ഫൊക്കാന സാഹിത്യ വിഭാഗത്തിനായി രൂപീകരിച്ച കമ്മിറ്റിയുടെ പ്രവർത്തനങ്ങൾ പൂർണ്ണ തോതിൽ ആരംഭിച്ചിരിക്കുകയാണ്. നിശ്ചിത ലക്ഷ്യങ്ങൾ കൃത്യമായി പൂർത്തീകരിക്കാനും പ്രവർത്തനങ്ങൾക്ക് മാർഗനിർദേശം നൽകാനുമായി, കമ്മിറ്റിയുടെ നിർദേശപ്രകാരം ചെയർമാൻ ബെന്നി നെച്ചൂർ ഡോ. എം.വി.പിള്ളയുമായും പ്രശസ്ത സാഹിത്യകാരൻ സി.വി. ബാലകൃഷ്ണനുമായും ബന്ധപ്പെടുകയും, അവർ രക്ഷാധികാരികളായി പ്രവർത്തിക്കാൻ സമ്മതം അറിയിക്കുകയും ചെയ്തതായി ഫൊക്കാന പ്രസിഡന്റ് ഫിലിപ്പോസ് ഫിലിപ്പ് അറിയിച്ചു.
ഫൊക്കാന സാഹിത്യ വിഭാഗത്തിന്റെ രക്ഷാധികാരികളായി പ്രമുഖ വ്യക്തിത്വങ്ങളെ ക്ഷണിക്കണമെന്ന തന്റെ നിർദ്ദേശം കമ്മിറ്റി ഐക്യകണ്ഠേന അംഗീകരിക്കുകയായിരുന്നുവെന്ന് സാഹിത്യ വിഭാഗം അഡൈ്വസറായ സോണി അമ്പൂക്കൻ വ്യക്തമാക്കി. ഉത്തര അമേരിക്കൻ മലയാളി എഴുത്തുകാരുടെ പുസ്തകങ്ങൾക്കും രചനകൾക്കും നാട്ടിൽ അർഹമായ ശ്രദ്ധയോ പ്രചാരണമോ ലഭിക്കുന്നില്ല എന്ന ദീർഘകാലത്തെ പരാതിക്ക് പരിഹാരം കാണാൻ കൂടിയാണിത്.
രക്ഷാധികാരികളെന്ന നിലയിൽ ഇരുവരുടെയും സജീവ സാന്നിധ്യം അമേരിക്കൻ മലയാളി എഴുത്തുകാരുടെ കൃതികൾക്ക് അർഹമായ അംഗീകാരവും പ്രചാരവും ഉറപ്പാക്കാൻ സഹായിക്കും. എഴുത്തുകാർക്ക് ആവശ്യമായ മാർഗനിർദേശങ്ങളും ഉപദേശങ്ങളും നൽകുന്നതിനൊപ്പം, അവരുടെ കൃതികളെ പ്രോത്സാഹിപ്പിക്കാനും സാഹിത്യസാംസ്കാരിക മണ്ഡലങ്ങളിൽ കൃത്യമായ ഇടം ഉറപ്പാക്കാനും ഇരുവരും നേതൃത്വം നൽകും.
കൂടാതെ, പ്രശസ്ത സാഹിത്യകാരന്മാരായ എം. മുകുന്ദൻ, സാറാ ജോസഫ് എന്നിവരും ഫൊക്കാന സാഹിത്യ സമിതിയുടെ പ്രവർത്തനങ്ങൾക്ക് തങ്ങളുടെ പൂർണ്ണ പിന്തുണ പ്രഖ്യാപിച്ചിട്ടുണ്ട്. വടക്കേ അമേരിക്കൻ മലയാളി എഴുത്തുകാരെയും ഫൊക്കാനയുടെ സാഹിത്യ സംരംഭങ്ങളെയും പിന്തുണയ്ക്കാൻ സാധിക്കുന്നത് തങ്ങൾക്ക് ലഭിക്കുന്ന വലിയൊരു ബഹുമാനമായി കരുതുന്നുവെന്നും സാഹിത്യ കമ്മിറ്റിയുടെ മുന്നോട്ടുള്ള എല്ലാ പ്രവർത്തനങ്ങൾക്കും സർവ്വ പിന്തുണയോടെയും ഒപ്പമുണ്ടാകുമെന്നും ഇരുവരും ബെന്നി നെച്ചൂരിനെ അറിയിച്ചു.
