99 ശതമാനം ഹൃദ്രോഗത്തിൽ നിന്ന് രക്ഷനേടാം; ഈ നാല് ഘടകങ്ങൾ ശ്രദ്ധിച്ചാൽ

SEPTEMBER 30, 2025, 10:17 PM

ലോകമെമ്പാടുമുള്ള മരണകാരണങ്ങളിൽ ഒന്നാണ് ഹൃദ്രോഗം. ഹൃദയസംബന്ധമായ മരണങ്ങളിൽ ഏകദേശം 85 ശതമാനവും ഹൃദയാഘാതവും പക്ഷാഘാതവും മൂലമാണ്. വൈദ്യശാസ്ത്രരംഗത്ത് നിരവധി പുരോഗതികൾ ഉണ്ടായിട്ടും, ഈ രോഗങ്ങൾ തടയാനുള്ള ഏറ്റവും എളുപ്പ മാർഗം ജീവിതശൈലിയിൽ ചില മാറ്റങ്ങൾ വരുത്തുക എന്നതാണ് എന്ന് വിദഗ്ദ്ധർ പറയുന്നു.

ഈ വിഷയത്തിൽ ഒരു പഠനം പുറത്തുവന്നിട്ടുണ്ട്. ഹൃദയാഘാതം, പക്ഷാഘാതം അല്ലെങ്കിൽ ഹൃദയസ്തംഭനം എന്നിവ അനുഭവിച്ച 99 ശതമാനത്തിലധികം ആളുകൾക്കും അവരുടെ ആരോഗ്യ പ്രതിസന്ധിക്ക് വളരെ മുമ്പുതന്നെ കുറഞ്ഞത് ഒരു പ്രധാന അപകട ഘടകമെങ്കിലും ഉണ്ടായിരുന്നുവെന്ന് പഠനം പറയുന്നു.

ജേണൽ ഓഫ് ദി അമേരിക്കൻ കോളേജ് ഓഫ് കാർഡിയോളജിയിൽ പ്രസിദ്ധീകരിച്ച പഠനത്തിലാണ് ഇത് വെളിപ്പെടുത്തിയത്. ദക്ഷിണ കൊറിയയിലെ 9 ദശലക്ഷത്തിലധികം ആളുകളുടെയും യുണൈറ്റഡ് സ്റ്റേറ്റ്സിലെ ഏകദേശം 7,000 ആളുകളുടെയും ദീർഘകാല ആരോഗ്യ ഡാറ്റ, ഗവേഷകർ പരിശോധിച്ചു. അവർ നാല് പ്രധാന ഘടകങ്ങളിൽ ശ്രദ്ധ കേന്ദ്രീകരിച്ചു. അത് ഇതാണ്

ഉയർന്ന രക്തസമ്മർദ്ദം
ഉയർന്ന കൊളസ്ട്രോൾ
ഉയർന്ന ഫാസ്റ്റിംഗ് ഗ്ലൂക്കോസ് (പ്രമേഹം)
പുകയില ഉപയോഗം

ഉയർന്ന രക്തസമ്മർദ്ദമായിരുന്നു ഇവയിൽ ഏറ്റവും സാധാരണമായത് എന്ന് മെഡിക്കൽ ന്യൂസ് ടുഡേ റിപ്പോർട്ട് ചെയ്യുന്നു. ദക്ഷിണ കൊറിയയിലെ 95%പേർക്കും യുഎസിലെ 93% പേർക്കും ഇത് കണ്ടെത്തി.

ഉയർന്ന രക്തസമ്മർദ്ദം പലപ്പോഴും ലക്ഷണങ്ങൾ കാണിക്കാറില്ല. അത് ഗുരുതരമായി മാറുന്നതുവരെ അവഗണിക്കപ്പെടുകയും ചെയ്യുന്നു. അപകട ഘടകങ്ങളെ നന്നായി നിയന്ത്രിക്കേണ്ടതിൻ്റെ ആവശ്യകത നേരത്തെ വിദഗ്ദ്ധർ വ്യക്തമാക്കിയിരുന്നു.

പുകവലി ഉപേക്ഷിക്കുക, ആരോഗ്യകരമായ ഭക്ഷണം കഴിക്കുക, വ്യായാമം ചെയ്യുക, രക്തസമ്മർദ്ദവും പ്രമേഹവും പരിശോധിക്കുക തുടങ്ങിയ കാര്യങ്ങൾ അപകടസാധ്യത വലിയ തോതിൽ കുറയ്ക്കുമെന്ന് പഠനം വ്യക്തമാക്കുന്നു.