്പെടുത്തിയ ഡെസ്ക്ടോപ്പ് ആപ്പ്.

ടൈംലൈൻ വീഡിയോ എഡിറ്ററും ഗെയിം ടൂളും: വീണ്ടും ജനറേറ്റ് ചെയ്യാതെ വീഡിയോകളിലെ പ്രത്യേക ഭാഗങ്ങൾ മാത്രം എഡിറ്റ് ചെയ്യാം. എ.ഐ നിർമ്മിത കോഡുകളും ഗ്രാഫിക്സും ഉപയോഗിച്ച് കളിക്കാൻ സാധിക്കുന്ന ഗെയിമുകൾ എളുപ്പത്തിൽ നിർമ്മിക്കാം.

റിമോട്ട് കൺട്രോളും കമ്പ്യൂട്ടർ യൂസും: മൊബൈൽ ഫോൺ വഴിയോ മറ്റ് ഉപാധികൾ വഴിയോ സ്വന്തം കമ്പ്യൂട്ടറിലെ ഫയലുകളും ആപ്പുകളും ബ്രൗസറും സുരക്ഷിതമായി ഉപയോഗിക്കാൻ എ.ഐ ഏജന്റിന് നിർദ്ദേശം നൽകാം.