ഫിലിപ്പോസ് ഫിലിപ്പ് ജനറൽ സെക്രട്ടറിയായിരുന്ന 2018ൽ ബെന്നി സാഹിത്യ അവാർഡ് കമ്മിറ്റി ചെയർമാനായിരുന്നപ്പോൾ, സാറാ ജോസഫിന്റെ മകളും പ്രശസ്ത എഴുത്തുകാരിയുമായ സംഗീത ശ്രീനിവാസന്റെ 'ആസിഡ്' എന്ന നോവലിന് ഫൊക്കാന സാഹിത്യ അവാർഡ് നൽകി ആദരിച്ചത് ഓർമ്മിപ്പിച്ചപ്പോൾ സാറാ ജോസഫ് ഏറെ സ്നേഹത്തോടെയും സന്തോഷത്തോടെയുമാണ് അതിനോട് പ്രതികരിച്ചത്.
സി.വി. ബാലകൃഷ്ണനോടുള്ള തന്റെ ആഴത്തിലുള്ള ആദരവ് 1983 ഏപ്രിലിൽ 'മാതൃഭൂമി' വാരികയിൽ ആയുസ്സിന്റെ പുസ്തകം പരമ്പരയായി വന്ന കാലം മുതലുള്ളതാണെന്നും, അന്നുമുതൽ അദ്ദേഹത്തിന്റെ കൃതികളെ നിരന്തരം പിന്തുടരുന്ന വായനക്കാരനാണ് താനെന്നും വൈസ് ചെയർമാൻ മുരളി നായർ പറഞ്ഞു.
ഫൊക്കാനയുടെ സാഹിത്യ പ്രവർത്തനങ്ങൾക്ക് ഇരുവരുടെയും പിന്തുണ ലഭിച്ചതിൽ അളവറ്റ സന്തോഷമുണ്ടെന്നും, അവരുടെ ജ്ഞാനവും ഉപദേശങ്ങളും കമ്മിറ്റിക്കും വടക്കേ അമേരിക്കയിലുടനീളമുള്ള എഴുത്തുകാർക്കും വായനക്കാർക്കും വലിയ ഊർജ്ജമാണെന്നും ഭാരവാഹികളായ ഗീത ജോർജ്ജ്, ബിജു ജോർജ്ജ്, ജോർജ്ജ് നടവയൽ എന്നിവർ നന്ദിയോടെ കൂട്ടിച്ചേർത്തു.
കേരളത്തിലെ സർവകലാശാലകളിലെ മലയാളത്തിലെ ഏറ്റവും മികച്ച പി.എച്ച്.ഡി. പ്രബന്ധത്തിന് കേരള സർവകലാശാലയുമായി ചേർന്ന് ഫൊക്കാന നൽകുന്ന അവാർഡാണ് 'ഭാഷയ്ക്കൊരു ഡോളർ'. കേരള സർവകലാശാലയാണ് ഈ അവാർഡ് നിർണ്ണയത്തിന് നേതൃത്വം നൽകുന്നത്. 50,000 രൂപയും പ്രശസ്തിപത്രവും അടങ്ങുന്നതാണ് ഈ അവാർഡ്.
ഈ പദ്ധതിയിലൂടെ മുൻകാലങ്ങളിൽ സാമ്പത്തിക സഹായം ലഭിച്ച മൂന്നുപേർ ഇന്ന് തുഞ്ചത്തെഴുത്തച്ഛൻ മലയാള സർവകലാശാലയിൽ (തിരൂർ, മലപ്പുറം) അധ്യാപകരായി സേവനമനുഷ്ഠിക്കുന്നു എന്ന അഭിമാനകരമായ വിവരം ഫിലിപ്പോസ് ഫിലിപ്പിനെ ഡോ. എം.വി. പിള്ള അറിയിച്ചു.
