തിരഞ്ഞെടുപ്പ് തീയതികളിൽ കാലാവസ്ഥയും നിർണ്ണായകമാകും; ജനുവരി, ഫെബ്രുവരി മാസങ്ങളിലേക്ക് മാറിയേക്കുമെന്ന് സൂചന

APRIL 12, 2026, 4:38 AM

രാജ്യത്ത് തിരഞ്ഞെടുപ്പ് തീയതികൾ നിശ്ചയിക്കുന്നതിൽ രാഷ്ട്രീയ സാഹചര്യങ്ങൾക്കൊപ്പം കാലാവസ്ഥയും നിർണ്ണായക ഘടകമാകുന്നു. 2034-ഓടെ ‘ഒരു രാജ്യം, ഒരു തിരഞ്ഞെടുപ്പ്’ എന്ന ലക്ഷ്യത്തിലേക്ക് നീങ്ങുന്നതിന് പിന്നിൽ ആഗോളതാപനവും കടുത്ത ഉഷ്ണതരംഗങ്ങളും കാരണമായേക്കാമെന്ന് മുൻ മുഖ്യ തിരഞ്ഞെടുപ്പ് കമ്മിഷണർ ഒ.പി. റാവത്ത് അഭിപ്രായപ്പെട്ടു. പത്തനംതിട്ടയിൽ നടന്ന ചർച്ചയിലാണ് അദ്ദേഹം ഇക്കാര്യം വ്യക്തമാക്കിയത്.

പുതിയ സംവിധാനം നിലവിൽ വന്നാൽ നിയമസഭ തിരഞ്ഞെടുപ്പുകൾ ഉൾപ്പെടെ എല്ലാ വോട്ടെടുപ്പുകളും കടുത്ത ചൂട് കുറവുള്ള ഡിസംബർ, ജനുവരി, ഫെബ്രുവരി മാസങ്ങളിലേക്ക് മാറ്റാനാണ് സാധ്യത.

നിലവിൽ പലയിടത്തും താപനില ഉയരുന്ന സാഹചര്യത്തിൽ വോട്ടെടുപ്പ് സമയം ദീർഘിപ്പിക്കുന്നത് ഇതിന്റെ ഭാഗമാണെന്നും അദ്ദേഹം ചൂണ്ടിക്കാട്ടി. ക്ലൈമറ്റ് ട്രെൻഡ്സ് ഏജൻസി നടത്തിയ പഠനവും തിരഞ്ഞെടുപ്പും ആഗോള താപനവും തമ്മിലുള്ള ബന്ധത്തെ ശരിവെക്കുന്നുണ്ട്.

കേരളം പോലുള്ള സംസ്ഥാനങ്ങളിൽ നിലവിൽ തിരഞ്ഞെടുപ്പ് നടക്കുന്ന മാർച്ച്-ഏപ്രിൽ മാസങ്ങൾ ഏറ്റവും ചൂടേറിയ കാലഘട്ടമാണെന്ന് പൂണെ ട്രോപ്പിക്കൽ മെറ്റീരിയോളജി ഇൻസ്റ്റിറ്റ്യൂട്ടിലെ ഗവേഷകൻ ഡോ. റോക്ഷി മാത്യു കോൾ പറഞ്ഞു. അറബിക്കടലിലെ താപനില വർധനവും ഭാവിയിൽ തീയതികൾ നിശ്ചയിക്കുന്നതിൽ നിർണ്ണായകമാകും.

ബംഗാൾ, തമിഴ്നാട് എന്നിവിടങ്ങളിലെ കടുത്ത കാലാവസ്ഥയും അസമിലെ പ്രാദേശിക ആഘോഷങ്ങളും പരിഗണിക്കുമ്പോൾ ശൈത്യകാലം വോട്ടെടുപ്പിന് കൂടുതൽ അനുയോജ്യമാണെന്നാണ് വിലയിരുത്തൽ.