ഡോ. എം.വി. പിള്ള
അമേരിക്കൻ ബോർഡ് ഓഫ് ഇന്റേണൽ മെഡിസിൻ ബോർഡിന്റെ ട്രിപ്പിൾ ബോർഡ് സർട്ടിഫിക്കേഷനുള്ള പ്രശസ്ത ഓങ്കോളജിസ്റ്റും ഹെമറ്റോളജിസ്റ്റുമാണ് ഡോ. മാധവൻ വി. പിള്ള. തോമസ് ജഫേഴ്സൺ യൂണിവേഴ്സിറ്റി സിഡ്നി കിമ്മൽ മെഡിക്കൽ കോളേജിലെ ക്ലിനിക്കൽ പ്രൊഫസറായ അദ്ദേഹം ഇന്റർനാഷണൽ നെറ്റ്വർക്ക് ഫോർ കാൻസർ ട്രീറ്റ്മെന്റ് ആൻഡ് റിസർച്ചിന്റെ പ്രസിഡന്റും സി.ഇ.ഒയുമാണ്. യു.എസ്. എയർഫോഴ്സ് മെഡിക്കൽ കോർപ്സിൽ ലഫ്റ്റനന്റ് കേണലായും സേവനമനുഷ്ഠിച്ചിട്ടുള്ള അദ്ദേഹം ഗ്ലോബൽ വൈറസ് നെറ്റ്വർക്കിന്റെ സീനിയർ അഡൈ്വസറുമാണ്.
ഇന്ത്യയിലെ പാലിയേറ്റീവ് കെയർ പ്രവർത്തനങ്ങൾക്ക് വലിയ പിന്തുണ നൽകിയ അദ്ദേഹത്തെ ഫൊക്കാന, എ.കെ.എം.ജി (യുഎസ്എ, കാനഡ, യുഎഇ), വേൾഡ് മലയാളി കൗൺസിൽ തുടങ്ങിയ സംഘടനകൾ ലൈഫ് ടൈം അച്ചീവ്മെന്റ് അവാർഡ് നൽകി ആദരിച്ചിട്ടുണ്ട്.
തിരുവനന്തപുരം ആർ.സി.സി., കൊച്ചിൻ കാൻസർ റിസർച്ച് സെന്റർ എന്നിവയുടെ ഗവേണിംഗ് കൗൺസിൽ ഓണററി അംഗവും, ചെങ്ങന്നൂർ കെ.എം. ചെറിയാൻ ഇൻസ്റ്റിറ്റിയൂട്ട് ഓഫ് മെഡിക്കൽ സയൻസസിലെ കാൻസർ സെന്റർ അഡൈ്വസറി ബോർഡ് ചെയർമാനുമാണ് ഡോ. പിള്ള. കേരളത്തിലെ സ്വകാര്യ കാൻസർ ആശുപത്രികളുമായി സഹകരിച്ച് സംസ്ഥാനത്തുടനീളം കാൻസർ പ്രതിരോധരോഗനിർണയ പദ്ധതികൾ ആരംഭിക്കാനുള്ള അദ്ദേഹത്തിന്റെ നിർദ്ദേശം ഈ വർഷം കേരള സർക്കാർ ഏറ്റെടുക്കുകയും, ഈ ജീവകാരുണ്യ പദ്ധതിയുടെ കോർഡിനേറ്ററായി അദ്ദേഹം സന്നദ്ധസേവനം നടത്തുകയും ചെയ്യുന്നു. മികച്ച എഴുത്തുകാരനും പ്രഭാഷകനും ചിന്തകനുമാണ് അദ്ദേഹം.
സി.വി. ബാലകൃഷ്ണൻ
പുതിയ നിയമനങ്ങളെ ഫൊക്കാന എക്സിക്യൂട്ടീവ് കമ്മിറ്റി ഭാരവാഹികളായ പ്രസിഡന്റ് ഫിലിപ്പോസ് ഫിലിപ്പ്, ജനറൽ സെക്രട്ടറി സന്തോഷ് നായർ, ട്രഷറർ ആന്റോ വർക്കി, എക്സിക്യൂട്ടീവ് വൈസ് പ്രസിഡന്റ് ലിൻഡോ ജോളി, വൈസ് പ്രസിഡന്റ് ജോസി ജെ. കാരക്കാട്ട്, അസോസിയേറ്റ് സെക്രട്ടറി സോണി തോമസ് അമ്പൂക്കൻ, അഡീഷണൽ അസോസിയേറ്റ് സെക്രട്ടറി അജു ഉമ്മൻ, അസോസിയേറ്റ് ട്രഷറർ അപ്പുക്കുട്ടൻ പിള്ള, ട്രഷറർ ഗ്രേസ് മരിയ ജോസഫ്, വുമൺസ് ഫോറം ചെയർ ഷൈനി രാജു എന്നിവർ ഐക്യകണ്ഠേന സ്വാഗതം ചെയ്തു.
ജിജി റ്റോം, ഫൊക്കാന പി.ആർ.ഓ.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
